Thursday, May 30, 2019
នាយករដ្ឋមន្ត្រីបង្ហាញសក្តានុពល ដើម្បីទាក់ទាញវិនិយោគិនជប៉ុន
លោកនាយករដ្ឋមន្ត្រី ហ៊ុន សែន ថ្លែងនៅឯសន្និសីទអន្តរជាតិលើកទី២៥ ស្ដីពីអនាគតរបស់អាស៊ី។ |
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីថ្ងៃពុធ បានថ្លែងពីសក្តានុពល និងកំណើនសេដ្ឋកិច្ចរបស់កម្ពុជា ដើម្បីទាក់ទាញវិនិយោគិនជប៉ុនកាន់តែច្រើនបន្ថែម ខណៈអ្នកវិភាគសេដ្ឋកិច្ចចាត់ទុកថាជាកិច្ចប្រឹងប្រែងគួរឲ្យកោតសរសើរ។
នៅក្នុងសុន្ទរកថា ដែលបានថ្លែងកាលថ្ងៃទី ២៩ ខែ ឧសភា ឆ្នាំ ២០១៩ ក្នុងសិក្ខាសាលាស្ដីអំពីបរិយាកាសវិនិយោគនៅកម្ពុជា ក្នុងសន្និសីទអន្តរជាតិលើកទី២៥ ស្ដីពីអនាគតអាស៊ីនៅប្រទេស ជប៉ុន លោកនាយករដ្ឋមន្ត្រី បានបង្ហាញពីសក្តានុពលវិនិយោគសំខាន់ៗមួយចំនួននៅក្នុងប្រទេស កម្ពុជា។
លោកថ្លែងថា៖ «ក្នុងសិក្ខាសាលានេះ គឺយើងនឹងបានស្វែងយល់ដោយផ្ទាល់ពីការរីកចម្រើននៃសេដ្ឋកិច្ចកម្ពុជា និងសក្ដានុពលវិនិយោគនៅកម្ពុជា ក៏ដូចជាជ្រាបពីការដាក់ចេញនូវវិធានការថ្មីៗរបស់រាជរដ្ឋាភិបាលកម្ពុជានាពេលបច្ចុប្បន្នសំដៅធ្វើឲ្យកាន់តែប្រសើរឡើងនូវបរិយាកាសវិនិយោគ»។
យោងតាមស្ថាប័នហិរញ្ញវត្ថុសំខាន់របស់ពិភពលោករួមមាន ធនាគារអភិវឌ្ឍន៍អាស៊ីបានព្យាករថា សេដ្ឋកិច្ចកម្ពុជាត្រូវបានប៉ាន់ប្រមាណថានឹងបន្តមានកំណើនក្នុងរង្វង់ជាង ៧ ភាគរយ សម្រាប់ឆ្នាំ ២០១៩។
លោកនាយករដ្ឋមន្ត្រីថ្លែងថា កំណើននេះបានធ្វើឲ្យកម្ពុជាបន្តតំណែងរបស់ខ្លួនជាប្រទេសដែលមានសេដ្ឋកិច្ចរីកចម្រើនបំផុត នៅក្នុងតំបន់អាស៊ីក្នុងរយៈពេល ៣ ឆ្នាំជាប់គ្នា។
លោកថ្លែងថា៖ «នេះបានបង្ហាញថា កម្ពុជាស្ថិតនៅលើគន្លងនៃការឈានទៅសម្រេចបានឋានៈជាប្រទេសដែលមានប្រាក់ចំណូលមធ្យមកម្រិតខ្ពស់ក្នុងឆ្នាំ ២០៣០ តាមការគ្រោងទុកក្នុងរបៀបវារៈនៃគោលនយោបាយជាតិរបស់ខ្លួន»។
ការលុបចោលពន្ធកាត់ទុក ១ ភាគរយ សម្រាប់វិស័យឯកជនត្រូវបានលោកនាយករដ្ឋមន្ត្រីចាត់ទុកថា ជាផ្នែកមួយក្នុងការទាក់ទាញវិនិយោគិនមកកម្ពុជាកាន់តែច្រើន។
