ក្រុងឡូសអេនជឺលេស: ភ្ញៀវទេសចរជាច្រើននាំគ្នាមកទស្សនាផ្កាព្រៃរីកស្គុសស្គាយគ្របដណ្ដប់វាលព្រៃជុំវិញបឹងជ្រលងពេជ្រ (Diamond Valley Lake) ក្បែរទីក្រុងហេម៉េត រដ្ឋកាលីហ្វ័រនីញ៉ា។
រយៈពេលប៉ុន្មានចុងសប្ដាហ៍ចុងក្រោយនេះមនុស្សរាប់ពាន់នាក់បានមកប្រមូលផ្ដុំគ្នាលើដីព្រៃនេះ ចម្ងាយប្រមាណ ១៤៥ គីឡូម៉ែត្រភាគអាគ្នេយ៍ក្រុងឡូសអេនជឺលេស ដើម្បីទទួលបាននូវបទពិសោធគយគន់ទស្សនីយភាពផ្កាព្រៃពណ៌លឿង ទឹកក្រូច ស ស្វាយ និងខៀវដ៏ស្រស់ស្អាតដែលបង្កឲ្យមានការកកស្ទះចរាចរណ៍ និងសេវាកម្មដ៏មមាញឹក។
ការធ្វើដំណើររយៈពេល ៥ ម៉ោងពីទីក្រុងសានហ្វ្រានស៊ីស្កូ វិមានជាតិខារីហ្ស៊ូ ប្លែន ភាគអាគ្នេយ៍តំបន់សាន់ល្វីស អូប៊ស្ពូ រំលេចនូវទស្សនីយភាពផ្កាព្រៃដ៏ស្រស់បំព្រង និងជាតំបន់ដ៏ងាយស្រួលបំផុតសម្រាប់ពលរដ្ឋ បេអ៊ែររៀ បានឃើញនូវអ្វីដែលហៅថា «ផ្ការីកមហាស្គុសស្គាយ»។
ភ្ញៀវទេសចរជាច្រើនពាន់នាក់នាំគ្នាជិះរថយន្តរាប់ម៉ោងមកមើលផ្កា។ រូបថត AFP
ឧទ្យានលាតសន្ធឹងជិត ១០ ម៉ឺនហិកតា និងនៅក្បែរជើងភ្នំនៃជួរភ្នំ Temblor Range រំលេចនូវទេសភាពចម្រុះពណ៌ និងផ្ការីកស្គុសស្គាយរួមទាំង ផ្កាកណ្ដឹង ផ្កាអង្គាសីលទឹកក្រូច និងភ្នែកខៀវទារកជាដើម។
នេះជាទីកន្លែងគន់បុប្ផាព្រៃដ៏ល្អបំផុតដែលវិមានជាតិត្រូវបានបង្កើតឡើងក្នុងឆ្នាំ ២០១៧ នៅពេលមនុស្សជាង ៨ ម៉ឺននាក់នាំគ្នាមកលេងជើងភ្នំ និងវាលផ្កាឆ្ងាយដាច់កន្ទុយភ្នែក។
ក្រុមអ្នកជំនាញបាននិយាយថាទស្សនីយភាពនាឆ្នាំនេះ មិនអស្ចារ្យដូចកាលពី ២ ឆ្នាំមុនឡើយ តែរូបភាពដ៏ស្រស់ត្រកាលនេះនៅតែជក់ចិត្ដ។ ក្រោយពីរដូវរងារដែលកើតឡើងក្រោយមានព្យុះភ្លៀងសន្ធាប់ បុប្ផាផ្កាព្រៃរីកស្គុសស្គាយគ្របដណ្ដប់ដែនដីកាលីហ្វ័រនីញ៉ាភាគខាងត្បូង។
នេះបើយោងតាមអង្គការអភិរក្សធម្មជាតិ (Nature Conservancy) វាជាវាលស្មៅដ៏ធំធេងតែមួយគត់ដែលនៅសេសសល់ក្នុងរដ្ឋកាលីហ្វ័រនីញ៉ា និងតភ្ជាប់ជាមួយតំបន់ San Andreas Fault៕ HR
By www.postkhmer.com
By www.postkhmer.com
No comments :
Post a Comment