2019

Thursday, June 27, 2019

អ្នកជំនាញ៖ កម្ពុជាអាចរួចផុតពីការចោទប្រកាន់ពីក្រុមលោកខាងលិចថា លម្អៀងទៅចិន

The more you read, the more you know June 27, 2019 No comments :

លោក សួស យ៉ារ៉ា អ្នកសម្របសម្រួលក្នុងកម្មវិធីសិក្ខាសាលា។

ភ្នំពេញៈ មន្ត្រីជំនាញនិងអ្នកស្រាវជ្រាវប្រមាណជិត ១០០ នាក់ ចូលរួមសិក្ខាសាលាស្ដីពីការវិវត្តនៃភូមិសាស្ដ្រនយោបាយ និងការលេចឡើងនៃសេដ្ឋកិច្ចឌីជីថលកាលពីម្សិលមិញនៅសាលបណ្ណាល័យព្រឹទ្ធសភាបានធ្វើបទបង្ហាញ និងកិច្ចពិភាក្សាស្ដីពីការវិវត្តនៃភូមិសាស្ត្រនយោបាយក្នុងក្របខ័ណ្ឌគំនិតផ្ដួចផ្ដើមផ្លូវមួយខ្សែក្រវាត់មួយ និងយុទ្ធសាស្ត្រឥណ្ឌូប៉ាស៊ីហ្វិក ក្នុងនោះអ្នកជំនាញខ្លះ បានអះអាងថា កម្ពុជាអាចរួចផុតពីការចោទប្រកាន់របស់ក្រុមប្រទេសលោកខាងលិចថាបានលម្អៀងខ្លាំងទៅរកចិន ប្រសិនបើកម្ពុជាអាចដោះស្រាយផលវិបាកមួយចំនួនដែលកំពុងបង្កឡើងដោយសារគំនិតផ្ដួចផ្ដើមខ្សែក្រវាត់ និងផ្លូវរបស់ចិន។

ការយល់ឃើញនេះ ស្របពេលការគាំទ្ររបស់កម្ពុជាដល់គំនិតខ្សែក្រវាត់ និងផ្លូវរបស់ប្រទេសចិន កំពុងធ្វើឱ្យកម្ពុជាជួបផលវិបាកមួយចំនួន ដូចជាបញ្ហាបរិស្ថាន ការគ្រប់គ្រង និងបញ្ហាសន្ដិសុខ។

លោក ឆេង គីមឡុង ប្រធានមជ្ឈមណ្ឌលនវានុវត្តន៍និងប្រជាធិបតេយ្យអភិបាលកិច្ចនៃវិទ្យាស្ថានចក្ខុវិស័យអាស៊ាន (AVI) លើកឡើងថា កម្ពុជាត្រូវបានគេរិះគន់ថា សុខចិត្តលម្អៀងទៅរកចិនដើម្បីទទួលបានផលប្រយោជន៍ពីគំនិតផ្ដួចផ្ដើមខ្សែក្រវាត់ និងផ្លូវរបស់ប្រទេស ចិន ហើយមិនគិតអំពីផលអវិជ្ជមានមួយចំនួនដែលកំពុងបង្កឡើងដោយសារគម្រោងនេះ ដែលលោកថា រដ្ឋាភិបាលកម្ពុជាត្រូវបន្ថែមការគិតគូរឲ្យបានខ្លាំងក្លាជាងមុន ដើម្បីដោះស្រាយផលវិបាកទាំងនោះ។

លោក គីមឡុង ថ្លែងថា៖ «មានការចោទប្រកាន់រិះគន់ទៅផលវិបាកលើបរិស្ថាន ការគ្រប់គ្រង ហើយសន្ដិសុខ ប៉ុន្តែខ្ញុំគិតថា នៅយុទ្ធសាស្ដ្របន្តទៀត ដែលរដ្ឋាភិបាលត្រូវតែគិតគូរឲ្យគត់មត់ និងស្រួចស្រាល់ ដើម្បីកាត់បន្ថយផលវិបាកទាំងអស់នោះ ហើយកាត់បន្ថយផលវិបាកទាំងអស់នោះ យើងអាចរួចផុតពីការចោទប្រកាន់ពីលោកខាងលិច ថាយើងងាកទៅចិនដើម្បីបានតែផលប្រយោជន៍ពីចិន ហើយមិនគិតអំពីផលអវិជ្ជមាននៃគម្រោង»។

ប្រទេសជាង ៧០ ហើយនៅក្នុងពិភពលោក បានគាំទ្រគំនិតផ្ដួចផ្ដើមខ្សែក្រវាត់ និងផ្លូវរបស់ប្រទេសចិនដែលបានប្រកាសឡើងតាំងពីឆ្នាំ ២០១៣។ ប៉ុន្តែគម្រោងដ៏មហិច្ឆតារបស់ប្រទេស ចិន ដែលផ្ដោតលើការផ្ដល់ប្រាក់កម្ចីសម្រាប់សាងសង់ហេដ្ឋារចនាសម្ព័ន្ធនេះ ត្រូវបានគេព្រួយបារម្ភថា នឹងធ្វើឱ្យប្រទេសមួយចំនួនធ្លាក់ចូលទៅក្នុងអន្ទាក់បំណុលរបស់ប្រទេស ចិន។

ទោះជាយ៉ាងណាកាលពីចុងខែមេសា នៅក្នុងវេទិកា «ខ្សែក្រវាត់និងផ្លូវ» លើកទី២ នៅក្នុងប្រទេស ចិន លោកនាយករដ្ឋមន្ត្រី ហ៊ុន សែន បានអះអាងថា កម្ពុជានឹងមិនធ្លាក់ចូលក្នុងអន្ទាក់បំណុលរបស់ប្រទេស ចិន ឡើយ ដោយសារកម្ពុជាជាប្រទេសឯករាជ្យ មានអធិបតេយ្យភាព ហើយកម្ពុជានឹងជ្រើសរើសយកគម្រោងណាដែលចាំបាច់សម្រាប់កម្ពុជាប៉ុណ្ណោះ។

ភ្នំពេញប៉ុស្ដិ៍មិនអាចទាក់ទងសុំការលើកឡើងជុំវិញបញ្ហានេះពីលោក មាស នី អ្នកវិភាគនយោបាយបានទេកាលពីថ្ងៃម្សិលមិញដោយសារលោកមិនលើកទូរស័ព្ទ។

លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានយល់ថា ទោះបីជាកម្ពុជាខំប្រឹងធ្វើល្អយ៉ាងណាក៏ដោយ ក៏មិនអាចគេចផុតពីការចោទប្រកាន់ពីក្រុមប្រទេសលោកខាងលិចឡើយ ព្រោះលោកថា ការចោទថាកម្ពុជាលម្អៀងទៅចិន មិនមែនដោយសាររឿងអសន្ដិសុខ សណ្ដាប់ធ្នាប់ ឬបរិស្ថានឡើយ ប៉ុន្តែដោយសារចិននិងសហរដ្ឋអាមេរិក កំពុងប្រកួតប្រជែងគ្នាដើម្បីពង្រីកឥទ្ធិពលរបស់ខ្លួននៅក្នុងតំបន់និងពិភពលោក។

