ក្រុងវ៉ាស៊ីនតោនៈ មន្ដ្រីរបស់អាមេរិក និងចិនឲ្យដឹងថា កិច្ចព្រមព្រៀងជាប្រវត្តិសាស្ដ្រមួយដែលបញ្ចប់សង្គ្រាមពាណិជ្ជកម្មជាបន្តរបស់ពួកគេ អាចនឹងកើតឡើងនៅក្នុងពេលឆាប់ៗ ប៉ុន្តែបញ្ហាដ៏សំខាន់គឺថា តើទីក្រុងវ៉ាស៊ីនតោនអាចធ្វើឲ្យប្រាកដថា ទីក្រុងប៉េកាំងនឹងអនុវត្តតាមខ្លឹមសារនៃកិច្ចព្រមព្រៀងរបស់ខ្លួនដូចម្ដេច?
តាមការរាយការណ៍ មន្ដ្រីចិនរហូតដល់ចំនួន ១០០ នាក់ ត្រូវរំពឹងថា នឹងធ្វើដំណើរទៅដល់ទីក្រុងវ៉ាស៊ីនតោនក្នុងសប្ដាហ៍នេះ ជាមួយនឹងលទ្ធភាពនៃការបង្ហាញកិច្ចព្រមព្រៀងដ៏ធំមួយបន្ទាប់ពីភាពតានតឹងរយៈពេលជាច្រើនខែ ដែលបញ្ហានោះនឹងបណ្ដាលឲ្យមានការបារម្ភដល់កិច្ចចរចា។
ទីក្រុងប៉េកាំង អាចធ្វើការស្នើគួរឲ្យភ្ញាក់ផ្អើលចំពោះការទិញថាមពលអាមេរិក និងការនាំចេញផលិតផលកសិកម្ម ជាមធ្យោបាយមួយនៃការកាត់បន្ថយកំណើនឱនភាពពាណិជ្ជកម្មអាមេរិក និងចិន។
លោក Mike Pence អនុប្រធានាធិបតីអាមេរិក បានឲ្យដឹងកាលពីថ្ងៃសុក្រថា យន្តការអនុវត្តច្បាប់នេះនឹងមានសារៈសំខាន់ចំពោះការសម្រេចចិត្តថា តើត្រូវលុបចោលការដាក់ពិន័យពន្ធនាំចូលរបស់អាមេរិកដែលពេលនេះគ្របដណ្ដប់លើការនាំចូលរបស់ប្រទេស ចិន មានតម្លៃជាង ២៥០ ពាន់លានដុល្លារ ឬយ៉ាងណា?
លោក Edward Alden អ្នកជំនាញផ្នែកពាណិជ្ជកម្មនៅក្រុមប្រឹក្សាទំនាក់ទំនងការបរទេស បានប្រាប់ AFP ថា៖«មូលហេតុនៃការអនុវត្តច្បាប់នេះ បានក្លាយជាចំណុចសំខាន់ចំពោះការចរចា។ វា គឺជាប្រវត្តិសាស្ដ្រដ៏យូរអង្វែងរបស់ប្រទេស ចិន ដែលមិនអនុវត្តតាមស្មារតីនៃការប្ដេជ្ញាចិត្តដែលប្រទេសនេះបានធ្វើឡើងនៅអង្គការពាណិជ្ជកម្មពិភពលោក និងក្នុងការចរចាទ្វេភាគីជាមួយអាមេរិក និងប្រទេសផ្សេងៗទៀត»។
លោកបន្តថា ការសម្រេចបានកិច្ចព្រមព្រៀងពាណិជ្ជកម្មជាមួយចិន អាចជាបញ្ហាប្រឈមដោយសារបទប្បញ្ញត្តិរបស់ខ្លួនមិនមានតម្លាភាព។
លោកប្រធានាធិបតីអាមេរិក ដូណាល់ ត្រាំ បានចោទប្រកាន់ប្រទេស ចិន ម្ដងហើយម្ដងទៀតពីបទលួចពីអាមេរិក តាមរយៈការទិញពីអាមេរិកតិចជាងអាមេរិកលក់ចេញ។
លោក ត្រាំ បានទាមទារឲ្យមានការផ្លាស់ប្តូររចនាសម្ព័ន្ធចំពោះសេដ្ឋកិច្ចរបស់ប្រទេស ចិន ដែលរួមមានការបញ្ចប់ការផ្ទេរបច្ចេកវិទ្យាអាមេរិកដោយបង្ខំ ចោរកម្មកម្មសិទ្ធិបញ្ញា និងការដើរតួនាទីដ៏ធំរបស់រដ្ឋាភិបាលចិននៅក្នុងទីផ្សារ និងឧស្សាហកម្ម។
លោក Robert Lighthizer តំណាងផ្នែកពាណិជ្ជកម្មរបស់អាមេរិក ដែលនឹងដឹកនាំក្រុមគណៈប្រតិភូអាមេរិករួមជាមួយនឹងលោក Steven Mnuchin រដ្ឋមន្ដ្រីក្រសួងហិរញ្ញវត្ថុ បានប្រាប់ថា ទីក្រុងវ៉ាស៊ីនតោននឹងមិនទទួលយកការសន្យាខ្យល់ ហើយនឹងទាមទារឲ្យមានការ-បញ្ជាក់ថា ប៉េកាំងនឹងរក្សាពាក្យសម្តីរបស់ខ្លួន៕ AFP/LA
No comments :
Post a Comment