Tuesday, May 7, 2019
Boeing ដឹងពីបញ្ហាសុវត្ថិភាព ១ ឆ្នាំ មុនគ្រោះថ្នាក់
ក្រុងវ៉ាស៊ីនតោនៈ ក្រុមហ៊ុន Boeing បានឲ្យដឹងកាលពីថ្ងៃអាទិត្យថា ក្រុមវិស្វកររបស់ខ្លួនបានរកឃើញកំហុសមួយជាមួយនឹងប្រព័ន្ធព្រមានអ្នកបើកបរនៅលើយន្តហោះ 737 MAX កាលពីឆ្នាំ ២០១៧ ពោលគឺ ១ ឆ្នាំមុនពេលមានការធ្លាក់យន្តហោះរបស់ក្រុមហ៊ុន Lion Air ដែលបណ្ដាលឲ្យមនុស្សស្លាប់។
ក្រុមហ៊ុន Boeing ឲ្យដឹងថា ថ្នាក់គ្រប់គ្រងរបស់ក្រុមហ៊ុនមិនបានដឹងពីបញ្ហានេះទេ រហូតដល់មានការធ្លាក់យន្តហោះនៅឥណ្ឌូនេស៊ី ដែលបានសម្លាប់មនុស្ស ១៨៩ នាក់ ហើយយន្តហោះជាច្រើនមិនត្រូវបានហាមឃាត់ហោះហើរថែមទៀតផងរហូតទាល់តែមានការធ្លាក់យន្តហោះប្រភេទនេះមួយផ្សេងទៀត ដែលប្រតិបត្តិការដោយក្រុមហ៊ុនអាកាសចរណ៍ Ethiopian Airlines កាលពីខែមីនា ដែលបណ្ដាលឲ្យមនុស្ស ១៥៧ នាក់ស្លាប់។
យោងតាមក្រុមហ៊ុន Boeing បានឲ្យដឹងថា ប្រហែលជាមានបំណែកឧបករណ៍ស្ដង់ដារមួយមិនបានដំណើរការត្រឹមត្រូវ។ ក្រុមហ៊ុនបានឲ្យដឹងទៀតថា ឧបករណ៍នោះមានតួនាទីប្រាប់អ្នកបើកបរអំពីភាពមិនចុះសម្រុងគ្នារវាងឧបករណ៍ចង្អុលបង្ហាញពីមុមវាយប្រហារ (AOA Disagree) ដែលវាស់វែងមុមរបស់យន្តហោះធៀបនឹងកម្លាំងខ្យល់ដែលបក់មកដល់ ដើម្បីព្រមានពីការរលត់ម៉ាស៊ីនដែលនឹងកើតមាន។
ក្រុមហ៊ុនបន្ថែមថា ដើម្បីឲ្យបំណែកឧបករណ៍នោះដំណើរការបានត្រឹមត្រូវវិញ ក្រុមហ៊ុនអាកាសចរណ៍ត្រូវទិញឧបករណ៍ចង្អុលបង្ហាញជម្រើសបន្ថែមមួយទៀតយកមកប្រើប្រាស់។
បញ្ហានោះបានបណ្ដាលឲ្យក្រុមហ៊ុនអាកាសចរណ៍ជាច្រើន ដែលមិនបានទិញឧបករណ៍ជម្រើសនេះ ដែលរួមមានទាំងក្រុមហ៊ុន Lion Air និងក្រុមហ៊ុន Ethiopian Airlines គ្មានលក្ខណពិសេសផ្នែកសុវត្ថិភាព។
ឧបករណ៍បង្ហាញពីមុមវាយប្រហារដែលមិនត្រឹមត្រូវ ប្រហែលជាអាចដើរតួនាទីមួយក្នុងការបង្កឲ្យធ្លាក់យន្តហោះដែលបណ្ដាលឲ្យមនុស្សស្លាប់ទាំង ២ នេះ ដែលបណ្ដាលឲ្យប្រព័ន្ធប្រឆាំងការរលត់ម៉ាស៊ីនរបស់យន្តហោះ 737 MAX មិនដំណើរការដោយយល់ថាមិនមានភាពចាំបាច់ និងជំរុញឲ្យយន្តហោះដាំក្បាលចុះក្រោម បើទោះបីជាក្រុមអ្នកបើកបរបានតស៊ូរក្សារយៈកម្ពស់ហោះហើរក៏ដោយ។
ក្រុមហ៊ុនផលិតយន្តហោះមួយនេះបានឲ្យដឹងក្នុងសេចក្ដីប្រកាសព័ត៌មានមួយថា៖ «កាលពីឆ្នាំ ២០១៧ ក្នុងរយៈពេលជាច្រើនខែបន្ទាប់ពីចាប់ផ្ដើមការចែកចាយយន្តហោះ 737 MAX ក្រុមវិស្វករក្នុងក្រុមហ៊ុន Boeing បានរកឃើញថា សូហ្វវែរប្រព័ន្ធបង្ហាញរបស់យន្តហោះ 737 MAX មិនបានឆ្លើយតបត្រឹមត្រូវទៅនឹងលក្ខខណ្ឌតម្រូវប្រកាសអាសន្ន AOA Disagree»៕ AFP/LA
Subscribe to:
Post Comments
(
Atom
)
No comments :
Post a Comment