Tuesday, June 4, 2019
Boeing រកឃើញបញ្ហាលើស្លាប 737 Max
 |
| យន្តហោះ 737 Max របស់ក្រុមហ៊ុនផ្សេងៗចតទុកចោលនៅមជ្ឈមណ្ឌលរបស់ Boeing។ AFP |
ក្រុងវ៉ាស៊ីនតោនៈ ក្រុមហ៊ុន Boeing បានប្រកាសកាលពីថ្ងៃអាទិត្យថា យន្តហោះ 737 សម្រាប់ហោះហើររយៈចម្ងាយមធ្យមរបស់ខ្លួនមួយចំនួន ដែលរួមមានទាំងយន្តហោះ 737 MAX 8 ផងដែរនោះ អាចមានបញ្ហាកំហុសនៅលើស្លាបយន្តហោះ ប៉ុន្តែមិនមានសេចក្តីរាយការណ៍អំពីបញ្ហាហោះហើរដែលកើតឡើងជាប់ទាក់ទងនឹងកំហុសនេះទេ។
ក្រុមហ៊ុនផលិតយន្តហោះឈានមុខគេរបស់អាមេរិកមួយនេះ ដែលរងការរង្គោះរង្គើដោយវិបត្តិដែលមិនធ្លាប់មាន បន្ទាប់ពីក្រុមយន្តហោះ 737 MAX 8 ទាំងអស់របស់ខ្លួនត្រូវបានហាមឃាត់មិនឲ្យហោះហើរកាលពីពាក់កណ្ដាលខែមីនា បានឲ្យដឹងថា ក្រុមហ៊ុនម៉ៅការបន្តមួយបានជូនដំណឹងដល់ក្រុមហ៊ុនរបស់ខ្លួនពីបញ្ហាកំហុសនេះដែលកើតមាននៅផ្នែកមួយដែលជាប់ពាក់ព័ន្ធនឹងប្រតិបត្តិការបន្លៀនចេញចូលផ្នែក leading edge របស់ស្លាបយន្តហោះ។
ផ្នែក Leading edge របស់យន្តហោះនេះមានសារៈសំខាន់ចំពោះការចាប់ផ្ដើមហោះឡើង និងចុះចត ដោយសារឧបករណ៍នេះជួយក្នុងការទាញរបស់ស្លាប និងមានមុខងារទាក់ទងនឹងខ្យល់ (ឌីណាមិកអាកាស) របស់យន្តហោះ។
ក្រុមហ៊ុន Boeing បានឲ្យដឹងក្នុងសេចក្ដីប្រកាសមួយថា ខ្លួនបានបញ្ជូនព័ត៌មានពីកំហុសនេះទៅម្ចាស់យន្តហោះរួចរាល់ហើយ ដូច្នេះពួកគេអាចត្រួតពិនិត្យផ្នែកដែលមានបញ្ហាទាំងនេះ។
បើប្រតិបត្តិកររកឃើញផ្នែកដែលមានកំហុសទាំងនេះនៅលើយន្តហោះរបស់ពួកគេ ពួកគេគួរតែផ្លាស់ប្តូរផ្នែកទាំងនោះជាមុនសិន មុនពេលយកយន្តហោះទៅប្រើប្រាស់។ នេះបើយោងតាមក្រុមហ៊ុន។
អ្នកជំនាញខាងអាកាសចរណ៍មួយរូបបានប្រាប់ទីភ្នាក់ងារព័ត៌មាន AFP ដោយលក្ខខណ្ឌមិនបញ្ចេញឈ្មោះថា៖ «នេះគឺជាឧបករណ៍មួយដែលចាត់ទុកថាមានសារៈសំខាន់ ដោយសារតែប្រសិនបើបន្ទះ Leading edge នេះមិនអាចបន្លៀនចេញមកប្រកបដោយតុល្យភាព នោះអាចបង្កឲ្យមានចលនាហោះឡើងមិនមានតុល្យភាព ដែលអាចមានគ្រោះថ្នាក់ ជាពិសេសនៅពេលចាប់ផ្ដើមហោះឡើង និងពេលចុះចត»។
យន្តហោះ 737 MAX ត្រូវបានហាមហោះហើរ បន្ទាប់ពីមនុស្សចំនួន ៣៤៦ នាក់បានស្លាប់ ក្នុងការធ្លាក់យន្តហោះ ២ លើក ក្នុងប្រទេស ឥណ្ឌូនេស៊ី និងនៅប្រទេស អេត្យូពី៕ AFP/LA
Subscribe to:
Post Comments
(
Atom
)
No comments :
Post a Comment