Wednesday, May 29, 2019
ចំណូលរបស់ក្រុមហ៊ុន ហ្រ្គេនធ្វីន នៅត្រីមាសទី១ កើនឡើងជិត ៦០ ភាគរយ
ក្រុមហ៊ុនរោងចក្រកាត់ដេរសម្លៀកបំពាក់ហ្រ្គេនធ្វីន របស់តៃវ៉ាន់។ |
ភ្នំពេញៈ ក្រុមហ៊ុនរោងចក្រកាត់ដេរសម្លៀកបំពាក់ហ្រ្គេនធ្វីន របស់តៃវ៉ាន់ ដែលចុះបញ្ជីក្នុងផ្សារហ៊ុនកម្ពុជារកចំណូលបានជាង ៣៦,៨០ លានដុល្លារ នៅត្រីមាសទី១ ឆ្នាំ ២០១៩ កើនឡើង ៥៨ ភាគរយ ពីចំនួន ២៣,៣០ លានដុល្លារ ធៀបនឹងរយៈពេលដូចគ្នាកាលពីឆ្នាំទៅ។ នេះបើយោងតាមរបាយការណ៍ហិរញ្ញវត្ថុមិនទាន់ធ្វើសវនកម្មរបស់ក្រុមហ៊ុនដែលបានបង្ហាញនៅផ្សារហ៊ុនកម្ពុជាកាលពីថ្ងៃម្សិលមិញ។
ទោះបីយ៉ាងនេះក្តីរបាយការណ៍បានបង្ហាញថា ប្រាក់ចំណេញមុនបង់ពន្ធបានធ្លាក់ចុះមកនៅត្រឹម ២១៥ ៤៦៥ ដុល្លារដែលធ្លាក់ចុះពីចំនួន ជាង ១,២ លានដុល្លារ កាលពីត្រីមាសទី១ឆ្នាំ ២០១៨។
លោក យ៉ាង សាវស៊ីន ប្រធានក្រុមប្រឹក្សាភិបាលរបស់ក្រុមហ៊ុន បានលើកឡើងនៅក្នុងសេចក្តីថ្លែងការណ៍ផ្ញើទៅកាន់ផ្សារហ៊ុន ថា ក្រុមហ៊ុននៅតែខិតខំប្រឹងប្រែងរក្សាទំនាក់ទំនងជាមួយអតិថិជន ជាពិសេសក្រុមហ៊ុន Adidas ដែលជាអតិថិជនចម្បងរបស់ក្រុមហ៊ុន ដើម្បីបង្កើនការបញ្ជាទិញសម្រាប់ឆ្នាំ ២០១៩។
លោកបន្តថា៖ «[ក្រុមហ៊ុន] នឹងព្យាយាមក្នុងការសហការជាមួយដៃគូនានាដើម្បីទទួលបានចំណូលផ្សេងៗបន្ថែមទៀត ដូចជាការទទួលកាត់ដេរបន្ត និងការវេចខ្ចប់ ដើម្បីរក្សាស្ថិរភាព និងបង្កើនចំណូលឲ្យបានច្រើនជាងបណ្តាឆ្នាំកន្លងទៅ»។
តាមរបាយការណ៍ ក្រុមហ៊ុនរំពឹងថានៅត្រីមាសបន្ទាប់នឹងទទួលបានប្រាក់ចំណេញល្អជាងត្រីមាសទី១។
ទោះបីយ៉ាងនេះក៏ដោយ ក្រុមហ៊ុនបានអះអាងថា ការរំពឹងទុកពីការធ្លាក់ចុះកំណើនសេដ្ឋកិច្ចនៅអឺរ៉ុប និងអាមេរិកដែលជាទីផ្សារចម្បងរបស់ក្រុមហ៊ុន ក៏នឹងធ្វើឲ្យប៉ះពាល់ដល់ចំណូលរបស់ក្រុមហ៊ុផងដែរ សម្រាប់ឆ្នាំ ២០១៩ នេះ។
គិតត្រឹមថ្ងៃទី ៣១ ខែ មីនា ឆ្នាំ ២០១៩ ទ្រព្យសកម្មសរុបរបស់ក្រុមហ៊ុន ហ្រ្គេនធ្វីន មានចំនួនជាង ៨៩,៨៨ លានដុល្លារ ខណៈដែលមូលធនសរុប មានចំនួនជាង ៦៨,៥៨ លានដុល្លារ ដែលមានការធ្លាក់ចុះបន្តិច។
គិតត្រឹមថ្ងៃទី ៣១ ខែ មីនា ឆ្នាំ ២០១៩ ទ្រព្យសកម្មសរុបរបស់ក្រុមហ៊ុន ហ្រ្គេនធ្វីន មានចំនួនជាង ៨៩,៨៨ លានដុល្លារ ខណៈដែលមូលធនសរុប មានចំនួនជាង ៦៨,៥៨ លានដុល្លារ ដែលមានការធ្លាក់ចុះបន្តិច។
ភាគហ៊ុនក្រុមហ៊ុន ហ្រ្គេនធ្វីន ត្រូវបានជួញដូរក្នុងផ្សារហ៊ុនកម្ពុជាមានតម្លៃ ៤ ៣០០ រៀលក្នុង ១ ភាគហ៊ុនកាលពីថ្ងៃម្សិលមិញ ប៉ុន្តែពុំមានទំហំនៃការជួញដូរនោះទេ៕ LA
Subscribe to:
Post Comments
(
Atom
)
No comments :
Post a Comment