Wednesday, May 8, 2019
ជួប សម្លាប់ សារភាពពីការបាញ់សម្លាប់លោក កែម ឡី ប៉ុន្ដែសុំតុលាការកំពូលសម្រាលទោស
 |
| ជនជាប់ចោទឈ្មោះ អឿត អាង ហៅ ជួប សម្លាប់ ពេលត្រូវបាននាំចូលសវនាការ នៅតុលាការកំពូល កាលពីថ្ងៃម្សិលមិញ |
ភ្នំពេញៈ ជនជាប់ចោទឈ្មោះ អឿត អាង ហៅ ជួប សម្លាប់ កាលពីសវនាការម្សិលមិញ បានសារភាពថា ខ្លួនពិតជាបានបាញ់សម្លាប់លោក កែម ឡី កាលពីថ្ងៃទី ១០ ខែ កក្កដា ឆ្នាំ ២០១៦ ពិតមែន ប៉ុន្តែជនជាប់ចោទបានសុំតុលាការកំពូលឲ្យសម្រាលទោសដល់ខ្លួន ក្រោយពីត្រូវតុលាការថ្នាក់ក្រោមផ្តន្ទាទោសដាក់ពន្ធនាគារ ១ ជីវិត។
ក្នុងស្ថានភាពអារម្មណ៍របស់ជនជាប់ចោទ គឺហាក់ដូចមិនល្អឈរនៅក្នុងរង្វង់ក្រចកសេះ ដែលចាំតែឆ្លើយសំណួរពីចៅក្រម និងលើកដៃម្ខាងចង្អុលទៅក្បាល។ ស្ថិតក្នុងសកម្មភាពបែបនេះហាក់ជាសញ្ញាបង្ហាញថា ជនជាប់ចោទឈ្មោះ អឿត អាង មិនសូវចងចាំ ខណៈអវត្តមានដើមបណ្តឹងអ្នកស្រី ប៊ូ រចនា ជាភរិយារបស់លោក កែម ឡី ហើយក៏គ្មានមេធាវីខាងជនរងគ្រោះផងនោះ។
នៅក្នុងបន្ទប់សវនាការនៃតុលាការកំពូលកាលពីម្សិលមិញ ឈ្មោះ អឿត អាង ហៅជួបសម្លាប់បានឆ្លើយប្រាប់ចៅក្រមថាឈ្មោះរបស់គាត់មិនមែនឈ្មោះ អឿត អាង ដូចការហៅនោះទេ ប៉ុន្តែតាមការពិត គាត់ឈ្មោះជួប សម្លាប់។ ចំពោះសំណុំរឿងរបស់គាត់ពាក់ព័ន្ធនឹងការសម្លាប់លោក កែម ឡី នោះ គាត់អះអាងថា គាត់បានបាញ់សម្លាប់ជនរងគ្រោះពិតប្រាកដមែន។
អឿត អាង និយាយថា៖ «ខ្ញុំប្តឹងមកនេះដោយសារតុលាការទាំង ២ ថ្នាក់កាត់ទោសខ្ញុំច្រើនពេក។ ខ្ញុំបានដឹងកំហុសខ្ញុំហើយ»។
ទោះយ៉ាងណាលោកព្រះរាជអាជ្ញា ជុំ សំបាន តំណាងមហាអយ្យការសន្និដ្ឋានថា តាមការពិតនៅក្នុងសំណុំរឿងរបស់ជនជាប់ចោទត្រូវបានសាលាឧទ្ធរណ៍សម្រេចត្រឹមត្រូវហើយលោកថ្លែងថា៖ «ជនជាប់ចោទបានបាញ់ជនរងគ្រោះឈ្មោះ កែម ឡី នៅក្នុងស្តារម៉ាតហើយប៉ូលិសចាប់ជនជាប់ចោទជាក់ស្តែងជាមួយកាំភ្លើងខ្លីផង។ ការសម្រេចរបស់សាលាឧទ្ធរណ៍ផ្អែកតាមអង្គ ហេតុត្រឹមត្រូវដូច្នេះខ្ញុំស្នើសុំតម្កល់សាលដីការបស់សាលាឧទ្ធរណ៍ទុកជាបានការ»។
លោក អុឹម ម៉ាច មេធាវីការពារសិទ្ធិឲ្យជនជាប់ចោទ អឿត អាង បានសន្និដ្ឋានដែរថា កូនក្តីលោកប្តឹងមកតុលាការកំពូលពេលនេះក៏ព្រោះតែគាត់ជំទាស់នឹងទណ្ឌកម្មទោស ១ ជីវិត។ ប៉ុន្តែគាត់បានទទួលស្គាល់កំហុសរបស់គាត់ហើយដែរ ហើយមូលហេតុដែលសាលាឧទ្ធរណ៍សម្រេចតម្កល់ទោស ១ ជីវិត តាមសាលក្រមរបស់សាលាដំបូងរាជធានីភ្នំពេញនោះក៏ព្រោះឧទ្ធរណ៍យល់ថា កូនក្តីរបស់លោកបាញ់សម្លាប់ជនរងគ្រោះដោយមានលក្ខណៈឃោរឃៅ។