លោកថ្លែងថា៖ «ពន្ឋកាត់ទុក នេះគឺនឹងត្រូវលុបចោល ព្រោះវាជាប្រភេទបំណុលដែលហាក់ដូចជារដ្ឋទៅខ្ចីពីក្រុមហ៊ុនឯកជនមកទុក»។
លោកបន្តថា៖ «ដូច្នេះការបញ្ចប់ពន្ធកាត់ទុកនេះ គឺវានឹងបញ្ចប់នូវបំណុលរដ្ឋជាមួយនឹងក្រុមហ៊ុនឯកជនចំនួន (១ ភាគរយ) ដែលនឹងកាន់តែជួយជំរុញដល់ការប្រកួតប្រជែងក្នុងការឈានឡើងនៃសេដ្ឋកិច្ចរបស់កម្ពុជា ហើយក៏នឹងជួយដល់ផ្នែកឯកជនក្នុងការរក្សាបាននូវទុនបន្ថែម ដើម្បីពង្រីកនូវអាជីវកម្មរបស់ខ្លួនផងដែរ»។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយបានឲ្យដឹងថា ការសម្រេចលុបចោលពន្ធកាត់ទុក គឺជាកំណែទម្រង់មួយរបស់រដ្ឋាភិបាលដែលនឹងទាក់ទាញដល់វិនិយោគិនជប៉ុន។
លោកថ្លែងថា៖ «ខ្ញុំគិតថាការលុបចោលពន្ធកាត់ទុក ១ ភាគរយ និងវិធានការកំណែទម្រង់ជាកញ្ចប់ផ្សេងទៀត និងជាការអំពាវនាវមួយដល់វិនិយោគិនជប៉ុន»។
លោក SUZUKI Hiroshi អគ្គនាយក វិទ្យាស្ថានស្រាវជ្រាវសេដ្ឋកិច្ចកម្ពុជា (BRIC) បានឲ្យដឹងថា កិច្ចប្រឹងប្រែងរបស់លោកនាយករដ្ឋមន្ត្រី ក្នុងការទាក់ទាញវិនិយោគិនជប៉ុនជាការគួរឲ្យកោតសរសើរ។
លោកថ្លែងថា៖ «នេះជាកិច្ចប្រឹងប្រែងដ៏សំខាន់មួយ ដើម្បីស្វែងយល់ស្ថានភាពជាក់ស្តែង និងសក្តានុពលរបស់កម្ពុជា»។
លោកបន្តថា ខណៈវិនិយោគិនជប៉ុនជាច្រើន រួមមានក្រុមហ៊ុនធំៗនៅតែមានអារម្មណ៍រូបភាពអវិជ្ជមានរបស់កម្ពុជា ដូចជា ចម្ការមីន សង្រ្គាមស៊ីវិល និងភាពក្រីក្រ វាចំាបាច់សម្រាប់កម្ពុជាក្នុងការផ្តល់ព័ត៌មានច្បាស់លាស់មួយ។
លោកថ្លែងថា៖ «វាចំាបាច់ណាស់ក្នុងការបញ្ជូនព័ត៌មានច្បាស់លាស់មួយស្តីពីស្ថានភាព និងគុណប្រយោជន៍របស់កម្ពុជា ដូចជាការតភ្ជាប់ជាមួយប្រទេសជិតខាង និងការកែលម្អហេដ្ឋារចនាសម្ព័ន្ធឡូជីស្ទីក»។
គិតពីឆ្នាំ ១៩៩៤ រហូតដល់ត្រីមាសទី១ ឆ្នាំ ២០១៩ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគរបស់ក្រុមហ៊ុនជប៉ុនចំនួន ១៣៧ គម្រោង ដែលមានទំហំវិនិយោគប្រមាណ ២,៥ ពាន់លានដុល្លារ ដោយផ្ដោតសំខាន់លើការផលិតគ្រឿងផ្គុំអគ្គិសនី និងអេឡិចត្រូនិក គ្រឿងផ្គុំរថយន្ត និងសម្ភារបរិក្ខារបច្ចេកទេស កសិឧស្សាហកម្ម ការកែច្នៃម្ហូបអាហារ សណ្ឋាគារ ទេសចរណ៍ មន្ទីរពេទ្យ និងផ្សារទំនើប។ នេះបើតាមលោកនាយករដ្ឋមន្ត្រី ហ៊ុន សែន។
