Monday, May 20, 2019
ម្ចាស់ក្រុមហ៊ុន GCG Asia ត្រូវបានឃុំខ្លួន ពីបទប៉ុនប៉ងឆបោក
នាយកក្រុមហ៊ុន GCG ASIA ដែលត្រូវបានចាប់ខ្លួនសប្តាហ៍មុនពីបទប៉ុនប៉ងឆបោក។ |
ភ្នំពេញៈ បុរសម្ចាស់ក្រុមហ៊ុន GCG ASIA ដែលជាជនជាតិម៉ាឡេស៊ី ឈ្មោះ YAW FOO HOE ត្រូវបានតុលាការ សម្រេចឃុំខ្លួនជាបណ្តោះអាសន្ន ពីម្សិលមិញ ដោយចោទពីបទ «ប៉ុនប៉ងឆបោក» បន្ទាប់ពីមានប្រតិកម្មពីលោកនាយករដ្ឋមន្ត្រី ហ៊ុន សែន ខណៈក្រុមហ៊ុននេះយកឈ្មោះ និងរូបថតរបស់លោកទៅប្រើប្រាស់ក្នុងរូបភាពឆបោក និងក្លែងបន្លំ។
លោក លី សុផាណា អ្នកនាំពាក្យសាលាដំបូងរាជធានីភ្នំពេញបានថ្លែងពីម្សិលមិញថា ក្រោយពីបានទទួល និងពិនិត្យសំណុំរឿង ព្រមទាំងសាកសួរចម្លើយលើឈ្មោះ YAW FOO HOE ចប់សព្វគ្រប់ តំណាងអយ្យការ បានសម្រេចបើកការស៊ើបសួរ ដោយចោទប្រកាន់ពីបទ «ប៉ុនប៉ងឆបោក»តាមមាត្រា ៣៧៧ ៣៧៨ និងមាត្រា ៣៨១ នៃក្រមព្រហ្មទណ្ឌ។
លោកបញ្ជាក់ថា៖ «ដាក់ពន្ធនាគារព្រៃសជាបណ្តោះអាសន្ន បន្ទាប់ពីព្រះរាជអាជ្ញារងលោក តុប ឈុនឡុង បានចោទប្រកាន់ពីបទ «ប៉ុនប៉ងឆបោក» តាមមាត្រា ៣៧៧ មាត្រា ៣៧៨ និងមាត្រា ៣៨១ នៃក្រមព្រហ្មទណ្ឌ»។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិកាលពីម្សិលមិញបានថ្លែងថា ក្រុមហ៊ុន GCG ASIA Co., LTD ជាក្រុមហ៊ុនឆបោកលក្ខណអន្ដរជាតិ ហើយប្រទេសជាច្រើននៅតំបន់អាស៊ីបានរងគ្រោះដោយសារក្រុមហ៊ុននេះរួចហើយ។ លោកបន្តថា កម្លាំងនគរបាលជំនាញបានរកឃើញថា ក្រុមហ៊ុនមួយនេះ មិនបានចុះបញ្ជីត្រឹមត្រូវជាមួយធនាគារជាតិ និងក្រសួងស្ថាប័នពាក់ព័ន្ធទេ ដោយធ្លាប់រកស៊ីបោកប្រាស់នៅប្រទេសម៉ាឡេស៊ីនិងឥណ្ឌូនេស៊ី ប៉ុន្ដែត្រូវបានអាជ្ញាធរប្រទេសទាំង ២ ដឹងល្បិច ក៏រត់មកបោះមូលដ្ឋាននៅកម្ពុជាវិញ។
លោកបញ្ជាក់ថា៖ «ពលរដ្ឋខ្មែរ មិនទាន់ចាញ់បោកក្រុមហ៊ុននេះទេ មាន [អ្នកចាញ់បោក] ភាគច្រើនតែជនជាតិចិន ព្រោះក្រុមហ៊ុននេះដាក់លក់តែនៅក្រៅប្រទេសប៉ុណ្ណោះ ប៉ុន្តែមានស្នាក់ការនៅកម្ពុជា។ ក្រៅពីយើងបានសួរចម្លើយនេះ នៅ មានបញ្ហាដែលគួរឲ្យសង្ស័យមួយចំនួនទៀត។ ដូច្នេះ យើងក៏សម្រេចចិត្តបញ្ជូនទៅតុលាការបន្តទៀត ដើម្បីធ្វើការតាមនីតិវិធី។ ចំណែកភរិយាគាត់ និងសហការី គឺមិនមានកំហុសពាក់ព័ន្ធទេ ទើបយើងដោះលែងឲ្យត្រឡប់ទៅផ្ទះវិញ»។
តាមសេចក្ដីប្រកាសព័ត៌មានរបស់ធនាគារជាតិនៃកម្ពុជាចុះថ្ងៃទី ១៧ ខែ ឧសភា បង្ហាញថា ក្រុមហ៊ុនឈ្មោះ GCG ASIA Co., LTD បានផ្សាយព័ត៌មានមិនពិតអំពីការទទួលបានអាជ្ញាប័ណ្ណប្រកបអាជីវកម្មប្ដូរប្រាក់ពីធនាគារជាតិនៃកម្ពុជា និងបានប្រើប្រាស់ឈ្មោះ និងស្លាកសញ្ញាធនាគារជាតិនៃកម្ពុជាលើគេហទំព័ររបស់ខ្លួន ក្នុងគោលបំណងទុច្ចរិត។