លោក ភា ថ្លែងថា៖ «ពីព្រោះឥឡូវនេះយើងឃើញថា ចិនកំពុងធ្វើដំណើរយ៉ាងលឿននៅក្នុងការប្រកួតប្រជែងឥទ្ធិពលទាំងនយោបាយនិងសេដ្ឋកិច្ច ហើយជាប្រទេសធំទី២ ខាងសេដ្ឋកិច្ចបន្ទាប់ពីសហរដ្ឋអាមេរិក អ៊ីចឹងសហរដ្ឋអាមេរិកបារម្ភណាស់រឿងនេះ ហើយបើនិយាយដល់លោកខាងលិច គឺសហរដ្ឋអាមេរិកជាបងធំឬជាអ្នកបោះមេនេះឯង»។

លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីពេលថ្មីៗកន្លងមកបានប្រកាសថ្កោលទោសចំពោះអ្នករិះគន់អ្នកវិនិយោគចិននៅកម្ពុជា ដោយលោកបានឆ្លើយតបទៅកាន់ក្រុមអ្នករិះគន់ទាំងនោះថា អ្នកវិនិយោគចិន មិនបានមកដាក់អាណានិគមមកលើកម្ពុជាឡើយ ប៉ុន្តែវាជាភព្វសំណាងទៅវិញទេ ដែលកម្ពុជាទទួលបានអ្នកវិនិយោគពីប្រទេសនេះ ពីព្រោះប្រទេសនៅក្នុងពិភពលោក កំពុងទាក់ទាញចង់បានអ្នកវិនិយោគ និងអ្នកទេសចរចិន៕

៦ ខែ គ្រុនឈាមកើតជាង ១ ម៉ឺនករណី ខណៈក្រសួងត្រៀមទប់ទល់

The more you read, the more you know June 27, 2019 No comments :

កុមារកំពុងត្រូវបានព្យាបាលជំងឺគ្រុនឈាម នៅមន្ទីរពេទ្យកុមារជាតិ កាលពីថ្ងៃម្សិលមិញ។

ភ្នំពេញ: រយៈពេល ៦ ខែក្នុងឆ្នាំនេះ ជំងឺគ្រុនឈាមបានកើតឡើងជាង ១ ម៉ឺនករណី ក្នុងនោះមានមនុស្សស្លាប់ចំនួន ២៤ នាក់ ដែលជាការកើនឡើង ៥ ដង បើប្រៀបធៀបនឹងរយៈពេលដូចគ្នាកាលពីឆ្នាំមុន ដែលមានមនុស្សស្លាប់ត្រឹមតែ ៧ នាក់ប៉ុណ្ណោះ ប៉ុន្ដែមន្ត្រីបានអះអាងថា ក្រសួងសុខាភិបាលបានត្រៀមខ្លួនទប់ទល់រួចរាល់ហើយ។

ការបង្ហាញនេះ បានធ្វើឡើងក្នុងសន្និសីទសារព័ត៌មានមួយកាលពីម្សិលមិញស្តីពី «ស្ថានភាពជំងឺគ្រុនឈាមនាពេលបច្ចុប្បន្ន» ដើម្បីបង្ហាញពីស្ថានភាពជាក់ស្តែងនៃជំងឺនេះ ចំណាត់ការឆ្លើយតប បញ្ហាប្រឈម និងការចែករំលែកបទពិសោធពីមន្ទីរពេទ្យកុមារជាតិ ដែលរៀបចំឡើងដោយលោក ផៃ ស៊ីផាន អ្នកនាំពាក្យរដ្ឋាភិបាល និងមានវាគ្មិនពីតំណាងក្រសួងសុខាភិបាល តំណាងមន្ទីរពេទ្យកុមារជាតិ និងតំណាងលោកស្រី ហ៊ុន ម៉ាណា ព្រមទាំងមានក្រុមគ្រូពេទ្យប្រមាណជិត ១០០ នាក់ នៅមន្ទីរពេទ្យកុមារជាតិ។

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ដ្រ និងបាណកសាស្ដ្រនៃក្រសួងសុខាភិបាលបានថ្លែងថា ស្ថានភាពជំងឺគ្រុនឈាមនៅក្នុងឆ្នាំ ២០១៩ គិតត្រឹមចុងសប្ដាហ៍នេះ បានកើតឡើងចំនួន ១៣ ០០០ ករណី។ ក្នុងនោះមានមនុស្សចំនួន ២៤ នាក់ បានស្លាប់នៅក្នុងមន្ទីរពេទ្យ ដោយសារស្ថានភាពអ្នកជំងឺធ្ងន់ធ្ងរខ្លាំង ហើយបានមករកពេទ្យជំនាញយឺតពេលវេលា។

លោកបានបន្តថា បើប្រៀបធៀបនៅឆ្នាំ ២០១៨ គេសង្កេតឃើញថា ជំងឺគ្រុនឈាមកើនឡើងចំនួន ៥ ដង ខណៈនៅឆ្នាំ ២០១៨ មានមនុស្សស្លាប់តែ ៧ នាក់ប៉ុណ្ណោះ។ ជំងឺគ្រុនឈាមនៅកម្ពុជា មិនមែនមានន័យថា កើតឡើងនៅពេញផ្ទៃប្រទេសទេ តែវាកើតឡើងតាមតំបន់ដែលសើមហើយស្ងួតខ្លាំងជាងគេ។

លោកបញ្ជាក់ថា៖ «រាល់អ្នកជំងឺដែលបានមកទទួលសេវាពិនិត្យ ពិគ្រោះជំងឺ ថែទាំជំងឺ និងព្យាបាលទាន់ពេលវេលា គឺឈឺត្រឹមតែ ២៤ ម៉ោង បន្ទាប់ពីអ្នកជំងឺក្ដៅខ្លួន ហើយចូលមកដល់មន្ទីរពេទ្យជំនាញទាន់ពេល គឺមិនមានអ្នកស្លាប់ទេ។ អ៊ីចឹងអ្នកទាំង ២៤ ដែលស្លាប់នោះ សុទ្ធតែចូលមកមន្ទីរពេទ្យខណៈកំពុងធ្ងន់ធ្ងរខ្លាំង មានន័យថា វាជ្រុលពេលទៅហើយ »។

លោក ផៃ ស៊ីផាន (ឆ្វេង) និងមន្ត្រី ក្នុងពិធីកាលពីម្សិលមិញ។

លោកបន្ថែមថា មូលហេតុដែលជំងឺគ្រុនឈាមមានការកើនឡើងនេះព្រោះវាជាវដ្ដតូចចាប់ពី ៥ ឬ ៦ ឆ្នាំម្ដង បណ្ដាលមកពីអាកាសធាតុប្រែប្រួលខ្លាំង ប្រសិនបើទឹកភ្លៀងធ្លាក់លើដីឡើងដល់ ១ មិល្លីម៉ែត្រ ប្រឈមកើតជំងឺគ្រុនឈាម ១១ ភាគរយ និងភ្លៀងជាប្រចាំថ្ងៃ វានឹងប្រឈមលើសពីនេះ។ ចំណែកវដ្ដធំចាប់ពី ១០ ទៅ ១២ ឆ្នាំម្ដង ហើយវដ្ដធំនេះ គឺទាក់ទងកត្តាជីវសាស្ត្រ និងប្រព័ន្ធការពារសរីរាង្គក្នុងខ្លួនមនុស្សចុះខ្សោយ បើប្រព័ន្ធការពារខ្សោយ វាប្រឈមមុខនឹងជំងឺគ្រុនឈាម តាមរយៈមូសខ្លាញីខាំ។