ក្រៅពីនេះក៏មានវត្តមាននៃសកម្មភាពធុរកិច្ចជប៉ុនទាំងធំ ទាំងតូច ប្រមាណ ១ ៧០០ ក្រុមហ៊ុន នៅក្នុងវិស័យជាច្រើនដូចជាវិស័យធនាគារ អាកាសចរណ៍ ភោជនីយដ្ឋានជាដើម។
តុល្យភាពវិនិយោគ
ប្រទេស កម្ពុជា បច្ចុប្បន្នត្រូវបានគេមើលឃើញថា កំពុងគ្របដណ្តប់ភាគច្រើននៃការវិនិយោគរបស់ចិន ហើយនៅពេលសួរថា តើកិច្ចប្រឹងប្រែងរបស់រដ្ឋាភិបាលក្នុងការទាក់ទាញវិនិយោគិនជប៉ុនអាចនឹងធ្វើឲ្យមានតុល្យភាពនៃការវិនិយោគរបស់ចិននៅកម្ពុជា ឬយ៉ាងណា លោក ច័ន្ទ សុផល ឲ្យដឹងថា ការធ្វើពិពិធកម្មប្រភពវិនិយោគ ជារឿងល្អសម្រាប់ការវិនិយោគ និងពាណិជ្ជកម្មរបស់កម្ពុជា។
លោកថ្លែងថា៖ «ខ្ញុំគិតថា តម្លៃវិនិយោគរបស់កម្ពុជាមានពីប្រទេសជាច្រើន ហើយជប៉ុនជាប្រទេសដែលមានការគោរពបំផុតមួយ»។
លោក SUZUKI Hiroshi បាននិយាយថា៖ «ចរិតលក្ខណៈដ៏ចម្បងរបស់វិនិយោគជប៉ុន គឺមានគុណភាពខ្ពស់ គោរពសិទ្ធិមនុស្ស សិទ្ធិការងារ ច្បាប់ការងារ គោរពសិទ្ធិម្ចាស់ប្រទេស គិតគូរដល់បរិស្ថាន និងមិនមានអន្ទាក់បំណុល»។
បច្ចុប្បន្នខេត្តព្រះសីហនុកំពុងគ្របដណ្តប់ដោយគម្រោងវិនិយោគរបស់ចិនស្ទើរគ្រប់វិស័យ ប៉ុន្តែមានតែកំពង់ផែស្វយ័ត ក្រុងព្រះសីហនុមួយប៉ុណ្ណោះ ជាការជ្រោមជ្រែងរបស់ជប៉ុន។
នៅថ្ងៃនេះលោកនាយករដ្ឋមន្ត្រី ស៊ីនហ្សូ អាបេ និងលោកនាយករដ្ឋមន្ត្រី ហ៊ុន សែន នឹងធ្វើជាសាក្សីនៃពិធីចុះហត្ថលេខាលើលិខិតប្តូរសារស្តីពីការផ្តល់ហិរញ្ញប្បទានឥតសំណងសម្រាប់គម្រោងផ្តល់អាហារូបករណ៍ អភិវឌ្ឍន៍ធនធានមនុស្ស ក្នុងទំហំទឹកប្រាក់ ៣៣៩ លានយ៉េន និងគម្រោងសង់ឃ្លាំងកុងតឺន័រនៅតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ ក្នុងទំហំទឹកប្រាក់ ២០០លានយ៉េន៕ LA
Subscribe to:
Post Comments
(
Atom
)
No comments :
Post a Comment