Thursday, May 30, 2019
Alibaba សម្លឹងចុះបញ្ជីនៅផ្សារហ៊ុនហុងកុង
 |
| លោក Jack Ma ប្រធានក្រុមហ៊ុន Alibaba។ |
ក្រុងស៊ាងហៃៈ ក្រុមហ៊ុនពាណិជ្ជកម្មអេឡិចត្រូនិក Alibaba Group របស់ប្រទេស ចិន កំពុងស្វែងរកការចុះបញ្ជីបោះផ្សាយភាគហ៊ុនលើកទី២ ក្នុងទីក្រុងហុងកុង ដែលអាចប្រមូលប្រាក់ចំនួន ២០ ពាន់លានដុល្លារ ខណៈដែលទីក្រុងប៉េកាំងព្យាយាមលើកទឹកចិត្តឲ្យក្រុមហ៊ុនបច្ចេកវិទ្យាធំៗរបស់ខ្លួនចុះបញ្ជីក្នុងទីផ្សារនៅប្រទេសកំណើតរបស់ខ្លួន។ នេះបើយោងតាមសេចក្តីរាយការណ៍មួយកាលពីថ្ងៃអង្គារ។
ទីភ្នាក់ងារព័ត៌មាន Bloomberg News បានរាយការណ៍ដោយដកស្រង់ប្រភពដែលបានដឹងពីផែនការនេះថា ក្រុមហ៊ុន Alibaba ដែលចុះបញ្ជីនៅសហរដ្ឋអាមេរិក មានគោលបំណងដាក់ពាក្យស្នើសុំចុះបញ្ជីនៅក្នុងទីក្រុងហុងកុងនៅឆមាសទី២ ក្នុងឆ្នាំ ២០១៩ នេះ។
ការចុះបញ្ជីនឹងត្រូវធ្វើឡើងក្នុងគោលបំណងបើកចំហបណ្តាញមូលនិធិថ្មីៗសម្រាប់ក្រុមហ៊ុន Alibaba ដែលការចុះបញ្ជីក្នុងផ្សារហ៊ុនក្រុងញូវយ៉កកាលពីឆ្នាំ ២០១៤ បានប្រមូលនិធិចំនួន ២៥ ពាន់លានដុល្លារ ក្នុងការបោះផ្សាយមូលបត្រជាសាធារណៈលើកដំបូងដែលធំបំផុតក្នុងពិភពលោក។
អ្នកនាំពាក្យរបស់ក្រុមហ៊ុន Alibaba បានបដិសេធអត្ថាធិប្បាយមកកាន់ទីភ្នាក់ងារព័ត៌មាន AFP ដោយបាននិយាយថា ក្រុមហ៊ុនមិនឆ្លើយតបទៅកាន់ «ពាក្យចចាមអារ៉ាមពីទីផ្សារ» ឡើយ។
ប្រទេស ចិន បានព្យាយាមលើកទឹកចិត្តក្រុមហ៊ុនបច្ចេកវិទ្យាធំៗនាពេលបច្ចុប្បន្ន និងអនាគតរបស់ប្រទេសខ្លួនឲ្យចុះបញ្ជីនៅក្នុងទីផ្សារនៅជិតៗប្រទេសកំណើត រួមទាំងតាមរយៈការចុះបញ្ជីក្នុងផ្សារហ៊ុនបច្ចេកវិទ្យាដែលគ្រោងបង្កើតឡើងមួយក្នុងទីក្រុងស៊ាងហៃ ដែលនឹងជាផ្សារហ៊ុនមួយឆ្លើយតបទៅកាន់ផ្សារហ៊ុន Nasdaq របស់អាមេរិក ។
ព័ត៌មាននេះ កើតមានឡើងក្នុងគ្រាដែលប្រទេស ចិន និងសហរដ្ឋអាមេរិកបានជាប់គាំងក្នុងជម្លោះពាណិជ្ជកម្មដែលកំពុងឡើងកម្តៅមួយ ដែលទីក្រុងវ៉ាស៊ីនតោនបានហាមឃាត់ក្រុមហ៊ុនអាមេរិកមិនឲ្យផ្គត់ផ្គង់បច្ចេកវិទ្យាទៅឲ្យក្រុមហ៊ុនបច្ចេកវិទ្យាទូរគមនាគមន៍ និងផលិតទូរស័ព្ទ Huawei របស់ចិន ៕ AFP/KC
Subscribe to:
Post Comments
(
Atom
)
No comments :
Post a Comment