Huawei លក់​ភាគហ៊ុន​ភាគ​ច្រើន​នៅ​​​ក្នុង​ក្រុមហ៊ុន​ខ្សែកាប្លិ៍​ក្រោម​សមុទ្រ

ក្រុង​ស៊ាងហៃៈ ក្រុមហ៊ុន Huawei នឹង​លក់​ភាគហ៊ុន​ភាគ​ច្រើន​របស់​ខ្លួន​ក្នុង​​ក្រុមហ៊ុន​​ខ្សែកាប្លិ៍​ក្រោម​សមុទ្រ​របស់​​ខ្លួន​ក្នុង​គ្រា​ដែល​មាន​វិធានការ​ដែល​ដឹកនាំ​ដោយ​អាមេរិក ​ដើម្បី​ដាក់​ឲ្យ​ក្រុមហ៊ុន​​​បច្ចេក​វិទ្យា​របស់​ចិន​មួយ​នេះ​នៅ​ឯកោ​ពី​បណ្តាញ​ព័ត៌មាន​បច្ចេកវិទ្យា​​ពិភព​លោក​ដោយសារ​ក្តី​បារម្ភ​ពី​ការ​លួច​ព័ត៌មាន​សន្តិសុខ។ នេះ​បើ​យោង​តាម​អតិថិជន​ដែល​បានទិញ​ភាគហ៊ុន​នេះ​កាល​ពី​ថ្ងៃ​ចន្ទ។

លោក​ប្រធានាធិបតី​អាមេរិក ដូណាល់ ត្រាំ បាន​វាយ​ប្រហារ​ក្រុមហ៊ុន Huawei ក្នុង​រយៈពេល​​ប៉ុន្មាន​ខែ​ថ្មីៗ​នេះ ដោយ​ជំរុញ​ឲ្យ​ប្រទេស​ជា​សម្ព័ន្ធមិត្ត​របស់​ខ្លួន​ធ្វើ​ពហិកា​ផលិតផល​របស់​ក្រុមហ៊ុន​ចិន​នេះ និង​ដាក់​ក្រុមហ៊ុន​នេះ​ក្នុង​បញ្ជី​ខ្មៅ​ដែល​មិន​អាច​ទិញ​សូហ្វវែរ​មួយ​ចំនួន​របស់​អាមេរិក​បាន។

ខ្សែកាប្លិ៍​ក្រោម​សមុទ្រ​មាន​សារៈសំខាន់​ខ្លាំង​ចំពោះ​ចរាចរណ៍​​អ៊ីនធឺណិត​ពិភព​លោក។

ភាគហ៊ុន​ចំនួន ៥១ ភាគរយ ​​ក្នុង​​​ក្រុមហ៊ុន Huawei Marine Networks នឹង​ត្រូវ​ទិញ​ដោយ​ក្រុមហ៊ុន Hengtong Optic-Electric ដែល​ជា​ក្រុមហ៊ុន​ផលិត​ខ្សែកាប្លិ៍​អុបទិក​មាន​មូលដ្ឋាន​នៅ​ខេត្ត​ជាំងស៊ូ ភាគ​ខាង​កើត​ប្រទេស ​ចិន។ នេះ​បើ​យោង​តាម​ឯកសារ​ដែល​ដាក់​ជូន​​ផ្សារហ៊ុន​ក្រុង​ស៊ាងហៃ។

ក្រុមហ៊ុន Huawei Marine Networks គឺ​ជា​ក្រុមហ៊ុន​បណ្តាក់​ទុន​រួមគ្នា​រវាង​ក្រុមហ៊ុន Huawei និង​ក្រុមហ៊ុន Global Marine Systems ដែល​ជា​ក្រុមហ៊ុន​ខ្សែកាប្លិ៍​ក្រោម​សមុទ្រ​របស់​​​អង់គ្លេស។

ក្រុមហ៊ុន Huawei Marine អះអាង​នៅ​លើ​គេហទំព័រ​របស់​ខ្លួន​ថា ក្រុមហ៊ុន​ធ្វើ​ការងារ​លើ​គម្រោង​ប្រហែល ៩០ រាប់​ចាប់​ពី​សមុទ្រ​ប៉ាស៊ីហ្វិក​ដល់​សមុទ្រ​អាត្លង់ទិក ដែល​មាន​ខ្សែកាប្លិ៍​ក្រោម​សមុទ្រ​​ប្រវែង​សរុប​ជាង ៥០ ០០០ គីឡូម៉ែត្រ។

អ្នក​នាំពាក្យ​ក្រុមហ៊ុន Huawei បាន​ឲ្យ​ដឹង​ថា ក្រុមហ៊ុន​មិន​ទាន់​មាន​ការ​អត្ថាធិប្បាយ​ណា​មួយ​ទេ​អំពី​ក្រុមហ៊ុន Huawei Marine៕ AFP/KC