ក្រុងតូក្យូៈ ក្រុមហ៊ុនផលិតរថយន្ត Toyota Motor Corp. កំពុងមានផែនការសាងសង់រោងចក្រដំឡើងរថយន្តក្នុងប្រទេស មីយ៉ាន់ម៉ា។ នេះបើយោងតាមកាសែត Yomiuri Shimbun របស់ជប៉ុន។
សេចក្តីប្រកាសជាផ្លូវការអាចនឹងចេញផ្សាយមុនដំណាច់ខែឧសភានេះ ហើយការសាងសង់គ្រោងនឹងចាប់ផ្តើមក្នុងឆ្នាំ ២០១៩ នេះ។
សេចក្តីប្រកាសជាផ្លូវការអាចនឹងចេញផ្សាយមុនដំណាច់ខែឧសភានេះ ហើយការសាងសង់គ្រោងនឹងចាប់ផ្តើមក្នុងឆ្នាំ ២០១៩ នេះ។
រោងចក្រថ្មីនេះនឹងមានទីតាំងស្ថិតនៅតំបន់សេដ្ឋកិច្ចពិសេស Thilawa នៅជាយក្រុងយ៉ាំងហ្គោន ហើយនឹងប្រើប្រាស់សម្រាប់ដំឡើងរថយន្តភីកអាប់ ដែលគ្រឿងផ្គុំនឹងត្រូវនាំចូលពីប្រទេស ជប៉ុន និងប្រទេសជិតខាងផ្សេងទៀត ដើម្បីយកមកដំឡើងរថយន្តក្នុងរោងចក្រថ្មីនេះ។
បើទោះបីជាមានតែរថយន្តប្រហែល ១៧ ៥០០ គ្រឿងប៉ុណ្ណោះ ដែលត្រូវបានលក់ចេញនៅក្នុងប្រទេស មីយ៉ាន់ម៉ា ក្នុងឆ្នាំ ២០១៨ ក្តី ក៏តួលេខនេះបានកើនឡើងជាងទ្វេដងធៀបនឹងឆ្នាំ ២០១៧។ បច្ចុប្បន្ន ក្រុមហ៊ុន Toyota នាំចេញរថយន្តដឹកអ្នកដំណើរ និងរថយន្តពាណិជ្ជកម្មប្រហែល ២ ០០០ គ្រឿងទៅកាន់ប្រទេស មីយ៉ាន់ម៉ា ក្នុង ១ ឆ្នាំ ហើយក្រុមហ៊ុនមើលឃើញទីផ្សារនេះថា ជាទីផ្សារមួយដែលមានសក្តានុពលកំណើនខ្លាំង។
រដ្ឋាភិបាលមីយ៉ាន់ម៉ាបានអនុវត្តគោលនយោបាយនានាដែលផ្តល់ការលើកទឹកចិត្តផ្នែកពន្ធដល់ក្រុមហ៊ុនដែលផលិតរថយន្តក្នុងស្រុក។
ក្រុមហ៊ុនផលិតរថយន្ត Suzuki Motor Corp. គឺជាក្រុមហ៊ុនមួយក្នុងចំណោមក្រុមហ៊ុនជប៉ុនដែលចូលទៅវិនិយោគដំបូងក្នុងប្រទេសនេះ។ ក្រុមហ៊ុន Suzuki មានរោងចក្រចំនួន ២ ក្នុងនៅមីយ៉ាន់ម៉ា ដែលដំឡើងរថយន្តតូចដែលបច្ចុប្បន្នគ្រប់គ្រងទីផ្សារជាងពាក់កណ្តាល។
ក្រុមហ៊ុន Nissan Motor និងក្រុមហ៊ុន Ford Motor ស្ថិតក្នុងចំណោមក្រុមហ៊ុនផលិតរថយន្តផ្សេងទៀត ដែលមានវត្តមាននៅប្រទេស មីយ៉ាន់ម៉ា។
