Wednesday, June 5, 2019
ក្តីបារម្ភពីសង្គ្រាមពាណិជ្ជកម្ម ធ្វើឲ្យផ្សារហ៊ុនអាស៊ីធ្លាក់ចុះ
រូបភាពបង្ហាញពីការធ្លាក់ចុះនៃតម្លៃភាគហ៊ុននៅផ្សារហ៊ុនក្រុងតូក្យូ កាលពីម្សិលមិញ។ |
ក្រុងហុងកុងៈ តម្លៃផ្សារហ៊ុនអាស៊ីបានធ្លាក់ចុះយ៉ាងខ្លាំងកាលពីថ្ងៃអង្គារ ដោយសារភាពតានតឹងផ្នែកពាណិជ្ជកម្មពិភពលោកដែលបានបន្តដាក់សម្ពាធលើទីផ្សារមួយនេះ។
ក្តីបារម្ភពីការធ្លាក់ចុះសេដ្ឋកិច្ច បានកើនឡើងខ្លាំងក្នុងរយៈពេលប៉ុន្មានថ្ងៃថ្មីៗនេះ ខណៈលោកប្រធានាធិបតីអាមេរិក ដូណាល់ ត្រាំ បានគំរាមកំហែងប្រទេស ម៉ិកស៊ិក ជាមួយនឹងការដាក់ពន្ធនាំចូល ដែលនេះជាការបន្ថែមក្តីបារម្ភទៅលើសង្គ្រាមពាណិជ្ជកម្មរវាងអាមេរិក និងចិន ដែលមិនទាន់មានសញ្ញាដំណោះស្រាយទាល់តែសោះ។
ក្រុមហ៊ុន Okasan Online Securities បានឲ្យដឹងក្នុងបទវិចារណកថាមួយថា៖ «ការសន្មត់របស់ទីផ្សារនេះ គឺការធ្លាក់ចុះសេដ្ឋកិច្ចពិភពលោកនឹងស្ទុះងើបឡើងនៅចុងឆ្នាំនេះ ដែលជំរុញដោយសេដ្ឋកិច្ចរបស់អាមេរិក ដែលកំពុងរីករាលដាលជម្លោះពាណិជ្ជកម្មទៅបណ្ដាប្រទេសផ្សេងៗទៀតដូចជា ម៉ិកស៊ិកជាដើម»។
លោក ត្រាំ បានប្រកាសចាត់វិធានការបន្ថែមរបស់លោកប្រឆាំងទៅនឹងប្រទេស ម៉ិកស៊ិក កាលពីសប្ដាហ៍មុន ជាមួយនឹងការប្រកាសថា ទីក្រុងវ៉ាស៊ីនតោន នឹងដកការអនុគ្រោះពន្ធពាណិជ្ជកម្មពីប្រទេស ឥណ្ឌា ដែលចាប់ផ្ដើមនៅថ្ងៃពុធ ក្នុងគោលបំណងដើម្បីដាក់សម្ពាធលើទីក្រុងញូវដែលី ឲ្យបង្កើនលទ្ធភាពចូលទីផ្សារចំពោះទំនិញរបស់អាមេរិក។
លោក Edward Moya អ្នកវិភាគទីផ្សារជាន់ខ្ពស់នៅក្រុមហ៊ុន OANDA បានឲ្យដឹងថា សន្ទស្សន៍ផលិតកម្ម ISM របស់អាមេរិកដែលចេញផ្សាយកាលពីថ្ងៃចន្ទ និងដែលត្រូវបានចងក្រងនៅមុនពេលមានការគំរាមកំហែងរឿងពន្ធនាំចូលនៅពេលថ្មីៗនេះបានបញ្ជាក់ពី «សារៈសំខាន់នៃការធ្វើអាជីវកម្មជាមួយប្រទេស ម៉ិកស៊ិក»។
លោក Moya បានថ្លែងថា៖ «អ្នកឆ្លើយសំណួរបានកត់សម្គាល់ថា ពួកគេកំពុងផ្លាស់ប្តូរអាជីវកម្មពីប្រទេស ចិន ទៅប្រទេស ម៉ិកស៊ិក និងថា ពន្ធនាំចូលនៅម៉ិចស៊ិកកំពុងដាក់សម្ពាធច្រើនក្នុងការធ្វើអាជីវកម្ម»។
របាយការណ៍បង្ហាញពីភាពខ្សោយនៃផលិតកម្មនៅចក្រភពអង់គ្លេស និងអាមេរិក បានបណ្ដាលឲ្យក្រុមវិនិយោគិននាំគ្នាស្វែងរកទ្រព្យសកម្មដែលមានសុវត្ថិភាព ដូចជាប្រាក់យន់។
មិនដល់រយៈពេល ៣០ នាទី បន្ទាប់ពីការចុចកណ្ដឹងជួញដូរ តម្លៃផ្សារហ៊ុន Nikkei បានធ្លាក់ចុះទាប ប៉ុន្តែក្រោយមកបានកើនឡើងវិញ។
តម្លៃផ្សារហ៊ុនហុងកុង បានធ្លាក់ចុះ ០,៥ ភាគរយ ខណៈផ្សារហ៊ុនស៊ាងហៃ ធ្លាក់ចុះ ១ ភាគរយ។ តម្លៃផ្សារហ៊ុនតៃប៉ិ ធ្លាក់ ០,៧ ភាគរយ និងផ្សារហ៊ុនសេអ៊ូល នៅថេរ។ ទោះយ៉ាងណាតម្លៃផ្សារហ៊ុនសិង្ហបុរីបានកើន ០,៥ ភាគរយ និងស៊ីដនី កើន ០,២ ភាគរយ។
ទីផ្សារអឺរ៉ុប បានធ្លាក់ចុះនៅពេលចាប់ផ្ដើមការជួញដូរកាលពីថ្ងៃអង្គារ ដោយតម្លៃផ្សារហ៊ុនក្រុងឡុងដ៍ធ្លាក់ចុះ ០,៦ ភាគរយ ខណៈតម្លៃផ្សារហ៊ុន Frankfurt និងប៉ារីស ធ្លាក់ចុះ ០,៧ ភាគរយ៕ AFP/LA
Subscribe to:
Post Comments
(
Atom
)
No comments :
Post a Comment