Tuesday, June 4, 2019
ថៃ-មីយ៉ាន់ម៉ា ចុះកិច្ចព្រមព្រៀងបើកបរឆ្លងព្រំដែន
រថយន្តដឹកកម្មករមីយ៉ាន់ម៉ា ឆ្លងកាត់ច្រកព្រំដែន Mae Sot។ រូប AFP |
ក្រុងបាងកកៈ ប្រទេស ថៃ និងមីយ៉ាន់ម៉ា រំពឹងថានឹងមានរថយន្តធ្វើដំណើរតាមផ្លូវចំនួន ៣ ឆ្លងកាត់ព្រំដែនរវាងប្រទេសទាំង ២ ក្នុងខែកញ្ញាខាងមុខនេះ នៅក្នុងវិធានការមួយដែលត្រូវបានបង្កើតឡើង ដើម្បីជំរុញសេដ្ឋកិច្ចតំបន់។ នេះបើយោងតាមកាសែតបាងកកប៉ុស្តិ៍។
លោក Phiraphon Thawonsuphacharoen ប្រធាននាយកដ្ឋានដឹកជញ្ជូនផ្លូវគោកនៃក្រសួងដឹកជញ្ជូនថៃ បានប្រាប់កាសែតបាងកកប៉ុស្តិ៍កាលពីចុងសប្តាហ៍មុនថា ប្រទេសនីមួយនឹងត្រូវបានផ្តល់អាជ្ញាប័ណ្ណចំនួន ១០០ សម្រាប់ប្រតិបត្តិករដឹកជញ្ជូនរបស់ខ្លួន ដែលអាចឲ្យអ្នកបើកបរធ្វើដំណើរបានចម្ងាយផ្លូវរាប់រយគីឡូម៉ែត្រចូលទៅក្នុងតំបន់ខាងក្នុងរបស់ប្រទេសទាំង ២ រួមទាំងទីក្រុងយ៉ាំងហ្គោន និងកំពង់ផែ ដែលនៅជិតតំបន់សេដ្ឋកិច្ចពិសេស Thilawa ក្នុងប្រទេស មីយ៉ាន់ម៉ា និងទីក្រុងបាងកក និងកំពង់ផែ Laem Chabang ក្នុងខេត្តឈុនបុរី ប្រទេស ថៃ ផងដែរ។
ដោយសំដៅដល់ដំណើរការដែលតម្រូវឲ្យមានដោយកិច្ចព្រមព្រៀងដឹកជញ្ជូនឆ្លងកាត់ព្រំដែនអនុតំបន់ទន្លេមេគង្គ លោក Phiraphon ថ្លែងថា៖ «យើងកំពុងជ្រើសរើស និងពិនិត្យមើលលក្ខណសម្បត្តិរបស់ប្រតិបត្តិករ»។
លោកបន្ថែមថា ផ្លូវដែលត្រូវបើកបរទាំងនេះ ដែលចាប់ផ្តើមពីតំបន់ច្រកព្រំដែន Myawaddy-Mae Sot រវាងប្រទេសទាំង ២ ធ្វើឡើងក្នុងគោលបំណងគាំទ្រដល់ទេសចរណ៍ និងឡូជីស្ទីកអន្តរជាតិ។
កាសែតបាងកកប៉ុស្តិ៍បានរាយការណ៍ទៀតថា អ្នកបើកបរមកពីប្រទេស ថៃ អាចចាប់ផ្តើមការធ្វើដំណើររបស់ពួកគេនៅក្នុងស្រុក Mae Sot ខេត្តតាក ហើយឆ្លងកាត់ស្ពានមិត្តភាពថៃ-មីយ៉ាន់ម៉ា ទៅកាន់ទីក្រុង Myawaddy ទីក្រុង Yangon និងកំពង់ផែ Thilawa។ កាសែតនេះបានរាយការណ៍ទៀតថា អ្នកបើកបរមកពីប្រទេស មីយ៉ាន់ម៉ា អាចជ្រើសរើសចេញពីជម្រើសចំនួន ២ គឺទី១ បើកបរចេញពីច្រកព្រំដែន Myawaddy-Mae Sot ទៅកាន់ផ្លូវនៅខេត្ត Mukdahan និងតាមផ្លូវ Mae Sot-Bangkok-Laem Chabang។
លោក Phiraphon បានឲ្យដឹងទៀតថា ប្រទេស ថៃ ក៏បានចុះហត្ថលេខាលើកិច្ចព្រមព្រៀងបើកបរឆ្លងព្រំដែនដូចគ្នានេះដែរជាមួយប្រទេស ឡាវ និងប្រទេស វៀតណាម ផងដែរ៕ KC
Subscribe to:
Post Comments
(
Atom
)
No comments :
Post a Comment