Tuesday, May 28, 2019
ក្រុមហ៊ុនថ្នាំអ៊ីស្រាអែលបង់ពិន័យ $៨៥ លាន ក្នុងបណ្តឹងសារធាតុញៀន
 |
| ក្រុមហ៊ុនផលិតឱសថ Teva ដ៏ធំរបស់ប្រទេស អ៊ីស្រាអែល កាលពីថ្ងៃអាទិត្យបានបង់ប្រាក់ចំនួន ៨៥ លានដុល្លារ ក្នុងបណ្តឹងសារធាតុញៀន។ |
ក្រុងវ៉ាស៊ីនតោនៈ ក្រុមហ៊ុនផលិតឱសថ Teva ដ៏ធំរបស់ប្រទេស អ៊ីស្រាអែល កាលពីថ្ងៃអាទិត្យបានបង់ប្រាក់ចំនួន ៨៥ លានដុល្លារ ឲ្យរដ្ឋាភិបាលរដ្ឋអូក្លាហូម៉ារបស់សហរដ្ឋអាមេរិក ដើម្បីដោះស្រាយបណ្តឹងមួយដែលចោទប្រកាន់ក្រុមហ៊ុននេះពីបទជំរុញឲ្យមានការរីករាលដាលការប្រើប្រាស់សារធាតុអូពីអយ (opioid) ក្នុងរដ្ឋនេះ។ នេះបើយោងតាមអគ្គមេធាវីរបស់រដ្ឋអូក្លាហូម៉ា។
សេចក្តីប្រកាសនេះកើតមានឡើងបន្ទាប់ពីក្រុមហ៊ុន Purdue Pharma ដែលជាក្រុមហ៊ុនផលិតថ្នាំបំបាត់ការឈឺចាប់ OxyContin ដែលមានសារធាតុអូពីអយ និងជាកត្តាសំខាន់មួយនៃវិបត្តិនេះ ដែលបង្កឲ្យមានការស្លាប់របស់មនុស្សរាប់ម៉ឺននាក់នៅសហរដ្ឋអាមេរិកនោះ បានឈានដល់ដំណោះស្រាយមួយដែលមានទឹកប្រាក់ចំនួន ២៧០ លានដុល្លារ ជាមួយរដ្ឋនេះកាលពីខែមីនា។
អគ្គមេធាវីលោក Mike Hunter បានឲ្យដឹងនៅក្នុងសេចក្តីថ្លែងការណ៍មួយថា ដំណោះស្រាយរបស់ក្រុមហ៊ុន Teva បានបង្ហាញថា៖ «សេចក្តីសម្រេចរបស់រដ្ឋអូក្លាហូម៉ា គឺឲ្យចុងចម្លើយទទួលខុសត្រូវលើកម្រិតថ្នាំអូពីអយលើសកម្រិត (overdose) ដែលកំពុងកើតមានឡើង និងការរីករាលដាលការញៀនសារធាតុថ្នាំនេះដែលបន្តឆក់យកជីវិតមនុស្សរាប់ពាន់នាក់ក្នុង ១ ឆ្នាំ»។
លោក Hunter បានថ្លែងថា ទឹកប្រាក់នេះនឹងត្រូវបានប្រើប្រាស់ដោយរដ្ឋអូក្លាហូម៉ា ដើម្បីប្រយុទ្ធប្រឆាំងនឹងវិបត្តិសារធាតុអូពីអយនេះ ដោយនឹងមានសេចក្តីប្រកាសមួយដែលនឹងបង្ហាញថា តើនឹងត្រូវចំណាយប្រាក់ប៉ុន្មានក្នុងថ្ងៃអនាគត?។
ទន្ទឹមនឹងនេះដែរ ក្រុមហ៊ុនផលិតឱសថដ៏ធំមួយនេះឈ្មោះ Johnson & Johnson គ្រោងនឹងចូលសវនាការក្នុងរដ្ឋអូក្លាហូម៉ានៅថ្ងៃអង្គារនេះ ដោយក្រុមហ៊ុននេះកំពុងប្រឈមនឹងការចោទប្រកាន់ស្រដៀងគ្នានេះថា ក្រុមហ៊ុនបានផ្សព្វផ្សាយយ៉ាងខ្លាំងដើម្បីលក់ថ្នាំបំបាត់ការឈឺចាប់ដែលមានសារធាតុអូពីអយ បើទោះជាដឹងថាមានហានិភ័យនៃការកើតមានការញៀននឹងសារធាតុនេះក្តី។
ភាពលើសកម្រិតពីថ្នាំបំបាត់ការឈឺចាប់តាមវេជ្ជបញ្ជា និងហេរ៉ូអ៊ីន ដែលជាថ្នាំខុសច្បាប់ចុងក្រោយមួយសម្រាប់សារធាតុញៀនអូពីអយ បានផ្ទុះឡើងក្នុងរយៈពេលជាង ២០ ឆ្នាំចុងក្រោយនេះ។ នេះបើយោងតាមវិទ្យាស្ថានជាតិទទួលបន្ទុកការញៀនថ្នាំ។
មនុស្សប្រហែល ៤ សែននាក់ បានស្លាប់ពីការប្រើថ្នាំលើសកម្រិតដែលពាក់ព័ន្ធនឹងការចេញវេជ្ជបញ្ជា ឬសារធាតុអូពីអយខុសច្បាប់។ នេះបើយោងតាមមជ្ឈមណ្ឌលគ្រប់គ្រង និងបង្ការជំងឺ (CDC)។
តារាចម្រៀងប៉ុប Prince ដ៏ល្បី និងតារាចម្រៀងរ៉ុក Tom Petty គឺជាជនរងគ្រោះពីការរីករាលដាលសារធាតុញៀននេះ៕ AFP/KC
Subscribe to:
Post Comments
(
Atom
)
No comments :
Post a Comment