លោកវេជ្ជបណ្ឌិត ញឹប អង្គាបុស្ស ប្រធានមន្ទីរពេទ្យកុមារជាតិបានថ្លែងថា មន្ទីរពេទ្យកុមារជាតិទទួលអ្នកជំងឺគ្រុនឈាមជាមធ្យមជាង ៣០០ នាក់ក្នុង ១ ថ្ងៃ។ បើគិតពីដើមឆ្នាំ ២០១៩ មកដល់ថ្ងៃទី ២៦ ខែ មិថុនា មន្ទីរពេទ្យកុមារជាតិ ទទួលបានការចូលមកព្យាបាលពីអ្នកជំងឺគ្រុនឈាម ៣ ពាន់នាក់ ក្នុងនោះមានមនុស្ស ៤ នាក់បានស្លាប់។

លោកបានបន្តថា ឆ្លើយតបនឹងបញ្ហាជំងឺគ្រុនឈាមដែលបានផ្ទុះឡើងនៅក្នុងឆ្នាំនេះ ក្រសួងសុខាភិបាល ក៏បានដាក់ចេញវិធានការមួយចំនួនដើម្បីបង្ការ និងទប់ស្កាត់ជំងឺនេះ ដូចជា ការអប់រំប្រជាពលរដ្ឋក្នុងការការពារតាមវិធីសាស្ត្រមួយចំនួន ការបាញ់ថ្នាំសម្លាប់មូសតាមកន្លែងរស់នៅ ការចែកមុងជ្រលក់ថ្នាំ ព្រមទាំងត្រៀមសម្ភារ និងបណ្ដុះបណ្ដាលជំនាញព្យាបាលរករោគវិនិច័្ឆយគ្រុនឈាម។

លោកវេជ្ជបណ្ឌិត បញ្ជាក់ថា៖ «ជាមួយគ្នានោះ ក្រសួងសុខាភិបាល ក៏បានជំរុញលើកទឹកចិត្ដដល់ក្រុមគ្រូពេទ្យ ត្រូវខិតខំប្រឹងប្រែងបន្ថែមទៀត ជាមួយនឹងការយកចិត្ដទុកដាក់ខ្ពស់ដើម្បីសង្គ្រោះអ្នកជំងឺ ប្រកបដោយប្រសិទ្ធភាព និងឆាប់រហ័សបំផុតតាមដែលអាចធ្វើទៅបាន»។

លោក វេជ្ជបណ្ឌិត អ៊ុង សុផល ប្រធានអនុគណៈកម្មការគ្រប់គ្រងផ្នែកគ្លីនិកនៃជំងឺគ្រុនឈាម បានថ្លែងថា សម្រាប់ឆ្នាំនេះ គឺជាឆ្នាំផ្ទុះឡើងជំងឺគ្រុនឈាមខ្លាំងបំផុត ក្នុងរយៈពី ៦ ទៅ ៧ ឆ្នាំម្ដង ប៉ុន្តែក្រសួងសុខាភិបាលបានត្រៀមខ្លួនគ្រប់គ្រាន់ហើយ ទាំងការព្យាបាលដល់ពលរដ្ឋ និងវិធានការទប់ស្កាត់មូសខ្លា។

លោកបញ្ជាក់ថា៖ «យើងបានត្រៀមសេរ៉ូមព្យាបាលជិត ៧ ម៉ឺនប្លោក ថ្នាំអាបែត ១៧២ តោន និងថ្នាំបាញ់កម្ចាត់សត្វមូស ៧ ពាន់លីត្រ ដែលទឹកថ្នាំនេះ គឺជាជម្រើសចុងក្រោយត្រូវយកទៅបាញ់នៅទីតាំងណាដែលកំពុងប្រឈមខ្លាំងបំផុតនឹងជំងឺគ្រុនឈាម»។

តាមរបាយការណ៍របស់មន្ទីរពេទ្យគន្ធបុប្ផាភ្នំពេញ និងសៀមរាប បានបង្ហាញនៅចុងខែនេះថា ក្នុងរយៈពេល ៥ ខែនៃឆ្នាំ ២០១៩ នេះ មានកុមារជាង ៣៧ ម៉ឺននាក់ បានចូលពិនិត្យព្យាបាលនៅក្នុងផ្នែកពិគ្រោះជំងឺក្រៅ ក្នុងនោះជាង ៧ ម៉ឺននាក់មានជំងឺគ្រុនឈាមបានចូលសម្រាកព្យាបាលនៅមន្ទីរពេទ្យ។

មន្ទីរពេទ្យគន្ធបុប្ផាបញ្ជាក់ថា ក្នុងរយៈពេលដដែលនេះកុមារជាង ៧ ពាន់នាក់ មានជំងឺគ្រុនឈាមធ្ងន់ធ្ងរ បានចូលទៅសម្រាកព្យាបាលនៅទីនោះ ហើយកុមារដែលទទួលបានការវះកាត់បេះដូងមានជាង ៣០០ នាក់។ ចំណែកផ្នែកសម្ភពវិញ ស្ត្រីមានផ្ទៃពោះចំនួនជាង ៦ ម៉ឺននាក់ បានមកពិនិត្យតាមដានផ្ទៃពោះ និងព្យាបាល ហើយសម្រាលកូនបានជាង ១ ម៉ឺននាក់៕

ACU បំភ្លឺករណីបណ្ដឹងចោទនាយករង ប.ជ.ស

The more you read, the more you know June 27, 2019 News No comments :

អ្នកដំណើរដើរកាត់អង្គភាព ACU ដែលមានទីតាំងស្ថិតនៅតាមបណ្ដោយផ្លូវព្រះនរោត្តម។

ភ្នំពេញៈ អង្គភាពប្រឆាំងអំពើពុករលួយ (ACU) បានបំភ្លឺលើបណ្ដឹងប្រឆាំងលោក គីម សុវណ្ណឌី នាយករងបេឡាជាតិសន្តិសុខសង្គមសម្រាប់មន្ត្រីរាជការស៊ីវិល (ប.ជ.ស) ករណីប្រព្រឹត្ដអំពើពុករលួយ ក្រោយពីបានស៊ើបអង្កេតអស់ពេល ១១ ខែ។ នេះបើតាមសេចក្ដីជូនដំណឹងរបស់ (ACU) ផ្ញើទៅលោក គីម សុវណ្ណឌី កាលពីថ្ងៃទី ១៤ ខែ មិថុនា ដែលទើបផ្សព្វផ្សាយកាលពីថ្ងៃទី ២៦ ខែ មិថុនា។

តាមអត្ថបទស៊ើបអង្កេតរបស់ ACU ពាក់ព័ន្ធការចោទប្រកាន់លើលោក គីម សុវណ្ណឌី បានបង្ហាញថា តាមបណ្ដឹងលេខ ០៣២២/១៤ បានចោទប្រកាន់លោក គីម សុវណ្ណឌី (១) ករណីកិបកេងប្រាក់រំឭករបស់គ្រួសារសពមន្ដ្រីចូលនិវត្តន៍ (២) ករណីបង្កើតបេសកកម្មខ្យល់។

ACU បានបំភ្លឺថា ក្រោយពីធ្វើការស្រាវជ្រាវ តាមដាន ប្រមូលព័ត៌មានបន្ថែមពីសាក្សី និងការបកស្រាយពីលោក គីម សុវណ្ណឌី ដែលជាសាមីរងការចោទប្រកាន់ផងនោះ ACU អាចបូកសរុបលទ្ធផលដំបូងក្រោយធ្វើការងារលើបណ្ដឹងនេះរយៈពេល ១១ ខែ។

