Sunday, June 2, 2019
ចិន នឹងស៊ើបអង្កេតក្រុមហ៊ុនអាមេរិក FedEx
 |
| បុគ្គលិករបស់ក្រុមហ៊ុន FedEx កំពុងចែកចាយទំនិញជូនអតិថិជន។ រូបថត AFP |
ក្រុងប៉េកាំងៈ ប្រព័ន្ធព័ត៌មានរដ្ឋចិនបានរាយការណ៍កាលពីថ្ងៃសៅរ៍ថា អាជ្ញាធរចិន នឹងស៊ើបអង្កេតលើក្រុមហ៊ុន FedEx ដែលជាក្រុមហ៊ុនចែកចាយទំនិញរបស់អាមេរិកជុំវិញករណីធ្វើខូចដល់ផលប្រយោជន៍អតិថិជនរបស់ខ្លួន។
ក្រុមហ៊ុន FedEx កាលពីដើមសប្ដាហ៍នេះ បានសុំទោសចំពោះករណីបញ្ជូនកញ្ចប់អីវ៉ាន់របស់ក្រុមហ៊ុន Huawei ខុសផ្លូវ បន្ទាប់ពីក្រុមហ៊ុនទូរគមនាគមន៍ឈានមុខគេរបស់ប្រទេស ចិន មួយនេះបានឲ្យដឹងថា ក្រុមហ៊ុនកំពុងពិនិត្យឡើងវិញពីទំនាក់ទំនងរបស់ខ្លួនជាមួយសេវាវេចខ្ចប់ដោយសារតែឧប្បតិ្តហេតុនេះ។
ការផ្សាយតាមទូរទស្សន៍ CCTV របស់រដ្ឋចិនបានឲ្យដឹងក្នុងអត្ថបទព័ត៌មានមួយថា៖ «នាយកដា្ឋនរបស់រដ្ឋាភិបាលប្រទេស ចិន ដែលពាក់ព័ន្ធបានប្រកាសកាលពីថ្ងៃទី ១ ខែ មិថុនា ថា ដោយសារក្រុមហ៊ុនអាមេរិក FedEx មិនបានដឹកជញ្ជូនទៅដល់អាសយដ្ឋានត្រឹមត្រូវនៅក្នុងប្រទេស ចិន ដែលធ្វើឲ្យប៉ះពាល់យ៉ាងធ្ងន់ធ្ងរដល់សិទ្ធិស្របច្បាប់ និងផលប្រយោជន៍អតិថិជនរបស់ខ្លួន ប្រទេស ចិន នឹងបើកការស៊ើបអង្កេតមួយភ្លាមៗ»។
ទូរទស្សន៍ CCTV បានឲ្យដឹងថា៖ «ក្នុងនាមជាក្រុមហ៊ុនដឹកជញ្ជូន ដែលប្រតិបត្តិការក្នុងប្រទេស ចិន អស់រយៈពេលជាច្រើនទសវត្សរ៍មកហើយនោះ ក្រុមហ៊ុន FedEx មានកាតព្ធកិច្ច សហការជាមួយការស៊ើបអង្កេតរបស់អាជ្ញាធរចិនដែលពាក់ព័ន្ធ»។
ទូរទស្សន៍ CCTV បានកត់សម្គាល់ថា ចិនបានបង្កើតប្រព័ន្ធមួយរួចហើយដែលហៅថា អង្គភាព «ដែលមិនអាចទុកចិត្តបាន»។ ទូរទស្សន៍ CCTV បន្ថែមថា ការស៊ើបអង្កេតនេះនឹង «ជាការព្រមានមួយដល់ក្រុមហ៊ុនបរទេសផ្សេងទៀត»។
ក្រសួងពាណិជ្ជកម្មរបស់ប្រទេស ចិន កាលពីថ្ងៃសុក្រ បានប្រកាសថា ខ្លួននឹងចេញផ្សាយបញ្ជីផ្ទាល់របស់ខ្លួនឈ្មោះថា «អង្គភាពដែលមិនអាចទុកចិត្តបាន» ដែលរំលោភកិច្ចសន្យា ពាណិជ្ជកម្មរបស់ខ្លួន និងបញ្ឈប់ការផ្គត់ផ្គង់ដល់ក្រុមហ៊ុនរបស់ប្រទេស ចិន។
អ្នកជំនាញចិនមួយរូបបានឲ្យដឹងថា បញ្ជីថ្មីនេះនឹងមានមុខងារដូចទៅនឹងបញ្ជីអង្គភាពរបស់អាមេរិកដែរ ហើយបញ្ជីនេះនឹងហាមឃាត់ក្រុមហ៊ុនចិនមិនឲ្យលក់ ឬសហការជាមួយក្រុមហ៊ុនដែលត្រូវបានចុះក្នុងបញ្ជីខ្មៅនេះ៕ AFP/LA
Subscribe to:
Post Comments
(
Atom
)
No comments :
Post a Comment