Wednesday, May 8, 2019
សាប៊ូធម្មជាតិ «ដៃខ្មែរ» ស្នាដៃយុវតីខ្មែរលើកស្ទួយពីផលិតផលក្នុងស្រុក ផ្សំពីធម្មជាតិ
 |
| ដុំសាប៊ូធម្មជាតិតូចសម្រាប់អតិថិជនសាកល្បងប្រើប្រាស់ឥតគិតថ្លៃ |
 |
| កញ្ញា ភាព សុថុន ជាអ្នកគ្រប់គ្រងទូទៅហាងសាប៊ូ Dai Khmer |
ភ្នំពេញៈ ឆ្លងតាមបទពិសោធផលិតនូវផលិតផលធម្មជាតិដោយប្រើសមាសធាតុពីដូង ធ្យូងត្រឡោកដូង ប្រទាលកន្ទុយក្រពើ និងរមៀតរយៈពេល ៥ ឆ្នាំកញ្ញា វត្ថា វិច្ឆិកា បានសម្រេចគោលដៅដោយបានដាក់លក់ផលិតផលខ្លួនលើទីផ្សារជាសាធារណៈដែលមានអតិថិជនគាំទ្រទាំងភ្ញៀវជាតិ និងអន្តរជាតិជាមួយយីហោ «Dai Khmer» ស្ថិតនៅផ្លូវ ៤៦៤ ផ្ទះលេខ ១៤ សេ ផ្តុំទួលទំពូង។
Dai Khmer មានលក់ផលិតផលដែលធ្វើដោយដៃ និងធម្មជាតិដូចជា សាប៊ូដុំសម្រាប់ដុសលាងសម្អាតបានមួយតួខ្លួនដែលមាន ៤ ប្រភេទរួមមាន សាប៊ូរមៀត សាប៊ូដូង សាប៊ូធ្យូងត្រឡោកដូង និងសាប៊ូប្រទាលកន្ទុយក្រពើ តម្លៃក្នុង ១ ដុំថ្លៃ ១ ម៉ឺនរៀល។
ធ្យូងត្រឡោកដូងមានតួនាទីសម្រាប់លុបលាងលើផ្ទៃមុខ និងដងខ្លួនដោយផ្អាប់ទុករយៈពេល ៥ នាទីមុនពេលលាងទឹកចេញ ជាពិសេសនោះវាជាប្រភេទក្រែមលាបពេលយប់ផលិតពីប្រទាលកន្ទុយក្រពើ និងរមៀតក្នុង ១ ដបថ្លៃ ៥ ដុល្លារ។
 |
| ក្រែមរមៀតផ្សំពីរមៀតធម្មជាតិសម្រាប់លាបមុខពេលយប់ |
កញ្ញា ភាព សុថុន វ័យ ២៣ ឆ្នាំជាអ្នកចាត់ការទូទៅក្នុងហាង Dai Khmer បានប្រាប់ភ្នំពេញប៉ុស្តិ៍ពីវត្ថុធាតុផ្សំ និងអត្ថប្រយោជន៍វាថា៖ «ចំពោះសាប៊ូរមៀត យើងយករមៀតលាយជាមួយប្រេងដូង។ វាអាចជួយឲ្យស្បែកទន់ បំបាត់ស្នាមអុចខ្មៅ និងបង្រួមរន្ធរោមនៅលើផ្ទៃមុខ។ សាប៊ូប្រទាលកន្ទុយក្រពើជួយបំបាត់មុននៅលើផ្ទៃមុខ និងខ្នង។ សាប៊ូដូងជួយឲ្យស្បែកមានសំណើម ហើយសាប៊ូធ្យូង គឺយកធ្យូងត្រឡោកដូងមកលាយជាមួយប្រេងដូងដូចគ្នា។ វាជួយកម្ចាត់បាក់តេរីនៅលើស្បែក ព្រមទាំងជួយឲ្យស្បែកមានសំណើម»។
