ក្រុងបានលុងៈ បណ្តុំទេសភាពស្រស់ស្អាតនៃផ្ទៃបឹងដ៏ធំល្វឹងល្វើយអមដោយព្រៃឈើសងខាងពណ៌ខៀវខ្ចី និងទឹកថ្លាឈ្វេងអាចឆ្លុះមុខបានត្រជាក់ស្រេងអាចចុះងូតលេងបានមានទីលម្ហែកាយម្លប់ក្យូស ប្រក់ស្បូវសម្រាប់អង្គុយញ៉ាំបាយចោលម្លប់ត្រឈឹងត្រឈៃសប្បាយចិត្តទៅលេងលក្ខណៈគ្រួសារ មិត្តភក្តិ និងគូស្នេហ៍នៅទីលម្ហែកាយកែច្នៃថ្មីទើបបើកបាន ១ ឆ្នាំគឺរមណីយដ្ឋានវារីរតនៈ។
រមណីយដ្ឋានវារីរតនៈស្ថិតនៅភូមិថ្មដា សង្កាត់បឹងកន្សែង ក្រុងបានលុង ខេត្តរតនគិរីធ្វើដំណើរត្រឹមតែចម្ងាយ ៣ គីឡូម៉ែត្រប៉ុណ្ណោះពីក្រុងបានលុងហួសពីតំបន់កម្សាន្តបឹងកន្សែងបន្តិចនៅលើផ្ទៃបឹងទំហំ ៣ គីឡូម៉ែត្រ។
លោក សែត ស៊ន អ្នកគ្រប់គ្រងនៅរមណីយដ្ឋានវារីរតនៈបង្ហើបឲ្យដឹងពីការកកើតនៃតំបន់នេះ និងសេវាកម្មនានាថា៖ «ទីនេះជាតំបន់កែច្នៃផ្សំនឹងធម្មជាតិនៃបឹងវារីមានទំហំប្រមាណ ៣ គីឡូម៉ែត្រទើបតែបង្កើតឡើងនៅឆ្នាំ ២០១៨។ បឹងនេះមានទឹកថ្លាឈ្វេង ទេសភាពធម្មជាតិ ខ្យល់បរិសុទ្ធបក់មកត្រសៀកៗ។ យើងមានសេវាកម្ម ម្លប់ក្យូសប្រក់ស្បូវសម្រាប់អង្គុយទទួលទានអាហារគឺស្ទើរតែជុំវិញបឹងវារី។ កន្លែងខ្ញុំមានក្យូសអង្គុយចំនួន ១៣ ក្យូសទាំងតូចទាំងធំ។ ក្យូសតូចអាចឲ្យភ្ញៀវអង្គុយបានចំនួន ៥ ឬ ៦ នាក់ ខណៈឯក្យុសធំអាចអង្គុយគ្នាចំនួនលើសពី ១០ នាក់។ ក្រៅពីនេះយើងបានធ្វើសួនផ្កាចម្រុះលម្អ ទុកសម្រាប់ទេសចរថតសែលហ្វ៊ីលេង ឬថតផ្តិតរូបដ៏ស្រស់ស្អាត ដើម្បីរក្សាទុកជាអនុស្សាវរីយ៍ទៀតផងដែរ»។
ភ្ញៀវដែលចូលចិត្តមកលម្ហែកាយនៅរមណីយដ្ឋានវារីរតនៈនេះមានច្រើនគឺទាំងទីជិត និងឆ្ងាយ ហើយមិនប្រកាន់ថា ថ្ងៃធម្មតា ឬក៏ចុងសប្តាហ៍នោះឡើយ គឺមានចេញចូលជាប់ឥតឈប់ដោយមានមុខម្ហូបអាហារទាក់ទាញចំណាប់អារម្មណ៍ក្នុងការទទួលទានដែរ នាវេលាអាហារពេលថ្ងៃត្រង់ និងពេលល្ងាច។
លោក សែត ស៊ន បន្តឲ្យដឹងថា៖ «ភ្ញៀវមករាល់ថ្ងៃមិនដាច់ឡើយ ខណៈពេលខ្លះនោះគឺយើងសឹងតែគ្មានកន្លែងទទួលភ្ញៀវ។ ចំពោះភ្ញៀវនៅថ្ងៃបុណ្យទាននានាវិញ យើងបានបិទនូវការកុម្ម៉ង់ទុកតាមទូរស័ព្ទមុនរបស់ភ្ញៀវដែលចង់មកកម្សាន្តនៅទីនេះព្រោះថាចំនួនភ្ញៀវមកលេងគឺច្រើនមែនទែនពិបាកកំណត់ចំនួន។ ឯម្ហូបអាហារវិញដូចជាមានទៅតាមការដែលចង់កុម្ម៉ង់របស់ភ្ញៀវ។ តែបើតាមការកត់សម្គាល់នោះភ្ញៀវភាគច្រើននិយមកុម្ម៉ង់ទឹកគ្រឿងខ្មែរផ្ទាប់ជាមួយបន្លែស្រស់ដាំនៅទីនេះ មាន់ស្រែ និងទាដុតអំបិលម្ទេស ឬដុតប្រឡាក់ទឹកអម្ពិលទុំ សាច់គោ សាច់ជ្រូក និងសាច់ត្រីនានាដោយមិនគិតតម្លៃជួលក្យូសទេ។ សម្រាប់មាន់ ឬទាដុតមូយដែលមានទម្ងន់ជាង ១ គីឡូក្រាមតម្លៃ ៥ ម៉ឺនរៀល និងមាន់ ១ ភ្ញៀវក៏អាចកុម្ម៉ង់ចម្អិនម្ហូបបាន ២ មុខផងដែរ»។
ក្រៅពីនេះរមណីយដ្ឋានវារីរតនៈក៏មានទូកទាទឹកសម្រាប់ការជិះកម្សាន្តលេងនៅលើផ្ទៃបឹងបានផងដែរដោយសារសេវាកម្មគិតតម្លៃជួលជាម៉ោង។
អ្នកគ្រប់គ្រងនៅរមណីយដ្ឋានវារីរតនៈបញ្ជាក់ដែរថា៖ «យើងមានសេវាកម្មទូកទា ដើម្បីជិះលេងកម្សាន្តដែរគឺគិត ១ ម៉ោង តម្លៃ ៣ ដុល្លារ។ តែយ៉ាងណាក៏យើងមានលក្ខខណ្ឌផងដែរសម្រាប់ក្រុមក្មេងតូចៗមិនអនុញ្ញាតឲ្យជិះលេងឡើយ ខណៈមនុស្សធំត្រូវពាក់អាវពោងសុវត្ថិភាពទើបអាចជិះបាន»៕
វីដេអូ៖
No comments :
Post a Comment