ទាក់ទងនឹងការចោទប្រកាន់ថា លោក សុវណ្ណឌី កិបកេងប្រាក់រំឭកសពរបស់គ្រួសារសពមន្ដ្រីចូលនិវត្តន៍ ACU បានបង្ហាញលទ្ធផលថា មន្ដ្រីចូលនិវត្ដន៍ដែលទទួលមរណភាពទទួលបានប្រាក់របបសន្តិសុខសង្គម ១២ ខែនៃប្រាក់បៀវត្សរ៍មូលដ្ឋាន ហើយដើម្បីទទួលបានប្រាក់របបនេះ គ្រួសារសពត្រូវមកបំពេញឯកសារស្នើសុំផ្ទាល់។

បើតាម ACU ក្នុងឆ្នាំ ២០១៧-២០១៨ ថវិកាសម្រាប់បើកជូនគ្រួសារសពនិវត្ដជន ស្ថិតក្រោមការគ្រប់គ្រងរបស់មន្ទីរសង្គមកិច្ច អតីតយុទ្ធជន និងយុវនីតិសម្បទា។ រាល់ការដោះស្រាយបញ្ហាប្រាក់រំឭកសពនិវត្ដជន គឺមន្ទីរសង្គមកិច្ច រៀបចំស្នើសុំគោលការណ៍មក (ប.ជ.ស) ដើម្បីលុបឈ្មោះសពដែលត្រូវចេញប្រកាសដោយក្រសួងសង្គមកិច្ច ទើបមន្ទីរមានមូលដ្ឋានស្នើសុំថវិកាពីមន្ទីរសេដ្ឋកិច្ច និងហិរញ្ញវត្ថុ និងរតនាគារ រាជធានី-ខេត្ដ។

ACU បង្ហាញទៀតថា បន្ទាប់ពីឯកភាពពីមន្ទីរពាក់ព័ន្ធ មន្ទីរសង្គមកិច្ច ត្រូវរៀបចំបោះផ្សាយអាណត្ដិផ្ញើជូនអគ្គនាយកដ្ឋានរតនាគារជាតិ និងថតចម្លង ១ ច្បាប់ មក (ប.ជ.ស) ដើម្បីឲ្យ (ប.ជ.ស) រៀបចំស្នើថវិកាពីអគ្គនាយកដ្ឋានរតនាគារជាតិ សម្រាប់បើកជូនគ្រួសារសពនិវត្ដជនទៅតាមការស្នើសុំរបស់ មន្ទីរសង្គមកិច្ចតាមរយៈការចុះបើកដោយមន្ដ្រី (ប.ជ.ស) ប្រធានមន្ទីរនិងមន្ដ្រីទទួលបន្ទុក (ប.ជ.ស) រាជធានី ខេត្ដ។

ទោះយ៉ាងណា ACU បានបញ្ជាក់ថា ការដោះស្រាយបញ្ហាថវិការំឭកសពនិវត្ដជន ក្នុងឆ្នាំ ២០១៧-២០១៨ មានការយឺតយ៉ាវ ពី ៣ ទៅ ៦ ខែ ដោយសារមាននីតិវិធីច្រើន ដូចនេះ ហើយនៅឆ្នាំ ២០១៩ ក្រសួងសេដ្ឋកិច្ច និងហិរញ្ញវត្ថុបានសម្រេចផ្ទេរថវិការំឭកសពឲ្យស្ថិតនៅក្រោមការគ្រប់គ្រងរបស់បេឡាជាតិសន្ដិសុខសង្គមវិញដើម្បីកាត់បន្ថយនីតិវិធីមួយចំនួន សំដៅដោះស្រាយបញ្ហាថវិការំឭកសពឲ្យបានលឿន និងទាន់ពេលវេលា។

ទាក់ទងនឹងបណ្ដឹងលើការបង្កើតបេសកកម្មខ្យល់ ACU បានបង្ហាញលទ្ធផលថា ការចុះបំពេញបេសកកម្មតាមបណ្ដារាជធានីខេត្ដ ត្រូវធ្វើឡើងជារៀងរាល់ខែ ដោយចែកជា ២ វគ្គ ក្នុង ១ វគ្គមាន ៤ ក្រុម ហើយក្នុង ១ ក្រុម មានសមាជិក ១៣ នាក់។ ក្រុមនីមួយៗមាននាយករង ១ រូបជាអ្នកដឹកនាំ និងចាត់ចែងការងារ រួមមាន ការចុះធ្វើបច្ចុប្បន្នភាពនិវត្ដជន ការចុះបើកផ្ដល់ថវិកាសព ការចុះបើកផ្ដល់ថវិកាអ្នកនៅក្នុងបន្ទុកតាមមូលដ្ឋាន ការចុះត្រួតពិនិត្យនិវត្ដជន និងជនបាត់បង់សម្បទាវិជ្ជាជីវៈ ដែលបានផ្ទេរសិទ្ធិ។

ACU បន្ថែមថា ទន្ទឹមនឹងការចុះបំពេញបេសកកម្មជាទៀងទាត់ (ប.ជ.ស) ក៏បានចុះដោះស្រាយការងារតាមបណ្ដឹង និងសំណើរបស់ការិយាល័យបេឡាជាតិសន្ដិសុខសង្គមរាជធានី-ខេត្ដ។ មុនចុះបំពេញបេសកកម្ម ក្រុមនីមួយៗទទួលបានរបបបេសកកម្មតាមគោលការណ៍កំណត់ដោយក្រសួងសេដ្ឋកិច្ច និងហិរញ្ញវត្ថុដោយមិនមានកាត់កងអ្វីទាំងអស់។

ក្រៅពីការបំភ្លឺនេះ ACU ក៏បានជូនដំណឹងពីការទទួលលិខិតបំភ្លឺរបស់លោក គីម សុវណ្ណឌី ចុះថ្ងៃទី ១៩ ខែ មេសា ឆ្នាំ ២០១៩ ពាក់ព័ន្ធ នឹងការចោទប្រកាន់ទាំង ២ ករណីនេះផងដែរ។

តំណាង ACU ថា៖ «ខ្ញុំសូមជម្រាបលោកនាយករងថា អង្គភាពប្រឆាំងអំពើពុករលួយបានទទួល និងពិនិត្យលើលិខិតបំភ្លឺរបស់លោករួចហើយ។សុំឲ្យលោកធ្វើការបិទផ្សាយអត្ថបទស៊ើបអង្កេតរបស់ ACU ជាសាធារណៈនៅក្រសួងសង្គមកិច្ច អតីត យុទ្ធជន និងយុវនីតិសម្បទា រយៈពេល ១ ខែយ៉ាងតិច គិតចាប់ពីថ្ងៃដែលលោកបានទទួលលិខិតនេះ»។

ភ្នំពេញប៉ុស្ដិ៍ មិនអាចសុំការបកស្រាយបន្ថែមពី លោក ជាវ ប៊ុនរិទ្ធ អ្នកនាំពាក្យបេឡាជាតិសន្តិសុខសង្គម និងលោក តូច ចាន់នី អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទាបានទេ ដោយសារ មិនមានអ្នកលើកទូរស័ព្ទ៕