កញ្ញាបានឲ្យដឹងថា ធ្យូងត្រឡោកដូងសម្រាប់ផលិតជាសាប៊ូ និងថ្នាំដុសធ្មេញ ត្រូវបានដុតក្នុងកម្ដៅ ១ ពាន់អង្សាសេរួចយកមកកិនឲ្យម៉ដ្ឋសម្រាប់លាយជាមួយប្រេងដូងដើម្បីផលិតជាសាប៊ូ និងបន្ថែមក្រូចសើចសម្រាប់ល្បាយស្ក្រាប់ដុសខ្លួន។
កញ្ញា សុថុន បន្ដថា៖ «យើងយកល្បាយធ្យូងត្រឡោកដូងមកធ្វើជាថ្នាំដុសធ្មេញដោយដាក់ផ្សើមលើច្រាសដុសធ្មេញហើយអាចប្រើបានក្នុង ១ អាទិត្យ ៣ ទៅ ៤ ដង»។
អ្នកចាត់ការទូទៅក្នុងហាង Dai Khmer កញ្ញា ភាព សុថុន ជានិស្សិតនៅវិទ្យាស្ថានកម្ពុជាផ្នែកគីមីចំណីអាហារមកពីខេត្តបន្ទាយមានជ័យបានប្រាប់ថា៖ «គោលបំណងក្នុងការធ្វើអាជីវកម្មនេះឡើងមកគឺដើម្បីជួយដល់ស្ត្រីខ្មែរទាំងឡាយឲ្យមានការងារធ្វើដោយបុគ្គលិកសុទ្ធតែជាស្ត្រីទាំងអស់ ហើយជាពិសេសនោះគឺចង់បង្វែរស្ត្រីទាំងឡាយបកមកប្រើផលិតផលធម្មជាតិ។ ទោះមិនទទួលផលបានឆាប់រហ័សដូចផលិតផលគីមីពិតមែន ប៉ុន្តែវាមានប្រសិទ្ធភាពដូចគ្នា និងមិនប៉ះពាល់ដល់សុខភាព»។
ការវេចខ្ចប់ផលិតផលធម្មជាតិគឺមិនប្រើប្លាស្ទិកឡើយដោយកញ្ញា វត្ថា វិច្ឆិកា កែច្នៃដើមចេកផលិតជាក្រដាស និងយកទៅឲ្យជាងកាត់ចេញជាពុម្ពសម្រាប់វេចខ្ចប់សាប៊ូដុំទាំងអស់។
ដំណើរការនៃការផលិតសាប៊ូធម្មជាតិគឺបានចាប់ផ្តើមដំបូងដោយថ្លឹងប្រេងដូងទៅតាមចំនួនកំណត់ និងគិតពីបរិមាណមេសាប៊ូលាយទឹកទុកឲ្យត្រជាក់ បន្ទាប់មកយកមកលាយជាមួយប្រេងដូងរួចចាប់កូររហូតដល់ល្បាយឡើងខាប់ និងចាក់ចូលទៅក្នុងពុម្ពទុករយៈពេល ៨ ម៉ោងទើបកាត់ចេញជាដុំសម្រាប់វេចខ្ចប់។
កញ្ញា វត្ថា វិច្ឆិកា វ័យ ២៦ ឆ្នាំបានឲ្យដឹងថា៖ «ខ្ញុំបាននាំយកផលិតផលទៅលក់នៅប្រទេសជាច្រើនដូចជា អូស្ត្រាលី សហរដ្ឋអាមេរិក បារាំង ហុងកុង សិង្ហបុរី និងរុស្ស៊ី»។
កញ្ញា វិច្ឆិកា អះអាងថា៖ «ខ្ញុំគ្រោងនាំចេញទៅប្រទេសជិតខាង និងអឺរ៉ុបរួមទាំង អ៊ីតាលីដោយផ្ទាល់ដើម្បីមើលទីផ្សារនៅទីនោះផងដែរ»៕
Subscribe to:
Post Comments
(
Atom
)
No comments :
Post a Comment