Tuesday, May 7, 2019
សង្គ្រាមពាណិជ្ជកម្មអាមេរិក-ចិន អាចផ្ទុះឡើងវិញ
ប្រធានាធិបតីអាមេរិក លោក ដូណាល់ ត្រាំ បានប្រកាសកាលពីថ្ងៃអាទិត្យថា អាមេរិកនឹងបង្កើនពន្ធនាំចូលលើទំនិញពីប្រទេស ចិន ដែលមានតម្លៃ ២០០ ពាន់លានដុល្លារ ជាការព្រមានជាថ្មីម្តងទៀតដល់ទីក្រុងប៉េកាំង។ AFP
ក្រុងវ៉ាស៊ីនតោនៈ ប្រធានាធិបតីអាមេរិក លោក ដូណាល់ ត្រាំ បានប្រកាសកាលពីថ្ងៃអាទិត្យថា អាមេរិកនឹងបង្កើនពន្ធនាំចូលលើទំនិញពីប្រទេស ចិន ដែលមានតម្លៃ ២០០ ពាន់លានដុល្លារ ជាការព្រមានជាថ្មីម្តងទៀតដល់ទីក្រុងប៉េកាំង មុនពេលជំនួបចុងក្រោយនៃការចរចារវាងភាគីទាំង ២ នឹងត្រូវធ្វើឡើងប៉ុន្មានថ្ងៃខាងមុខនេះ។
ការព្រមានជាថ្មីរបស់លោក ត្រាំ នៅពេលនេះត្រូវគេមើលឃើញថា សង្គ្រាមពាណិជ្ជកម្មរវាងមហាអំណាចទាំង ២ អាចនឹងផ្ទុះជាថ្មីឡើងវិញ។
ដើម្បីដាក់សម្ពាធលើប្រទេស ចិន ឲ្យខ្លាំងបន្ថែមទៀតឲ្យទទួលយកការទាមទាររបស់អាមេរិក លោក ត្រាំ បានគំរាមកំហែងជាថ្មីថា នឹងយកពន្ធនាំចូលលើការនាំចូលទាំងអស់របស់ចិនទៅអាមេរិក ដែលមានតម្លៃ ៥៣៩,៥ ពាន់លានដុល្លារកាលពីឆ្នាំមុន។
កាសែត The Wall Street Journal បានរាយការណ៍ដោយលើកឡើងប្រភពមួយដែលបានសង្ខេបបញ្ហានេះថា នៅពេលនេះប្រទេស ចិន កំពុងពិចារណាការលុបចោលជុំបន្ទាប់នៃការចរចា ដែលគ្រោងនឹងចាប់ផ្ដើមនៅថ្ងៃពុធ នៅទីក្រុងវ៉ាស៊ីនតោន។
កាសែតនេះបានដកស្រង់ប្រភពដោយលើកឡើងថា៖ «ប្រទេស ចិន មិនគួរចរចាដោយមានកាំភ្លើងភ្ជង់ក្បាលខ្លួននោះទេ»។ កាសែតនេះបានបន្ថែមថា ការសម្រេចចិត្តចុងក្រោយមិនទាន់ត្រូវបានធ្វើឡើងនោះទេ។
លោក ត្រាំ បានឲ្យដឹងថា លោកនឹងបង្កើនពន្ធនាំចូលមួយចំនួន ដោយសារតែការចរចាពាណិជ្ជកម្មកំពុងដំណើរ «យឺតពេក»។ លោក ត្រាំ បានសរសេរនៅលើទំព័រ Twitter ថា៖ «ក្នុងរយៈពេល ១០ ខែ ប្រទេស ចិន បានបង់ពន្ធទំនិញនាំចូលទៅអាមេរិក ចំនួន ២៥ ភាគរយទៅលើទំនិញបច្ចេកវិទ្យាខ្ពស់ ដែលមានតម្លៃ ៥០ ពាន់លានដុល្លារ និង ១០ ភាគរយ លើទំនិញផ្សេងទៀតដែលមានតម្លៃ ២០០ ពាន់លានដុល្លារ» ។
លោក ត្រាំ បានសរសេរថា៖ «១០ ភាគរយនឹងកើនឡើងដល់ ២៥ ភាគរយនៅថ្ងៃសុក្រ»។
ភាគីទាំង ២ នេះបានយកពន្ធនាំចូលលើពាណិជ្ជកម្មទ្វេភាគីដែលមានតម្លៃ ៣៦០ ពាន់លានដុល្លារចាប់តាំងពីឆ្នាំមុន។ ប៉ុន្តែលោក ត្រាំ និងលោក ស៊ី ជីនភីង បានយល់ព្រមផ្អាកបណ្តោះអាសន្នកាលពីខែធ្នូ ដើម្បីបញ្ឈប់ការកើនឡើងកាន់តែខ្លាំងបន្ថែមទៀត។