រាជរដ្ឋាភិបាល ចាត់វិធានការលើបារីខុសច្បាប់

The more you read, the more you know June 27, 2019 News No comments :

សមាគមឧស្សាហកម្មថ្នាំជក់កម្ពុជា (ATIC) គាំទ្រវិធានការរបស់រាជរដ្ឋាភិបាលក្នុងការលុបបំបាត់ទាំងស្រុងនូវបារីដែលគ្មានតែមប្រិ៍អាករស្របច្បាប់

សមាគមឧស្សាហកម្មថ្នាំជក់កម្ពុជាហៅកាត់ជាភាសាអងស់គ្លេសថា ‘ATIC’បានគាំទ្រយ៉ាងពេញទំហឹងដល់ការខំប្រឹងប្រែងរបស់ក្រសួងសេដ្ឋកិច្ច និងហិរញ្ញវត្ថុក្នុងការបង្កើតក្រុមការងារចម្រុះរវាងអគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករកម្ពុជា ដើម្បីចាត់វិធានការលើផលិតផលបារីដែលមិនមានបិទតែមប្រិ៍អាករស្របច្បាប់នៅក្នុងព្រះរាជាណាចក្រកម្ពុជា។

ដូចមានចែងក្នុងសេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុចុះថ្ងៃទី ១២ ខែ មិថុនា ឆ្នាំ ២០១៩ ស្តីពីការអនុវត្តកាតព្វកិច្ចបិទតែមប្រិ៍អាករប្រភេទថ្មីសម្រាប់បារីចំពោះម្ចាស់សហគ្រាសផលិតផលបារីក្នុងស្រុក បារីនាំចូល អ្នកលក់ និងអ្នកចែកចាយបារីក្នុងស្រុកទាំងអស់ចុះហត្ថលេខាដោយឯកឧត្តមអគ្គបណ្ឌិតសភាចារ្យ អូនព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានជូនដំណឹងថា "ចាប់ពីថ្ងៃទី ០១ ខែ កក្កដា ឆ្នាំ ២០១៩ ក្រុមការងារចម្រុះនឹងចុះត្រួតពិនិត្យឃ្លាំងស្តុកទុកបារីនៅតាមបណ្តាសហគ្រាសផលិតបារីក្នុងស្រុក សហគ្រាសនាំចូលបារី ដេប៉ូចែកចាយ ស្តង់លក់បារីនៅតាមទីផ្សារ ហាងលក់ទំនិញធំៗ ផ្សារទំនើបនានាក្នុងរាជធានីភ្នំពេញ និងតាមបណ្តាខេត្តនានា »។

ក្នុងកំឡុងពេលកំពុងចុះត្រួតពិនិត្យប្រសិនបើឃើញមានបារីដែលដាក់លក់ក្នុងឃ្លាំងស្តុក ឬកំពុងតាំងលក់ បិទតែមប្រិ៍ប្រភេទចាស់ មិនមានបិទតែមប្រិ៍អាករ ឬបិទតែមប្រិ៍ក្លែងក្លាយនោះ ក្រុមការងារចម្រុះនៃក្រសួងសេដ្ឋកិច្ច និងហិរញ្ញវត្ថុនឹងធ្វើការឃាត់ទុក និងគ្រប់គ្រងបារីទាំងនោះ ហើយតម្រូវឲ្យអ្នកផលិតបារី អ្នកនាំចូលបារី ឬម្ចាស់បារីទាំងនោះទទួលខុសត្រូវចំពោះមុខច្បាប់” ។

សេចក្តីថ្លែងការណ៍រួមរបស់សមាគម ATIC បានថ្លែងថាសមាគមបានខិតខំប្រឹងប្រែងយ៉ាងខ្លាំងក្នុងការលើកកម្ពស់ស្តង់ដារឧស្សាហកម្មតែមួយ ដោយមានការប្តេជ្ញាចិត្តខ្ពស់ និងយុទ្ធសាស្ត្រដើម្បីធានាឲ្យមានការប្រកួតប្រជែងដោយស្មើភាពគ្នារវាងក្រុមហ៊ុនបារីទាំងអស់។ យើងនឹងរួមគ្នាដើម្បីដោះស្រាយបញ្ហាដែលនាំមកនូវហានិភ័យដល់ឧស្សាហកម្មថ្នាំជក់ស្របច្បាប់ និងអ្នកប្រើប្រាស់រួមមានការលក់បារីខុសច្បាប់ បារីក្លែងក្លាយ បារីដែលមិនមានសារព្រមានសុខភាព និងបារីដែលមិនមានបិទតែមប្រិ៍អាករស្របច្បាប់។

សមាគមបាននិយាយថា "កិច្ចខិតខំប្រឹងប្រែងរបស់យើងគឺស្របទៅនឹងការប្តេជ្ញាចិត្តរបស់រាជរដ្ឋាភិបាលកម្ពុជាតាមរយៈការបង្កើតក្រុមការងារចម្រុះមួយនេះហើយយើងនឹងប្រឹងប្រែងយ៉ាងមុតមាំក្នុងការលើកកម្ពស់ការអនុវត្តវិធានការនេះ ដើម្បីលុបបំបាត់បារីខុសច្បាប់ទាំងនោះ" ។

នៅឆ្នាំ 2018 ការជួញដូរបារីខុសច្បាប់បានបន្តហូរចូលទីផ្សារកម្ពុជារហូតដល់ 10% នៃចំនួនបារីទាំងអស់។ បារីទាំងនោះមិនមានបោះពុម្ភសារព្រមានសុខភាពបិទតែមប្រិ៍អាករស្របច្បាប់ និងគ្មានគុណភាពឡើយ។ ជាមួយនឹងតួលេខទាំងនេះរដ្ឋាភិបាលកម្ពុជាបានបាត់បង់ចំណូលរដ្ឋប្រមាណជាង 10 លានដុល្លារក្នុងមួយឆ្នាំ។

គ្រឿងញៀន និងសារធាតុញៀនជាង ២ តោន ត្រូវបានដុតបំផ្លាញ

The more you read, the more you know June 27, 2019 News No comments :

លោក ស ខេង រដ្ឋមន្ត្រីក្រសួងមហាផ្ទៃ បញ្ជាឲ្យមន្ត្រីមានសមត្ថកិច្ច ត្រូវលុបបំបាត់នូវរាល់បទល្មើស ជួញដូរ និងប្រើប្រាស់គ្រឿងញៀនតាមក្លិបកម្សាន្ត និងទីសប្បាយនានា មុនដំណាច់ឆ្នាំ ២០១៩ និងព្រមានចាត់វិធានការ ចំពោះមន្ត្រីទាំងឡាយណាដែលពាក់ព័ន្ធ និងកាងធ្វើជាខ្នងបង្អែកសម្រាប់ ឲ្យជនល្មើសប្រព្រឹត្តនូវបទល្មើសគ្រឿងញៀន។

ក្រសួងឲ្យប្រើពេល ៧ ថ្ងៃ ដើម្បីពិនិត្យគុណភាពសំណង់នៅខេត្តព្រះសីហនុ

The more you read, the more you know June 27, 2019 News No comments :

