Wednesday, June 5, 2019
អូស្ត្រាលី សម្រេចទម្លាក់អត្រាការប្រាក់ដល់កម្រិតទាបបំផុតលើកដំបូង
លោក Philip Lowe ប្រធានធនាគារកណ្តាលអូស្ត្រាលី។ |
ស៊ីដនីៈ ធនាគារកណ្ដាលរបស់ប្រទេស អូស្ដ្រាលី បានបន្ទាបអត្រាការប្រាក់ដល់កម្រិតទាបជាលើកដំបូង ក្នុងរយៈពេល ៣ ឆ្នាំ កាលពីថ្ងៃអង្គារ ដែលសង្ឃឹមថា នឹងបន្តកំណើនសេដ្ឋកិច្ចខ្ពស់រយៈពេល ២៨ ឆ្នាំ ដោយមិនមានការដើរថយក្រោយក្នុងពេលមានឧបសគ្គសេដ្ឋកិច្ចនោះទេ។
ធនាគារកណ្ដាលរបស់ប្រទេស អូស្ដ្រាលី បានកាត់បន្ថយអត្រាការប្រាក់ ០,២៥ ភាគរយ មកនៅត្រឹមកម្រិតទាបជាប្រវត្តិសាស្ដ្រចំនួន ១,២៥ ភាគរយ ដោយសារកំណើនបានធ្លាក់ចុះមិនដែលមានចាប់តាំងពីវិបត្តិហិរញ្ញវត្ថុពិភពលោក។
ប្រទេស អូស្ដ្រាលី បានគេចផុតពីភាពវឹកវរសេដ្ឋកិច្ចពិភពលោករយៈពេល ២ ទសវត្សរ៍កន្លងមក ដោយសារតែទីក្រុងប៉េកាំង ជាអ្នកទទួលនាំចូលរ៉ែដែក ធ្យូងថ្ម និងកំណប់រ៉ែផ្សេងទៀតពីអូស្ត្រាលី។
ប៉ុន្តែនៅពេលនេះ កំណើនអត្រាគ្មានការងារធ្វើ ប្រាក់ឈ្នួលទាប ការធ្លាក់ចុះលំនៅឋាន និងអតិផរណាស្ថិតក្រោមទិសដៅកំណត់ កំពុងបង្កឲ្យមានការបារម្ភអំពីស្ថានភាពសេដ្ឋកិច្ចប្រទេស អូស្ដ្រាលី។
លោក Philip Lowe ប្រធានធនាគារបានឲ្យដឹងនៅក្នុងសេចក្ដីប្រកាសព័ត៌មានមួយថា៖ «ក្រុមប្រឹក្សាភិបាលបានយកការសម្រេចចិត្តនេះ ដើម្បីគាំទ្រកំណើនការងារ និងផ្ដល់ទំនុកចិត្តកាន់តែធំដែលអតិផរណានឹងស្របជាមួយនឹងទិសដៅកំណត់រយៈពេលមធ្យម»។
ការកាត់បន្ថយអត្រាការប្រាក់នេះ ត្រូវបានរំពឹងទុក ហើយក្រុមអ្នកវិភាគជឿជាក់ថា វិធានការកាន់តែច្រើននឹងធ្វើឲ្យសេដ្ឋកិច្ចមានសកម្មភាពរស់រវើកអាចកើតឡើង។
លោក Lowe បានឲ្យដឹងថា ធនាគារនេះនឹង «បន្តត្រួតពិនិត្យយ៉ាងយកចិត្តទុកដាក់លើការអភិវឌ្ឍនៅក្នុងទីផ្សារការងារ និងកែតម្រូវគោលនយោបាយរូបិយវត្ថុ ដើម្បីគាំទ្រកំណើនប្រកបដោយស្ថិរភាពនៅក្នុងសេដ្ឋកិច្ចនេះ»។
សេដ្ឋកិច្ចបានកើនឡើង ០,៣ ភាគរយ និង ០,២ ភាគរយ នៅ ២ ត្រីមាសចុងក្រោយ ខណៈតួលេខសម្រាប់ត្រីមាសដំបូងឆ្នាំ ២០១៩ នឹងត្រូវចេញផ្សាយនៅថ្ងៃពុធ។
រាល់ការធ្លាក់ចុះណាមួយ នឹងជំរុញឲ្យមានការប្រកាសអាសន្ន ដោយសារតែកំណើនអវិជ្ជមាន ក្នុងរយៈពេល ២ ត្រីមាសជាប់គ្នា ដែលត្រូវបានចាត់ទុកជាការធ្លាក់ចុះដ៏ធំ៕ AFP/LA
Subscribe to:
Post Comments
(
Atom
)
No comments :
Post a Comment