Thursday, May 30, 2019
អាមេរិកដាក់ប្រទេសអាស៊ាន ៣ ក្នុងបញ្ជីឃ្លាំមើល
 |
| អតិថិជនកំពុងរាប់ប្រាក់ដុល្លារសិង្ហបុរី បន្ទាប់ពីដកចេញពីម៉ាស៊ីនអេធីអឹម។ |
ក្រុងវ៉ាស៊ីនតោនៈ ក្រសួងហិរញ្ញវត្ថុអាមេរិកបានដាក់បញ្ចូលប្រទេស សិង្ហបុរី ម៉ាឡេស៊ី និងវៀតណាម ទៅក្នុងបញ្ជីឃ្លាំមើលការគ្រប់គ្រងរូបិយប័ណ្ណ (currency manipulation) ដោយដាក់គោលនយោបាយអត្រាប្តូរប្រាក់របស់ប្រទេសទាំងនោះស្ថិតក្រោមការឃ្លាំមើល។ នេះបើយោងតាមទីភ្នាក់ងារព័ត៌មាន Bloomberg។
Bloomberg បានរាយការណ៍ដោយដកស្រង់សម្ដីក្រសួងហិរញ្ញវត្ថុអាមេរិកថា សិង្ហបុរីត្រូវបានដាក់បញ្ចូលក្នុងបញ្ជីនេះដោយសារអតិរេកគណនីចរន្តដ៏ច្រើនរបស់ប្រទេសនេះ និងការទិញរូបិយប័ណ្ណបរទេសសុទ្ធដែលមានយ៉ាងហោចណាស់ ១៧ ពាន់លានដុល្លារ ក្នុងឆ្នាំ ២០១៨ ដែលស្មើនឹង ៤,៦ ភាគរយ នៃផលិតផលក្នុងស្រុកសរុប។
ចំណែកឯការដាក់បញ្ចូលម៉ាឡេស៊ី និងវៀតណាមទៅក្នុងបញ្ជីនេះដោយសារត្រូវបានលើកឡើងថា ដោយសារអតិរេកពាណិជ្ជកម្មទ្វេភាគី និងអតិរេកគណនីចរន្តរបស់ប្រទេសទាំង ២។
ប្រទេសដែលមានអតិរេកគណនីចរន្តជាមួយអាមេរិក ស្មើនឹង ២ ភាគរយនៃ ផ.ស.ស ត្រូវបានដាក់បញ្ចូលទៅក្នុងបញ្ជីនេះ ដែលធ្លាក់ចុះពី ៣ ភាគរយ។ កម្រិតកំណត់ផ្សេងទៀតរួមមាន ការធ្វើអន្តរាគមន៍ដែលកើតមានជាយូរក្នុងទីផ្សាររូបិយប័ណ្ណរបស់ប្រទេសមួយ និងអតិរេកពាណិជ្ជកម្មដែលមានយ៉ាងហោចណាស់ ២០ ពាន់លានដុល្លារ។ ប្រទេសដែលឆ្លើយតបទៅនឹងលក្ខណវិនិច្ឆ័យចំនួន ២ ក្នុងចំណោមលក្ខណវិនិច្ឆ័យទាំង ៣ នេះ ត្រូវបានដាក់បញ្ចូលទៅក្នុងបញ្ជីឃ្លាំមើលនេះ។
ការដែលត្រូវបានហៅថាជាអ្នកគ្រប់គ្រងរូបិយប័ណ្ណ មិនមែនបណ្តាលឲ្យមានការដាក់ពិន័យភ្លាមៗទេ ប៉ុន្តែអាចធ្វើឲ្យរង្គោះរង្គើដល់ទីផ្សារហិរញ្ញវត្ថុ។
Bloomberg បានឲ្យដឹងទៀតថា ក្រសួងហិរញ្ញវត្ថុអាមេរិកបានឲ្យដឹងថា សិង្ហបុរីគួរអនុវត្តកំណែទម្រង់ដែលនឹងជួយឲ្យបន្ទាបអត្រាការប្រាក់សន្សំខ្ពស់របស់ខ្លួន និងបង្កើនការប្រើប្រាស់ក្នុងស្រុកដែលមានកម្រិតទាប ខណៈព្យាយាមធានាថា អត្រាប្តូរប្រាក់ពិតរបស់ប្រទេសនេះមានភាពស្របគ្នាទៅនឹងមូលដ្ឋានសេដ្ឋកិច្ច ដើម្បីជួយធ្វើឲ្យរួមតូចជាងមុននូវអតិរេកខាងក្រៅដែលមានទំហំធំ និងកើតមានជាយូររបស់ខ្លួន។
ធនាគារកណ្តាលសិង្ហបុរីបានឲ្យដឹងក្នុងសេចក្តីថ្លែងការណ៍មួយថា៖ «ខ្លួនមិនបានគ្រប់គ្រងរូបិយប័ណ្ណរបស់ខ្លួន ដើម្បីអត្ថប្រយោជន៍នាំចេញឡើយ»។ ធនាគារនេះបានឲ្យដឹងទៀតថា អាជ្ញាធររូបិយវត្ថុសិង្ហបុរីដែលជាធនាគារកណ្តាលរបស់ប្រទេសនេះ ប្រើប្រាស់អត្រាប្តូរប្រាក់ដើម្បីធានាបានស្ថិរភាពថ្លៃ និងមិនអាចប្រើប្រាស់អត្រាប្តូរប្រាក់នេះ ដើម្បីទទួលបានអត្ថប្រយោជន៍ផ្នែកនាំចេញ ឬដើម្បីសម្រេចបានអតិរេកគណនីចរន្តទេ។
ម៉ាឡេស៊ីត្រូវបានលើកឡើងថា មានអតិរេកពាណិជ្ជកម្មទ្វេភាគចំនួន ២៧ ពាន់លានដុល្លារជាមួយអាមេរិកកាលពីឆ្នាំមុន ហើយអតិរេកគណនីចរន្តមាន ២,១ ភាគរយ នៃ ផ.ស.ស៕ KC
Subscribe to:
Post Comments
(
Atom
)
No comments :
Post a Comment