លោក ជា សុផារ៉ា ថ្លែងនៅក្នុងកិច្ចប្រជុំ ម្សិលមិញ។

ព្រះសីហនុៈ លោក ជា សុផារ៉ា បានស្នើឲ្យគណៈកម្មការ និងក្រុមការងារបច្ចេកទេស ចាប់ផ្តើមអនុវត្តការងាររយៈពេល ១ សប្តាហ៍ ដើម្បីត្រួតពិនិត្យទៅលើគុណភាព និងលក្ខណៈបច្ចេកទេសសំណង់ទាំងអស់នៅខេត្តព្រះសីហនុ ដោយត្រូវប្រតិបត្តិឲ្យបានហ្មត់ចត់សុក្រឹត និងគោរពវិជ្ជាជីវៈ ខណៈដែលអភិបាលរាជធានីភ្នំពេញ បានព្រមានអភិបាលខណ្ឌទាំង ១៤ ឲ្យទទួលខុសត្រូវចំពោះមុខច្បាប់ ប្រសិនបើសំណង់គ្មានច្បាប់អនុញ្ញាតត្រូវបានសាងសង់ឡើង នៅក្នុងដែនដីរបស់ខ្លួន។

កិច្ចប្រជុំស្តីពីបញ្ហាសំណង់នៅខេត្តព្រះសីហនុ ត្រូវបានធ្វើឡើងភ្លាមៗ កាលពីថ្ងៃអង្គារ បន្ទាប់ពីមានឧបទ្ទវហេតុបាក់រលំអគារកម្ពស់ ៧ ជាន់កាលពីព្រឹកព្រលឹមថ្ងៃទី ២២ ខែ មិថុនា ឆ្នាំ ២០១៩ ដែលបានបណ្តាលឲ្យមានមនុស្សស្លាប់ ២៨ នាក់ និងរបួស ២៦ នាក់។

កិច្ចប្រជុំស្តីពីបញ្ហាសំណង់នៅខេត្តព្រះសីហនុបានធ្វើឡើង ដោយមានការចូលរួមពីលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមការងារថ្នាក់ជាតិ ចុះជួយខេត្តព្រះសីហនុ និងលោក គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងលោក យន្ត មីន អភិបាលខេត្តព្រះសីហនុ ព្រមទាំងមានការចូលរួមពីម្ចាស់សំណង់ និងក្រុមហ៊ុនម៉ៅការសំណង់ ប្រមាណ ១៦៥ ក្រុមហ៊ុន នៅខេត្តព្រះសីហនុផងដែរ ក្នុងគោលបំណងត្រួតពិនិត្យគុណភាព និងលក្ខណៈបច្ចេកទេសនៃសំណង់ទាំងអស់ដែលបាននិងកំពុងសាងសង់នៅលើទឹកដីក្រុងព្រះសីហនុ។

ថ្លែងក្នុងកិច្ចប្រជុំបន្ទាន់នេះ លោក ជា សុផារ៉ា បានណែនាំមន្ត្រីឲ្យត្រួតពិនិត្យការដ្ឋានសំណង់ទាំងអស់ឲ្យបានត្រឹមត្រូវ មុនអនុញ្ញាតឲ្យសាងសង់បន្តទៀតត្រូវមានច្បាប់អនុញ្ញាតលិខិតបើកការដ្ឋានជាដើម។

លោកបន្តថា៖ «រាល់សំណង់ដែលគ្មានច្បាប់ចាប់ពីពេលនេះទៅ អាជ្ញាធរត្រូវដាក់ពាក្យបណ្តឹងទៅព្រះរាជអាជ្ញា ដើម្បីដោះស្រាយតាមច្បាប់។ ចំពោះមុខនេះ យើងនឹងបង្កើតគណៈកម្មការ ដើម្បីចុះត្រួតពិនិត្យរាល់សំណង់ទាំងអស់់»។

លោកបញ្ជាក់ថា គណៈកម្មការនឹងចុះធ្វើការងារនេះ ដោយប្រាកដប្រជាបំផុត និងព្រមទាំងបានរំឭក ម្ចាស់សំណង់ទាំងអស់ឲ្យត្រៀមឯកសារទាក់ទិននឹងសំណង់របស់ខ្លួន និងកុំមានទម្លាប់ហុចស្រោមសំបុត្រពេលគណៈកម្មការចុះទៅ។

លោក សុផារ៉ា បានស្នើឱ្យក្រុមការងារបច្ចេកទេសទាំង ៨ ក្រុមនៃគណៈកម្មការត្រួតពិនិត្យគុណភាពសំណង់ នៅខេត្ដព្រះសីហនុនេះ ត្រូវធ្វើតាមជំនាញ។

លោកថា៖ «ការបំពេញបេសកកម្ម គឺអនុវត្តតាមជំនាញ និងវិជ្ជាជីវៈប្រកបដោយក្រមសីលធម៌ត្រឹមត្រូវ ដើម្បីទាក់ទាញវិនិយោគកាន់តែធំ កាន់តែច្រើន កាន់តែល្អថែមទៀត នៅក្នុងខេត្តព្រះសីហនុ តាមគោលបំណង និងការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា»។

តាមរបាយការណ៍កិច្ចប្រជុំខាងលើ បានស្នើគណៈកម្មការ និងក្រុមការងារបច្ចេកទេស ចាប់ផ្តើអនុវត្តការងារ រយៈពេល ១ សប្តាហ៍ក្នុងជំហានដំបូង ដោយត្រូវប្រតិបត្តិឲ្យបានហ្មត់ចត់ សុក្រឹត និងគោរពក្រមសីលធម៌វិជ្ជាជីវៈ។

លោក ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ដែលជាប្រធានគណៈកម្មការត្រួតពិនិត្យគុណភាពសំណង់ នៅខេត្ដព្រះសីហនុ បានបដិសេធធ្វើអត្ថាធិប្បាយដោយថ្លែងថា ជាប់បំពេញការងារ។

ប៉ុន្តែលោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុបានថ្លែងថា ក្រុមការងារបច្ចេកទេសទាំង ៨ ក្រុមខាងលើ បង្កើតឡើងដើម្បីគាំទ្រគណៈកម្មការត្រួតពិនិត្យគុណភាពសំណង់ ដើម្បីឲ្យអនុវត្ដការងារបានលឿន និងមានប្រសិទ្ធភាព។

លោកថ្លែងថា៖ «ជំហានដំបូងក្រុមការងារបច្ចេកទេសនេះ នឹងធ្វើការរយៈពេល ១ សប្ដាហ៍ ដោយធ្វើការងាររួមគ្នាតែម្ដង បើគិតទៅក្រុមការងារនេះត្រូវចុះអនុវត្ដតាំងពីបញ្ចប់កិច្ចប្រជុំតែម្ដង»។

បើតាមសេចក្ដីសម្រេចស្ដីពីការបង្កើតក្រុមការងារបច្ចេកទេស បានគាំទ្រគណៈកម្មការត្រួតពិនិត្យគុណភាពសំណង់នៅខេត្ដព្រះសីហនុ ចំនួន ៨ ក្រុម ដោយបានចុះហត្ថលេខាដោយលោក ឡៅ ទិព្វសីហា ប្រធានគណៈកម្មការត្រួតពិនិត្យគុណភាពសំណង់។

ក្រុមការងារបច្ចេកទេសទាំង ៨ ក្រុម មានភារកិច្ចចុះពិនិត្យការអនុវត្ដបទដ្ឋានបច្ចេកទេស បទដ្ឋានគតិយុត្ដ ស្ដង់ដាសំណង់ ស្ដង់ដាសុវត្ថិភាព និងគុណភាពសំណង់ នៅតាមការដ្ឋានសំណង់នៅខេត្ដព្រះសីហនុ។

