Wednesday, May 8, 2019
ការពិន័យធ្វើឲ្យប្រាក់ចំណេញសុទ្ធរបស់ក្រុមហ៊ុន BMW ធ្លាក់ខ្លាំង
ក្រុងហ្វ្រេងហ្វឺតៈ ក្រុមហ៊ុនផលិតរថយន្តតម្លៃខ្ពស់ BMW Group របស់ប្រទេស អាល្លឺម៉ង់ កាលពីថ្ងៃអង្គារ បានរាយការណ៍ពីការធ្លាក់ចុះប្រាក់ចំណេញនៅត្រីមាសទី១ ខណៈដែលក្រុមហ៊ុននេះបានកត់ត្រាទុកការចំណាយ ១,៤ ពាន់លានអឺរ៉ូ (១,៦ ពាន់លានដុល្លារ) សម្រាប់បញ្ហាដែលជាប់ទាក់ទងនឹងការស៊ើបអង្កេតដោយសហភាពអឺរ៉ុប (EU)។
ក្រុមហ៊ុន BMW បានឲ្យដឹងក្នុងសេចក្ដីប្រកាសព័ត៌មានមួយថា ប្រាក់ចំណេញសុទ្ធនៅក្នុងក្រុមហ៊ុន BMW Group បានធ្លាក់ចុះខ្លាំង ៧៤,២ ភាគរយធៀបនឹងរយៈពេលដូចគ្នាកាលពីឆ្នាំមុន មកនៅត្រឹម ៥៨៨ លានអឺរ៉ូ។
ក្រុមហ៊ុនផលិតរថយន្តដែលមានមូលដ្ឋាននៅទីក្រុងមុយនិចមួយនេះបានឲ្យដឹងថា ការចោទប្រកាន់របស់ទីក្រុងប៊្រុចសែលថា ក្រុមហ៊ុន BMW បានឃុបឃិតជាមួយក្រុមហ៊ុន Daimler និងក្រុមហ៊ុន Volkswagen ដើម្បីចៀសផុតពីការប្រកួតប្រជែងលើបច្ចេកវិទ្យាគ្រប់គ្រងការបំភាយឧស្ម័ន មានន័យថា «វាប្រហែលជាថា គណៈកម្មការអឺរ៉ុប នឹងចេញការផាកពិន័យដ៏ច្រើន»។
ក្រុមហ៊ុន BMW បានជូនដំណឹងរួចហើយទៅដល់ក្រុមវិនិយោគិន នៅពេលព័ត៌មានលម្អិតនៃការស៊ើបអង្កេតនេះត្រូវបានចេញផ្សាយកាលពីខែមុនថា ក្រុមហ៊ុនត្រូវតែលៃលកប្រាក់ទុកយ៉ាងហោចណាស់ ១ ពាន់លានអឺរ៉ូសម្រាប់បង់ការផាកពិន័យនេះ។
ប៉ុន្តែក្រុមហ៊ុនបានឲ្យដឹងថា អាជ្ញាធរទទួលបន្ទុកកិច្ចការប្រកួតប្រជែងកំពុងព្យាយាម «ធ្វើឲ្យមានទំនាក់ទំនងគ្នារវាងការសម្របសម្រួលផ្នែកតួនាទីឧស្សាហកម្មនានាដែលអាចអនុញ្ញាតឲ្យមានទាក់ទងនឹងក្របខ័ណ្ឌបទប្បញ្ញត្តិ ជាមួយកិច្ចព្រមព្រៀងរបស់ក្រុមហ៊ុនទាំងនេះដែលខុសច្បាប់»។
ក្រុមហ៊ុន BMW បានបន្ថែមថា៖ «ប្រសិនបើចាំបាច់ (ក្រុមហ៊ុន BMW) នឹងជំទាស់ទៅនឹងការចោទប្រកាន់របស់គណៈកម្មការអឺរ៉ុបដោយប្រើមធ្យោបាយស្របច្បាប់ទាំងអស់ដែលមាន»។
បន្ថែមលើការចំណាយនេះ ក្រុមហ៊ុនបានឲ្យដឹងថា ការចំណាយលើការស្រាវជ្រាវ និងកាអភិវឌ្ឍ និងការវិនិយោគដែលកំពុងកើនឡើងបានកាត់បន្ថយប្រាក់ចំណេញ ខណៈដែលប្រាក់ចំណូលបានធ្លាក់ចុះ ០,៩ ភាគរយ មកនៅត្រឹម ២២,៥ ពាន់លានអឺរ៉ូ។
មិនគិតពីផលប៉ះពាល់ទាំងនេះ ក្រុមហ៊ុន BMW សម្រេចបានអនុបាតប្រាក់ចំណេញប្រតិបត្តិការ ៥,៦ ភាគរយ៕ AFP/LA
Subscribe to:
Post Comments
(
Atom
)
No comments :
Post a Comment