ទោះយ៉ាងណា លោកមេធាវីប្រាប់ចៅក្រមថា តាមពិតកូនក្តីលោកមិនបានសម្លាប់ជនរងគ្រោះក្នុងរូបភាពមានលក្ខណៈឃោរឃៅដូចការយល់ឃើញរបស់សាលាឧទ្ធរណ៍ទេ។ វាខុសពីជនល្មើសផ្សេងទៀតដែលធ្វើ សកម្មភាពឆក់ទ្រព្យសម្បត្តិបណ្តាលឲ្យជនរងគ្រោះមានគ្រោះថ្នាក់រហូតស្លាប់ ដែលមានលក្ខណៈឃោរឃៅជាងកូនក្តីរបស់លោកទៅទៀត ប៉ុន្តែមិនឃើញតុលាការផ្តន្ទាទោសជននោះដាក់ពន្ធនាគារអស់ ១ ជីវិតផងទេ។
លោក អុឹម ម៉ាច បញ្ជាក់ថា៖ «កូនក្តីខ្ញុំសុំបដិសេធដែលថាគាត់ធ្លាប់បួសជាសង្ឃគាត់ជាមន្រ្តីបរិស្ថានគាត់ធ្លាប់ធ្វើជាយោធា។ ដោយតាមរយៈធ្លាប់ធ្វើការងារទើបឧទ្ធរណ៍យល់ថា គាត់មានការយល់ដឹងច្រើនមិនគួរសម្លាប់មនុស្សបែបនេះទេ។ ការយល់របស់សាលាឧទ្ធរណ៍នេះទើបមិនបន្ថយទោសដល់កូនក្តីខ្ញុំទោះយ៉ាងណាខ្ញុំក៏សុំក្រុមប្រឹក្សាជំនុំជម្រះតុលាការកំពូលមេត្តាសម្រាលទោសដល់កូនក្តីខ្ញុំផង»។
ជនជាប់ចោទឈ្មោះ អឿត អាង ហៅ ជួប សម្លាប់ បានបាញ់សម្លាប់ជនរងគ្រោះឈ្មោះ កែម ឡី នៅក្នុងស្តារម៉ាតស្តុបបូកគោកាលពីព្រឹកថ្ងៃទី ១០ ខែ កក្កដា ឆ្នាំ ២០១៦ ហើយសមត្ថកិច្ចបានដេញចាប់ជនជាប់ចោទក្រោយធ្វើសកម្មភាពបាញ់លោក កែម ឡី ប៉ុន្មាននាទីក្រោយ។
សំណុំរឿងនេះត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ២៣ ខែ មីនា ឆ្នាំ ២០១៧ សម្រេចផ្តន្ទាទោសជនជាប់ចោទរូបនេះដាក់ពន្ធនាគារអស់ ១ ជីវិត ដោយចោទតាមមាត្រា ២០០ និងមាត្រា ៤៩០ នៃក្រមព្រហ្មទណ្ឌពីបទឃាតកម្មគិតទុកជាមុន និងបទប្រើប្រាស់អាវុធខុសច្បាប់។
សំណុំរឿងនេះត្រូវបានជនជាប់ចោទផ្តល់សិទ្ធិឲ្យលោកមេធាវី យុង ផានិត ប្តឹងទៅសាលាឧទ្ធរណ៍ដោយសារមិនសុខចិត្តនឹងទោស ១ ជីវិត ហើយត្រូវសាលាឧទ្ធរណ៍ប្រកាសសាលដីកាកាលពីថ្ងៃទី ១១ ខែ ឧសភា ឆ្នាំ ២០១៨ ដោយតម្កល់ទោសជនជាប់ចោទដាក់ពន្ធនាគារ ១ ជីវិតដដែល។
ពីម្សិលមិញ លោក ស៊ឹង បញ្ញាវុឌ្ឍ ប្រធានក្រុមប្រឹក្សាជំនុំជម្រះថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ២៤ ខែ ឧសភា ខាងមុខ៕
Subscribe to:
Post Comments
(
Atom
)
No comments :
Post a Comment