ចុះពិនិត្យលក្ខណសម្បត្ដិរបស់ក្រុមហ៊ុនទទួលម៉ៅការសាងសង់នៅតាមការដ្ឋានសំណង់។ ធ្វើរបាយការណ៍លទ្ធផលជូនគណៈកម្មការត្រួតពិនិត្យគុណភាពសំណង់ និងមានភារកិច្ចបំពេញកិច្ចផ្សេងទៀត តាមការ ប្រគល់ជូនរបស់គណៈកម្មការត្រួតពិនិត្យគុណភាពសំណង់។

លោក សុខ សុខុម ប្រធានអង្គការស្រាវជ្រាវជាតិកម្ពុជា CNRO បានលើកឡើងថាការសម្រេចបង្កើតក្រុមការងារបច្ចេកទេសភ្លាមៗដើម្បីត្រួតពិនិត្យលើគុណភាពសំណង់នៅខេត្ដព្រះសីហនុ គឺជាការយកចិត្តទុកដាក់របស់រាជរដ្ឋាភិបាលដើម្បីបញ្ចៀសលែងឲ្យមានឧបទ្ទវហេតុរលំបាក់អគារកើតមានឡើងបន្ដទៀត។

លោកសង្ឃឹមថា ក្រុមការងារត្រួតពិនិត្យនេះនឹងបំពេញការងារឲ្យបានសមស្រប ទៅតាមស្ដង់ដាបច្ចេកទេស និងនីតិវិធីច្បាប់។

លោកបន្តថា៖ «សូមក្រុមការងារមន្រ្ដីជំនាញពិនិត្យឲ្យបានហ្មត់ចត់ទៅលើរបាយការណ៍ ហេតុផលប៉ះពាល់បរិស្ថាន ដែលសំណង់អគារដែលសាងសង់នោះបានស្នើសុំ ពិសេសគោលការណ៍នីតិវិធីផ្នែកច្បាប់។ ដូចគំរូនៃអគារដែលរលំនេះ បានធ្វើឡើងរហូតដល់ ៧ ជាន់ហើយ ប៉ុន្ដែនៅមិនទាន់មានច្បាប់ត្រឹមត្រូវទេ។ កន្លងមកទៀតដែលខ្ញុំជួបប្រទះ នៅក្នុងក្រុងព្រះសីហនុនេះ អគារដែលសាងសង់ឡើងរួចហើយ របាយការណ៍ផលប៉ះពាល់មិនទាន់ដឹងនៅឯណាទេ ចំណែកអគារនោះសាងសង់ឡើងខ្ពស់ស្កឹមស្កៃបាត់ទៅហើយ»។

ទាក់ទងនឹងបញ្ហាគុណភាពសំណង់នេះដែរ រដ្ឋបាលរាជធានីភ្នំពេញ ក៏បានចេញលិខិតណែនាំដល់អភិបាលខណ្ឌទាំង ១៤ ជាមួយនឹងការព្រមានថា ពួកគេអាចនឹងត្រូវទទួលរងវិន័យរដ្ឋបាល និងទទួលខុសត្រូវចំពោះមុខច្បាប់ជាធរមាន ប្រសិនបើមានសំណង់ណា ដែលគ្មានច្បាប់អនុញ្ញាត ត្រូវបានសាងសង់ឡើង នៅក្នុងដែនសមត្ថកិច្ចរបស់ពួកគេ។

លិខិតណែនាំដែលចេញដោយលោក ឃួង ស្រេង អភិបាលរាជធានីភ្នំពេញនេះ គឺបានផ្ញើទៅកាន់អភិបាលខណ្ឌទាំង ១៤ ស្តីពីវិធានការទប់ស្កាត់ សំណង់គ្មានលិខិតអនុញ្ញាតឲ្យសាងសង់ និងសំណង់ខុសលិខិតអនុញ្ញាតសាងសង់ចេញកាលពីថ្ងៃអង្គារដែលភ្នំពេញប៉ុស្ដិ៍ទើបទទួលបានម្សិលមិញ។

តាមរយៈលិខិត លោក ឃួង ស្រេង បានកត់សម្គាល់ថា កន្លងមក រដ្ឋបាលរាជធានីភ្នំពេញ បានណែនាំជាប្រចាំដល់រដ្ឋបាលខណ្ឌ ឱ្យយកចិត្តទុកដាក់ទប់ស្កាត់នូវរាល់សំណង់ ដែលគ្មានលិខិតអនុញ្ញាតសាងសង់ និងសំណង់ធ្វើឡើងខុសលិខិតអនុញ្ញាតឲ្យសាងសង់ក្នុងភូមិសាស្ដ្ររាជធានីភ្នំពេញ។

ទោះបីជាមានការណែនាំជាច្រើនលើកច្រើនសារួចហើយក៏ដោយ ក៏រដ្ឋបាលរាជធានីភ្នំពេញ នៅតែសង្កេតឃើញថា សំណង់ដែលគ្មានលិខិតអនុញ្ញាតឲ្យសាងសង់ និងសំណង់ខុសលិខិតអនុញ្ញាត សាងសង់ នៅតែកើតឡើងជាបន្តបន្ទាប់ នៅក្នុងភូមិសាស្ត្ររាជធានីភ្នំពេញ។

ដូចនេះដើម្បីគ្រប់គ្រងការសាងសង់គ្រប់ប្រភេទឱ្យស្របតាមប្លង់គោលរាជធានីភ្នំពេញ បទដ្ឋាននគរូបនីយប្បញ្ញត្តិ និងលក្ខណៈបច្ចេកទេសសំណង់នោះ រដ្ឋបាលរាជធានីភ្នំពេញ ស្នើអភិបាលខណ្ឌ ត្រូវខិតខំទប់ស្កាត់រាល់សំណង់ ដែលគ្មានលិខិតអនុញ្ញាតសាងសង់ និងសំណង់សង់ខុសលិខិតអនុញ្ញាតសាងសង់ឱ្យខាងតែបាន និងឱ្យមានប្រសិទ្ធភាព ក្នុងន័យរឹតបន្តឹង ការគោរពលិខិតបទដ្ឋានគតិយុត្ត ក៏ដូចធានាឲ្យបាននូវសុវត្ថិភាព និងគុណភាពជូនប្រជាពលរដ្ឋ។

លោក ឃួង ស្រេង បានធ្វើការព្រមានថា ៖ «ក្នុងករណីដែលសំណង់ គ្មានលិខិតអនុញ្ញាតសាងសង់និងសំណង់ខុសលិខិតអនុញ្ញាតសាងសង់នៅតែកើតមានហើយបង្កឱ្យមានគ្រោះថ្នាក់ និងបង្កព្យសនកម្ម ដល់អាយុជីវិតរបស់ប្រជាពលរដ្ឋ នៅក្នុងដែនសមត្ថកិច្ចរបស់ខ្លួននោះ លោកអភិបាលខណ្ឌ ត្រូវទទួលនូវវិន័យរដ្ឋបាលទៅតាមច្បាប់ស្តីពីសហលក្ខន្តិកៈមន្ត្រីរាជការស៊ីវិល និងត្រូវទទួលខុសត្រូវចំពោះមុខច្បាប់ជាធរមាន»៕

