ក្រុងហ្សាការតា: កោះល្មូននាគកូម៉ូដុ នៅឥណ្ឌូនេស៊ីនឹងត្រូវបិទលែងទទួលភ្ញៀវចាប់ពីឆ្នាំក្រោយ ដោយសារមានចោរលួចសត្វត្រកួតយក្សទាំងនេះ។ នេះបើយោងតាមសេចក្ដីប្រកាសរបស់រដ្ឋាភិបាល។
វិធានការនេះត្រូវបានធ្វើឡើងក្រោយពីប៉ូលិសរកឃើញក្រុមជួញដូរសត្វនាគកូម៉ូដុចំនួន ៤១ ក្បាលឆ្លងដែនក្នុងតម្លៃ ៣៥ ០០០ ដុល្លារ ១ ក្បាល។ ការបិទទេសចរណ៍តំបន់នេះនឹងទុកឱកាសឲ្យរដ្ឋាភិបាលបង្កើនកិច្ចខិតខំប្រឹងប្រែងអភិរក្សរួមទាំងការរក្សាដែនជម្រកដោយការដាំរុក្ខជាតិបន្ថែមទៀតលើកោះ។
អាជ្ញាធរឥណ្ឌូនេស៊ីបានចាប់ខ្លួនមេជួញដូរសត្វកូម៉ូដុម្នាក់ទៀតកាលពីខែមុន ដែលរូបគេបានដាក់លក់សត្វកម្រ ៥ ក្បាលលើទំព័រហ្វេសប៊ុក។ នាគកូម៉ូដុ ឬត្រកួតត្រូវបានលក់គួបជាមួយសត្វដទៃទៀតរួមមាន ឆ្មាខ្លាឃ្មុំ សេកអូស្ដ្រាលី និងមាន់ទោរ កាសូវ៉ារី។
ដែនដីព្រៃត្រូពិកដ៏ក្រាស់ឃ្មឹកលើប្រជុំកោះធំបំផុតនៅតំបន់អាស៊ីអាគ្នេយ៍បានបង្កើតជាជីវចម្រុះកម្រិតខ្ពស់បំផុតក្នុងពិភពលោក ហើយវាបានក្លាយជាធនធានសំខាន់ និងជាចំណុចជួញដូរសត្វផងដែរ។
អ្នកជួញដូរ ៥ នាក់ដែលបង្ហាញតែឈ្មោះអក្សរផ្ដើមត្រូវបានចាប់ខ្លួននៅក្រុងសេម៉ារ៉ាង និងស៊ូរ៉ាបាយ៉ា លើដែនកោះជ្វាកាលពីថ្ងៃទី ២៧ ខែមីនា។
ល្មូននាគកូម៉ូដុមួយក្បាលមានតម្លៃ ៣៥០០០ ដុល្លារ។ រូបថត AFP
អ្នកនាំពាក្យប៉ូលិសកោះជ្វាខាងកើត ហ្វ្រាន់ បារុង ម៉ានហ្គេរ៉ា បានឲ្យដឹងក្នុងសេចក្ដីថ្លែងការណ៍មួយថា៖ «ជនសង្ស័យ VS បានលក់នាគកូម៉ូដុ តាមអនឡាញលើបណ្ដាញសង្គមហ្វេសប៊ុក»។
ម៉ានហ្គេរ៉ា បានបន្ដថាកូនល្មូននាគកូម៉ូដុ ដែលអាចប្រទះឃើញនៅជម្រកធម្មជាតិលើប្រជុំកោះឥណ្ឌូនេស៊ីទាំងនោះត្រូវបានលក់ក្នុងតម្លៃ ១៥ ទៅ ២០ លានរូព្យា (១០០០ ទៅ ១៤០០ ដុល្លារ)។
ការលួចសត្វនាគកូម៉ូដុបានកើតឡើងតែ ១ ថ្ងៃក្រោយពីអាជ្ញាធររឹបអូសអណ្ដើកច្រមុះជ្រូកដ៏កម្រជាង ៥០០០ ក្បាលពីក្រុមឈ្មួញក្នុងខេត្ដប៉ាពួ ភាគខាងកើតបំផុតនៃប្រទេសឥណ្ឌូនេស៊ី៕ HR
By www.postkhmer.com
By www.postkhmer.com
No comments :
Post a Comment