Thursday, May 30, 2019
វិភាគៈ អំណាចថៃ នឹងស្ថិតនៅក្នុងកណ្តាប់ដៃរបស់បងប្អូន ៣ រូប
 |
| (ពីឆ្វេង) ឧត្តមសេនីយ៍ ប្រាយុធ ឧត្តមសេនីយ៍ ប្រាវីត និង ឧត្តមសេនីយ៍ អាក់នុពុង។ |
ក្រុងបាងកកៈ យោងតាមប្រភពយោធាបានឲ្យដឹងថា មរណភាពរបស់លោកប្រធានក្រុមប្រឹក្សាពិសេសឧត្តមសេនីយ៍ ប្រេម ទីនស៊ុឡានុន ទំនងជាមិនអាចកាត់បន្ថយអំណាចនយោបាយ ដែលប្រើប្រាស់ដោយបងប្អូនយោធា ៣ រូប ដែលត្រូវបានដឹកនាំដោយលោកនាយករដ្ឋមន្ត្រី ប្រាយុធ ចាន់-អូចា នោះទេ។
ហេតុផលមួយគឺថា រយៈពេលចុងក្រោយនេះ លោកឧត្តមសេនីយ៍ ប្រេម មិនបានធ្វើសកម្មភាពនយោបាយ។
អំណាចភាគច្រើន ស្ថិតនៅក្នុងកណ្តាប់ដៃរបស់លោកឧត្តមសេនីយ៍ ប្រាយុធ និងបងប្រុសសំខាន់ ២ នាក់ទៀត គឺលោកឧបនាយករដ្ឋមន្ត្រី និងជារដ្ឋមន្ត្រីការពារជាតិ លោកឧត្តមសេនីយ៍ ប្រាវីត វង់ស៊ូវ៉ាន់ និងរដ្ឋមន្ត្រីមហាផ្ទៃលោកឧត្តមសេនីយ៍ អាក់នុពុង ផៅចិន្តា។
នៅពេលដែលលោកឧត្តមសេនីយ៍ អាក់នុពុង ត្រូវបានតែងតាំងជាប្រមុខកងទ័ព ក្រោយពីរដ្ឋប្រហារយោធាឆ្នាំ ២០០៦ លំដាប់នៃការស្នងតំណែងនៅក្នុងជួរកងទ័ព ត្រូវបានរៀបចំឡើងតាមរបៀបមួយ ដែលក្រុមមន្ត្រីស្មោះត្រង់នឹងលោកនឹងកាន់តំណែងសំខាន់ៗ។
 |
| លោកឧត្តមសេនីយ៍ ប្រាយុធ ចាន់-អូចា ស្វាគមន៍ សិស្សសាលានៅក្រុងបាងកក។ |
បន្ទាប់ពីរយៈពេល ៣ ឆ្នាំ លោកឧត្តមសេនីយ៍ អាក់នុពុង បានប្រគល់អំណាចឲ្យទៅលោកឧត្តមសេនីយ៍ ប្រាយុធ ចាន់-អូចា ដែលបានក្លាយទៅជាអគ្គមេបញ្ជាការកងទ័ពរយៈពេល ៤ ឆ្នាំ មុននឹងលោកត្រូវបានលើកបន្តុបឲ្យធ្វើជានាយករដ្ឋមន្ត្រី បន្ទាប់ពីរដ្ឋប្រហារឆ្នាំ ២០១៤។
បើយោងតាមប្រភពយោធាបានឲ្យដឹងថា ភាគច្រើននៃអង្គភាពដែលមានឥទ្ធិពលបំផុតរបស់យោធា ត្រូវបានបញ្ជា និងគ្រប់គ្រងដោយក្រុមមន្ត្រីមកពីក្រុមពិសេសដូចជាក្រុម Burapha Phayakនិង Wong Thewan ដើម្បីធានាឲ្យមានការបែងចែកអំណាចស្មើភាព និងទប់ស្កាត់មិនឲ្យមានជម្លោះផ្ទៃក្នុង។
ប្រភពដដែលបានឲ្យដឹងទៀតថា លោកឧត្តមសេនីយ៍ប្រាយុធ និងលោកឧត្តមសេនីយ៍ អាក់នុពុង មានការគោរពយ៉ាងជ្រាលជ្រៅបំផុតចំពោះលោកឧត្តមសេនីយ៍ប្រេមដែលបានក្លាយជារដ្ឋបុរស ហើយត្រូវបានគេចាត់ទុកឥស្សរជនដ៏ឆ្នើមមួយរូប។
ទោះបីជាយ៉ាងណាក៏ដោយ ក៏ប្រភពនោះបានបញ្ជាក់ថា ក្រោយពីលោកឧត្តមសេនីយ៍ ប្រេម ទីនស៊ុឡានុន បានចូលនិវត្តន៍ពីកងទ័ពយូរណាស់មកហើយនោះ លោកមិនស្គាល់ក្រុមមេដឹកនាំនៃកងកម្លាំងប្រដាប់អាវុធជំនាន់ក្រោយៗនោះច្បាស់ទេ។
ប្រភពដដែលបានបញ្ជាក់ថា លោកឧត្តមសេនីយ៍ ប្រេម មានឥទ្ធិពលតិចតួចទៅលើការរុះរើតំណែងយោធា ខណៈតំណែងភាគច្រើន ត្រូវបានដាក់បំពេញដោយអ្នកដែលមានទំនាក់ទំនងជាមួយលោកឧត្តមសេនីយ៍ ប្រាយុធ ឧត្តមសេនីយ៍ ប្រាវីត និងឧត្តមសេនីយ៍ អាក់នុពុង និងក្រុមឧត្ដមសេនីយ៍មកពីក្រុម Burapha Phayak និង Wong The-wan៕ BKP/PSA
Subscribe to:
Post Comments
(
Atom
)
No comments :
Post a Comment