កាលពីសប្ដាហ៍មុន អាមេរិក បានពណ៌នាការចរចាពាណិជ្ជកម្មនេះថា កំពុងដំណើរការល្អប្រសើរ។ លោក ត្រាំ បានត្អូញត្អែរថា៖ «កិច្ចព្រមព្រៀងពាណិជ្ជកម្មជាមួយប្រទេស ចិន បន្ត ប៉ុន្តែយឺតពេក ដោយសារពួកគេមានបំណងក្នុងការចរចាជាថ្មី»។
លោក ត្រាំ ឲ្យដឹងថា លោកចង់កាត់បន្ថយឱនភាពពាណិជ្ជកម្មដ៏ធំរបស់អាមេរិក ជាមួយប្រទេស ចិន ដែលកាលពីឆ្នាំ ២០១៨ មានចំនួនសរុប ៣៧៨,៧៣ ពាន់លានដុល្លារ ដោយរួមទាំងពាណិជ្ជកម្មខាងសេវាផងដែរ។
ក្រៅពីការបើកចំហកាន់តែធំនៃទីផ្សារចិនដល់ទំនិញអាមេរិក លោក ត្រាំ កំពុងដាក់សម្ពាធឲ្យទីក្រុងប៉េកាំងផ្លាស់ប្តូររចនាសម្ព័ន្ធ ដូចជាត្រូវបញ្ចប់ការអនុវត្តដោយបង្ខំឲ្យក្រុមហ៊ុនអាមេរិកដែលប្រតិបត្តិការនៅក្នុងប្រទេស ចិន ត្រូវចែករំលែកបច្ចេកវិទ្យារបស់ខ្លួនជាដើម។ លោក ត្រាំ ក៏កំពុងទាមទារឲ្យចិនបញ្ឈប់ការលួចកម្មសិទ្ធិបញ្ញា និងការឧបត្ថម្ភធនដល់ក្រុមហ៊ុនដែលគ្រប់គ្រងដោយរដ្ឋផងដែរ។
លោកប្រធានាធិបតីអាមេរិករូបនេះ បានបញ្ជាក់នៅក្នុងនីតិវិធីនេះថា លោកនឹងមិនទទួលយកកិច្ចព្រមព្រៀងពាណិជ្ជកម្មដ៏ទន់ខ្សោយនោះទេ ហើយរដ្ឋការរបស់លោក បានព្រមាននៅពេលថ្មីៗថា ការចរចាពាណិជ្ជកម្មមិនអាចបន្តទៅមុខរហូតដោយងាយស្រួលនោះទេ។
ប្រសិនបើការចរចាជុំបន្ទាប់កើតឡើង គេនឹងអាចមើលឃើញថា វាជាកិច្ចព្រមព្រៀងពាណិជ្ជកម្មជាប្រវត្តិសាស្ត្ររវាងលោកត្រាំ និងលោកប្រធានាធិបតី ស៊ី ជីនភីង បើមិនអ៊ីចឹងទេ សង្គ្រាមពាណិជ្ជកម្មអាចចាប់ផ្ដើមបន្តទៀត និងកាន់តែអាក្រក់ខ្លាំងឡើងៗ។
ពេលនេះរដ្ឋការលោក ត្រាំ បញ្ជាក់ថា សង្គ្រាមពាណិជ្ជកម្មមិនបានធ្វើឲ្យសេដ្ឋកិច្ចរបស់អាមេរិកខូចខាតនោះទេ មិនដូចសេដ្ឋកិច្ចចិន ដែលកាលពីឆ្នាំមុន បានបង្ហាញកំណើនយឺតបំផុតរបស់ខ្លួនក្នុងរយៈពេលជិត ២០ ឆ្នាំនោះទេ។
លោក ត្រាំ បញ្ជាក់ថា មកដល់ពេលនេះ ពន្ធនាំចូលដែលលោកបានយកលើទំនិញរបស់ចិន «បានរួមចំណែកមួយផ្នែក» សម្រាប់សេដ្ឋកិច្ចអាមេរិកដ៏រឹងមាំដែលកាលពីត្រីមាសទី១ បានកើនឡើងក្នុងអត្រាប្រចាំឆ្នាំ ៣,២ ភាគរយ។ ប៉ុន្តែក្រុមសេដ្ឋវិទូបារម្ភអំពីផលប៉ះពាល់រយៈពេលវែងលើសេដ្ឋកិច្ចអាមេរិក។
លោក Liu He ឧបនាយករដ្ឋមន្ដ្រីដែលជាអ្នកចរចានាំមុខគេរបស់ប្រទេស ចិន និងសហការីរបស់លោករំពឹងថា នឹងមកដល់ទីក្រុងវ៉ាស៊ីនតោននៅថ្ងៃពុធ ប្រសិនបើការចរចាបន្តដំណើរការ៕ AFP/LA
Subscribe to:
Post Comments
(
Atom
)
No comments :
Post a Comment