Tuesday, June 4, 2019
ការស្ទង់មតិៈ សេដ្ឋកិច្ចអាមេរិក នឹងដើរថយក្រោយ
លោក ដូណាល់ ត្រាំ ឡើងយន្តហោះទៅប្រទេស អង់គ្លេស កាលពីថ្ងៃចន្ទ។ រូបថត AFP |
ក្រុងវ៉ាស៊ីនតោនៈ ការខ្វែងគំនិតគ្នាអំពីការដើរថយក្រោយនៃសេដ្ឋកិច្ចអាមេរិកនៅឆ្នាំក្រោយ បានកើនឡើងយ៉ាងខ្លាំងជាមួយកំណើនការគាំពារនិយម ដែលបន្តបង្កឲ្យមានការគំរាមកំហែងយ៉ាងខ្លាំងដល់សេដ្ឋកិច្ច។ នេះបើយោងតាមការស្ទង់មតិសេដ្ឋកិច្ចពាណិជ្ជកម្មកាលពីថ្ងៃចន្ទ។
អ្នកឆ្លើយសំណួរស្ទើរតែទាំងអស់ចំពោះការស្ទង់មតិប្រចាំត្រីមាសនេះ ពីសមាគមជាតិសេដ្ឋកិច្ចពាណិជ្ជកម្ម បានព្យាករកំណើនថានឹងដើរថយក្រោយនៅឆ្នាំ ២០១៩ ប៉ុន្តែភាពមិនច្បាស់លាស់ពីហានិភ័យនៅមានតិចបំផុតចំពោះចក្ខុវិស័យរបស់ពួកគេ។
ប៉ុន្តែការស្ទង់មតិក្នុងចំណោមក្រុមអ្នកព្យាករសេដ្ឋកិច្ច ៥៣ រូប មកពីក្រុមហ៊ុនអាមេរិក និងសាកលវិទ្យាល័យសំខាន់ៗ ត្រូវបានធ្វើឡើងនៅឆមាសទី១ ខែឧសភា ខណៈទំនាក់ទំនងពាណិជ្ជកម្មរបស់អាមេរិកជាមួយប្រទេស ចិន បានប្រែក្លាយជាអាក្រក់ខ្លាំង។
លោកប្រធានាធិបតីអាមេរិក ដូណាល់ ត្រាំ បានព្រមានថា នឹងហូតពន្ធនាំចូលថ្មីលើប្រទេស ម៉ិកស៊ិក លើបញ្ហាជនអន្តោប្រវេស ចំនួន ៥ ភាគរយ ហើយក្រោយមកក៏បានបង្កើនយ៉ាងរហ័សដល់ ២៥ ភាគរយ។
លោក Gregory Daco នៅក្រុមហ៊ុន Oxford Economics ដែលបានដឹកនាំការស្ទង់មតិនេះបានឲ្យដឹងនៅក្នុងរបាយការណ៍នេះថា៖ «គោលនយោបាយគាំពារពាណិជ្ជកម្មដែលកើនឡើងត្រូវបានចាត់ទុកជាហានិភ័យធ្លាក់ចុះដ៏សំខាន់ចំពោះកំណើនសេដ្ឋកិច្ច ដោយអ្នកឆ្លើយសំណួរភាគច្រើន ដោយសារតែសម្ពាធទីផ្សារហិរញ្ញវត្ថុ និងការធ្លាក់ចុះកំណើនសេដ្ឋកិច្ចពិភពលោក»។
លោកថ្លែងថា៖ «ហានិភ័យដំណើរថយក្រោយនៃសេដ្ឋកិច្ចត្រូវបានឃ្លាំមើលមានកម្រិតទាបក្នុងរយៈពេលខ្លី ប៉ុន្តែនឹងកើនឡើងយ៉ាងរហ័សក្នុងឆ្នាំ ២០២០»។
ការស្ទង់មតិបង្ហាញថា ចំនួន ៦០ ភាគរយ គឺសេដ្ឋកិច្ចនឹងដើរថយក្រោយមុនដំណាច់ឆ្នាំ ២០២០ កើនឡើងជិត ២ ដង ពីចំនួន ៣៥ ភាគរយ ដែលបានព្យាករនៅក្នុងការស្ទង់មតិកាលពី ៣ ខែកន្លងមក។
ជិត ៩០ ភាគរយ នៃអ្នកឆ្លើយសំណួរទាំងនោះបានឲ្យដឹងថា ពួកគេបានកាត់បន្ថយការព្យាករកំណើនរបស់ពួកគេក្នុងរយៈពេលប៉ុន្មានខែថ្មីៗនេះ ដោយសារតែគោលនយោបាយពាណិជ្ជកម្មរបស់អាមេរិក ដែលបានជាប់ពាក់ព័ន្ធនឹងសង្គ្រាមពាណិជ្ជកម្មជាមួយនឹងដៃគូរបស់ខ្លួនសំខាន់ៗទាំងអស់ ប៉ុន្តែយ៉ាងណាក៏ដោយ ការស្ទង់មតិជារួមសម្រាប់ឆ្នាំនេះ និងឆ្នាំក្រោយគឺខ្ពស់បន្តិចជាងការស្ទង់មតិលើកមុន។
ពេលនេះក្រុមវិនិច្ឆ័យរំពឹងថា កំណើនផលិតផលក្នុងស្រុកសរុប (GDP) នឹងធ្លាក់ចុះមកនៅត្រឹម ២,៦ ភាគរយ នៅឆ្នាំនេះ និង ២,១ ភាគរយ ត្រឹមឆ្នាំក្រោយ ធៀបនឹង ២,៩ ភាគរយ កាលពីចុងឆ្នាំ ២០១៨៕ AFP/LA
Subscribe to:
Post Comments
(
Atom
)
No comments :
Post a Comment