ក្រុមហ៊ុនផលិតរថយន្ត Toyota បានសម្រេចចិត្តសាងសង់រោងចក្រថ្មីមួយនៅមីយ៉ាន់ម៉ា ពីព្រោះក្រុមហ៊ុនរំពឹងថា ប្រទេសដែលមានប្រជាជនប្រហែល ៥០ លាននាក់នេះ នឹងមានកំណើនសេដ្ឋកិច្ចខ្លាំងតទៅមុខទៀត។ ការសម្រេចចិត្តនេះក៏ជាផ្នែកមួយនៃលទ្ធផលដែលទទួលបានពីកិច្ចប្រឹងប្រែងរបស់រដ្ឋាភិបាលមីយ៉ាន់ម៉ា ដើម្បីទាក់ទាញការវិនិយោគបរទេសផងដែរ។
ផលិតផលក្នុងស្រុកសរុបសម្រាប់មនុស្សម្នាក់របស់មីយ៉ាន់ម៉ា មានត្រឹមតែប្រហែល ១ ៣០០ ដុល្លារ។ ទោះជាយ៉ាងណា អាយុជាមធ្យមរបស់ប្រទេសនេះមានកម្រិតទាប ហើយប្រជាជនត្រូវបានរំពឹងថានឹងបន្តកើនឡើង។
មីយ៉ាន់ម៉ាមានប្រជាជនប្រហែល ៥០ លាននាក់ ដែលប្រហាក់ប្រហែលនឹងចំនួនប្រជាជនរបស់ប្រទេស កូរ៉េខាងត្បូង និងអេស្ប៉ាញ។ ប្រទេសនេះជាប្រទេសក្មេងខ្ចី ដែលប្រជាជនមានអាយុជាមធ្យម ២៧,៩ ឆ្នាំ។ បើទោះបីជាប្រទេសក្រីក្រមួយក្នុងចំណោមប្រទេសក្រីក្រក្នុងតំបន់អាស៊ីក្តី ក៏មីយ៉ាន់ម៉ាបានមើលឃើញកំណើនសេដ្ឋកិច្ចដ៏ខ្លាំងនាពេលថ្មីៗនេះ ហើយរំពឹងថានឹងលូតលាស់ក្នុងអត្រាប្រចាំឆ្នាំពី ៦ ទៅ ៧ ភាគរយ។
ក្រុមអ្នកវិភាគជឿថា មីយ៉ាន់ម៉ាមានសក្តានុពលលូតលាស់រហូតដល់កម្រិតទីផ្សារមួយដែលមានទំហំប្រហាក់ប្រហែលនឹងទំហំទីផ្សាររបស់ប្រទេស ថៃ ដែលជាប្រទេសជិតខាងនឹងគ្នា និងមានប្រជាជនប្រហែល ៦៩ លាននាក់ ដែលលក់រថយន្តបានប្រហែល ១ លានគ្រឿងក្នុង ១ ឆ្នាំ។
គិតត្រឹមខែ ធ្នូ ឆ្នាំ ២០១៨ ក្រុមហ៊ុន Toyota មានរោងចក្រផលិតរថយន្ត និងផលិតគ្រឿងផ្គុំក្នុងប្រទេស និងតំបន់ចំនួន ២៧។ រោងចក្រនៅមីយ៉ាន់ម៉ានឹងជាមូលដ្ឋានយុទ្ធសាស្រ្តថ្មីមួយ។
តំបន់សេដ្ឋកិច្ច Thilawa ដែលវិនិយោគរួមគ្នារវាងរដ្ឋ និងឯកជនមកពីជប៉ុន និងមីយ៉ាន់ម៉ា បានបើកដំណើរការនៅឆ្នាំ ២០១៥ និងត្រូវបានគេមើលឃើញថា ជាសញ្ញាជោគជ័យបំផុតនៃការអភិវឌ្ឍសេដ្ឋកិច្ចមីយ៉ាន់ម៉ា និងបានទាក់ទាញការវិនិយោគមកពីជុំវិញពិភពលោក។
ការសម្រេចចិត្តរបស់ក្រុមហ៊ុន Toyota ដើម្បីសាងសង់រោងចក្រក្នុងតំបន់សេដ្ឋកិច្ចនេះ អាចបង្ហាញថាជាការរស់ឡើងវិញនៃការវិនិយោគចូលទៅក្នុងប្រទេសនេះ៕ ANN/KC
No comments :
Post a Comment