សេចក្តីប្រកាសព័ត៌មានដដែល បានបន្តថា ធនាគារជាតិនៃកម្ពុជាមិនធ្លាប់បានផ្ដល់អាជ្ញាប័ណ្ណធ្វើប្រតិបត្តិការប្ដូរប្រាក់ ឬអាជ្ញាប័ណ្ណណាមួយដល់ក្រុមហ៊ុន GCG ASIA Co., LTD នេះទេ។ ធនាគារជាតិនៃកម្ពុជាសូមបដិសេធព័ត៌មានដែលបានផ្សព្វផ្សាយដោយក្រុមហ៊ុននេះ។
ធនាគារជាតិនៃកម្ពុជាបានបញ្ជាក់ថា៖ «ដើម្បីចៀសវាងពីការឆបោកណាមួយ សូមសាធារណជនមេត្តាប្រុងប្រយ័ត្ន ចំពោះព័ត៌មានផ្សេងៗដែលបានផ្សព្វផ្សាយដោយក្រុមហ៊ុនខាងលើនេះ ព្រោះធនាគារជាតិនៃកម្ពុជាធ្លាប់បានប្រកាសជូនដំណឹងដល់សាធារណជនរួចមកហើយអំពីការមិនទទួលស្គាល់ Cryto Currencies ឬឧបករណ៍ទូទាត់ដែលមានលក្ខណៈប្រហាក់ប្រហែល និងហានិភ័យពាក់ព័ន្ធ»។
មុនពេលសមត្ថកិច្ចឃាត់ខ្លួន លោកនាយករដ្ឋមន្ត្រី ហ៊ុន សែន បានសរសេរលើហ្វេសប៊ុកផ្លូវការរបស់លោកកាលពីថ្ងៃទី ១៦ ខែ ឧសភា ថា៖ កាលពីពេលថ្មីៗនេះ មានក្រុមហ៊ុនឈ្មោះ GCG Asia Co., LTD បានយករូបថតខ្ញុំ និងឈ្មោះខ្ញុំ ទៅបង្ហោះនៅក្នុង Website របស់ក្រុមហ៊ុន http://gcgasiacoin.com/ ដែលនិយាយថា ខ្ញុំជាអ្នកគាំទ្រ និងចូលរួមសម្ពោធកាត់ខ្សែបូក្រុមហ៊ុន នៅក្នុងប្រទេស កម្ពុជា នៅថ្ងៃទី ២០ ខែ ឧសភា ឆ្នាំ ២០១៩ ។
លោកបានបន្តថា ទន្ទឹមនឹងនោះ ក្រុមហ៊ុនបានយកឈ្មោះធនាគារជាតិ និងធនាគារចិននៅកម្ពុជាថា ជាដៃគូទទួលខុសត្រូវក្នុងជំនួញដូរលុយក្នុងរូបភាពគ្រីបតូឃឺរិនស៊ី (Crypto Currency)។ តាមព័ត៌មានពីស្ថានទូតឥណ្ឌូនេស៊ីនៅកម្ពុជាគឺបញ្ជាក់ថា GCG Asia ជាក្រុមហ៊ុនរកស៊ីមិនត្រឹមត្រូវ ហើយត្រូវបានដាក់ចូលក្នុង Black List។
លោកនាយករដ្ឋមន្ត្រីបញ្ជាក់ថា៖ «ក្នុងនាមខ្ញុំជានាយករដ្ឋមន្ត្រីនៃព្រះរាជាណាចក្រកម្ពុជា ខ្ញុំសូមបដិសេធព័ត៌មានដែលផ្សាយក្នុងវេបសាយរបស់ក្រុមហ៊ុនខាងលើនេះគឺមិនពិតទេ។ សូមអាជ្ញាធរ និងសមត្ថកិច្ចពាក់ព័ន្ធទាំងអស់ពិនិត្យតាមដាន និងស្រាវជ្រាវរកមុខជនខិលខូចយកមកផ្តន្ទាទោសតាមច្បាប់ជាធរមានជាបន្ទាន់»។
គួរបញ្ជាក់ថា ក្រុមហ៊ុន GCG Asia Co., LTD ជាក្រុមហ៊ុនជួញដូរលុយក្នុងរូបភាពគ្រីបតូឃឺរិនស៊ី (Crypto Currency) ដែលបានយកឈ្មោះ និងរូបថតលោក ហ៊ុន សែន នាយករដ្ឋមន្ដ្រីនៃកម្ពុជា ស្លាកសញ្ញាធនាគារជាតិនៃកម្ពុជា និងធនាគារចិន ទៅផ្សព្វផ្សាយនៅក្នុងគេហទំព័ររបស់ខ្លួន ដោយខុសច្បាប់ ដែលធ្វើឲ្យមានប្រតិកម្មភ្លាមៗពីរាជរដ្ឋាភិបាលកម្ពុជា។
ពេលនោះសមត្ថកិច្ច មន្ត្រីធនាគារជាតិ និងមន្ត្រីគណៈកម្មការមូលបត្រកម្ពុជា បានចុះទៅបិទជាបណ្ដោះអាសន្ន នៅសង្កាត់វត្តភ្នំ ខណ្ឌដូនពេញ រាជធានីភ្នំពេញកាលពីថ្ងៃទី ១៧ ខែ ឧសភា ឆ្នាំ ២០១៩ នេះ៕
Subscribe to:
Post Comments
(
Atom
)
No comments :
Post a Comment