Thursday, May 30, 2019
ក្រុមហ៊ុនអាកាសចរណ៍ចិនចំនួន ១៣ ទាមទារសំណងពី Boeing
យន្តហោះ 737 Max របស់ក្រុមហ៊ុន Boeing។ |
ក្រុងប៉េកាំងៈ ក្រុមហ៊ុនអាកាសចរណ៍របស់ប្រទេស ចិន ចំនួន ១៣ កំពុងស្វែងរកសំណងពីក្រុមហ៊ុនផលិតយន្តហោះ Boeing ដោយសារតែការចតចោលយន្តហោះ 737 Max របស់ខ្លួន និងពន្យារពេលការចែកចាយយន្តហោះ 737 MAX។
យន្តហោះ Boeing 737 Max របស់ក្រុមហ៊ុន Boeing ត្រូវបានចតទុកចោលជុំវិញពិភពលោកកាលពីខែមីនាដើមឆ្នាំនេះ បន្ទាប់ពីមានការធ្លាក់យន្តហោះដែលបណ្ដាលឲ្យមនុស្សស្លាប់ ២ លើក នៅក្នុងប្រទេស ឥណ្ឌូនេស៊ី និងប្រទេស អេត្យូពី។
ក្រុមហ៊ុនអាកាសចរណ៍ដឹកអ្នកដំណើរ 9Air ដែលមានមូលដ្ឋាននៅទីក្រុងក្វាងចូវ ខេត្តក្វាងទុង ប្រទេស ចិន ត្រូវបានរាយការណ៍កាលពីថ្ងៃសុក្រសប្តាហ៍៍មុនថា នឹងចូលរួមជាមួយក្រុមហ៊ុនអាកាសចរណ៍របស់ប្រទេស ចិន ចំនួន ១២ ផ្សេងទៀត ដើម្បីស្វែងរកសំណងពីក្រុមហ៊ុន Boeing។
បច្ចុប្បន្នក្រុមហ៊ុនអាកាសចរណ៍ទាំងអស់របស់ប្រទេស ចិន ដែលប្រតិបត្តិការយន្តហោះ 737 Max-8 បានដាក់ពាក្យបណ្ដឹងប្រឆាំងនឹងក្រុមហ៊ុនផលិតយន្តហោះរបស់សហរដ្ឋអាមេរិកមួយនេះ។
ទន្ទឹមនឹងនេះ សមាគមដឹកជញ្ជូនផ្លូវអាកាសរបស់ប្រទេស ចិន (CATA) បានឲ្យដឹងកាលពីថ្ងៃសុក្រថា ក្រុមហ៊ុនអាកាសចរណ៍របស់ប្រទេស ចិន ទាំងនេះ អាចខាតបង់ ៤ ពាន់លានយន់ (៥៨០ លានដុល្លារអាមេរិក) ប្រសិនបើការផ្អាកហោះហើរយន្តហោះ 737 Max នេះ មានរយៈពេលរហូតដល់ខែមិថុនា ហើយការខាតបង់នេះនឹងបន្តកើនឡើង ប្រសិនបើការហាមឃាត់នេះមានរយៈពេលហួសពីពេលនេះ។
CATA បានឲ្យដឹងថា ខ្លួននឹងគាំទ្រ និងជួយដល់ក្រុមហ៊ុនអាកាសចរណ៍ជាសមាជិករបស់ខ្លួន ក្នុងការទាមទារសំណងពីក្រុមហ៊ុន Boeing។
ប្រទេស ចិន គឺជាប្រទេសប្រើប្រាស់យន្តហោះ 737 Max-8 របស់ក្រុមហ៊ុន Boeing ច្រើនជាងគេ ដោយយន្តហោះ Boeing MAX-8 ចំនួន ៩៦ គ្រឿងស្ថិតក្នុងដំណើរការផ្តល់សេវាហោះហើរក្នុងប្រទេសនេះ។
ប្រទេស ចិន គឺជាប្រទេសទី១ ដែលបានផ្អាកប្រតិបត្តិការពាណិជ្ជកម្មយន្តហោះ Boeing 737 Max-8 ទាំងអស់ បន្ទាប់ពីការធ្លាក់យន្តហោះរបស់ក្រុមហ៊ុនអាកាសចរណ៍ Ethiopian Airlines កាលពីខែមីនា ដែលបានសម្លាប់មនុស្សនៅលើយន្តហោះទាំងអស់ចំនួន ១៥៧ នាក់។
កាលពីខែតុលា ឆ្នាំមុន យន្តហោះ 737 MAX-8 បានធ្លាក់នៅទីក្រុងហ្សាការតាប្រទេស ឥណ្ឌូនេស៊ី លើជើងហោះហើរក្នុងស្រុកមួយ ដែលធ្វើឲ្យមនុស្សលើយន្តហោះទាំងអស់ ១៨៩ នាក់បានស្លាប់ ៕ People's Daily/LA
Subscribe to:
Post Comments
(
Atom
)
No comments :
Post a Comment