អ្នកភូមិព្រៃទា ១៤០ គ្រួសារ តវ៉ារកដំណោះស្រាយទំនាស់ដីធ្លី

The more you read, the more you know June 27, 2019 News No comments :

ក្រុមអ្នកតវ៉ាវិវាទដីធ្លីដើរតវ៉ារកដំណោះស្រាយ។

ភ្នំពេញៈ អ្នកភូមិព្រៃទា ៣៥ គ្រួសារ តំណាងឲ្យ ១៤០ គ្រួសារ ដែលមានទំនាស់ដីធ្លីដ៏រ៉ាំរ៉ៃជាមួយក្រុមទាហាននៃមូលដ្ឋានការពារដែនអាកាស បាននាំគ្នាតវ៉ាកាលពីថ្ងៃពុធកន្លងមកនេះដោយបានទាមទារឲ្យអាជ្ញាធរដែនដី និងក្រសួងការពារជាតិ ចាត់របៀបវារៈចុះវាស់វែងកំណត់ព្រំដីជូនពួកគាត់ឲ្យបានឆាប់បំផុត តាមដែលអាចធ្វើទៅបាន ដោយផ្អែកលើសេចក្ដីសម្រេចរបស់លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ ចុះថ្ងៃទី ០២ ខែ កុម្ភៈ ឆ្នាំ ២០១៧។

តំណាងក្រុមគ្រួសារប្រជាពលរដ្ឋទាំងនោះ លោក ជា សុខ បានប្រាប់ភ្នំពេញប៉ុស្តិ៍ថា ដើម្បីបញ្ចប់វិវាទដីធ្លីរវាង ប្រជាពលរដ្ឋក្នុងមូលដ្ឋានភូមិព្រៃទា និងកងវរសេនាតូចលេខ ៩១ ការពារអាកាស នៅថ្ងៃទី ២ ខែ កុម្ភៈ ឆ្នាំ ២០១៧ លោកឧបនាយករដ្ឋមន្ត្រី ទៀ បាញ់ បានចេញសេចក្ដីសម្រេចមួយ ដោយកាត់ដីបន្ទាយកងទ័ពវរសេនាតូចលេខ ៩១ ការពារអាកាសនៃកងទ័ពជើងគោកទំហំ ៣៤ ៣៧៣ ម៉ែត្រការ៉េ ជូនទៅគ្រួសារកងទ័ព និងប្រជាពលរដ្ឋសរុបចំនួន ១២១ គ្រួសារ ដែលកន្លងមកពួកគេបានរស់នៅក្នុងបន្ទាយនោះ និងកាត់ផ្ទៃដីទំហំ ៤៣ ៧៥០ ម៉ែត្រការ៉េបន្ថែមទៀតជូនទៅគ្រួសារអ្នកភូមិព្រៃទាចំនួន ៣៥ គ្រួសារ។ ចំណែកផ្ទៃដីដែលនៅសល់ទំហំ ១៤ ២៦៣ ម៉ែត្រការ៉េ ត្រូវរក្សាទុកសម្រាប់បន្ទាយវរសេនាតូចលេខ ៩១ ការពារអាកាសកងទ័ពជើងគោក គឺជាទ្រព្យសារពើភណ្ឌរបស់ក្រសួងការពារជាតិ។

លោក សុខ បានបន្តថា ខណៈពួកគាត់កំពុងរង់ចាំការចុះវាស់វែងពីក្រុមគណៈកម្មការចម្រុះរបស់ក្រសួងការពារជាតិ និងអាជ្ញាធរពាក់ព័ន្ធ ស្រាប់តែមានព័ត៌មានពីគ្រួសារកងទ័ពមួយចំនួនថា សេចក្ដីសម្រេចនោះត្រូវបាននិរាករណ៍ ហើយក្រុមគណៈកម្មការចម្រុះនៃក្រសួងការពារជាតិ នឹងមិនចុះវាស់វែងដីធ្លីឲ្យនោះទេ លើកលែងតែក្រុមគ្រួសារកងទ័ពប៉ុណ្ណោះ។

លោកបានបញ្ជាក់ថា៖ «ពួកយើងជាប្រជាពលរដ្ឋមានការព្រួយបារម្ភខ្លាំងណាស់ ហើយក៏បានសម្រេចចិត្តនាំគ្នាមកតវ៉ាទាមទារឲ្យអាជ្ញាធរមូលដ្ឋាន ក៏ដូចជាក្រសួងការពារជាតិ ចុះធ្វើការវាស់វែង និងចេញប្លង់កម្មសិទ្ធិជូនប្រជាពលរដ្ឋយើងខ្ញុំទាំង ៣៥ គ្រួសារ ឲ្យបានឆាប់ ដោយគោរពតាមស្មារតីនៃសេចក្ដីសម្រេចរបស់សម្ដេច ទៀ បាញ់ កាលពីឆ្នាំ ២០១៧ កន្លងទៅនេះ»។

ចំណែកអ្នកស្រី ម៉ែន គីម ដែលបានចូលរួមការតវ៉ានាប៉ុន្មានថ្ងៃជាប់ៗគ្នានេះដែរ បានប្រាប់ភ្នំពេញប៉ុស្តិ៍ថា កាលពីឆ្នាំ ១៩៨៧ អង្គភាពយោធាការពារដែនអាកាសនៃកងទ័ពជើងគោក បានសុំខ្ចីដីពីពួកគាត់ទំហំសរុប ៩,៣ ហិកតា ដើម្បីធ្វើជាមូលដ្ឋានកងទ័ពការពារដែនអាកាសជាបណ្ដោះអាសន្ន ដោយសន្យាថានឹងប្រគល់មកឲ្យវិញនៅពេលអ្នកភូមិត្រូវការ។

អ្នកស្រីបានបន្តថា៖ «ក្នុងអំឡុងពេលនោះ ប្រជាពលរដ្ឋយើងខ្ញុំ ជឿទុកចិត្តកងទ័ពខ្លាំងណាស់ ព្រោះយើងមិនចង់ឲ្យរបបខ្មែរក្រហមវិលត្រឡប់មកសាជាថ្មីទេ យើងសុខចិត្តប្រគល់ដីទៅឲ្យកងទ័ពខ្ចី ធ្វើជាមូលដ្ឋានទ័ពការពារដែនអាកាស ដើម្បីឈរជើងការពារ និងទប់ស្កាត់ការវាយឆ្មក់របស់ពួកខ្មែរក្រហម ដោយសង្ឃឹមថា កងទ័ពនឹងគោរពពាក្យសន្យា»។

អ្នកស្រីបានបន្ថែមថា នៅឆ្នាំ ២០០២ ពួកគាត់ក៏បាននាំគ្នាស្នើសុំយកដីទាំងនោះមកវិញ ស្រាប់តែខាងកងទ័ពក្រឡាស់សម្ដី ដោយបដិសេធប្រគល់ដីទាំងនោះឲ្យពួកគាត់វិញ។

លោក ម៉ៅ ផល្លា អ្នកនាំពាក្យកងទ័ពជើងគោក នៃក្រសួងការពារជាតិ កាលពីម្សិលមិញថ្លែងថា វិវាទដីធ្លីខាងលើនេះ ត្រូវបានក្រុមគណៈកម្មការចម្រុះនៃក្រសួងការពារជាតិ ចុះដោះស្រាយ និងវាស់វែងបែងចែកដីនោះជាបន្តបន្ទាប់ជូនទៅគ្រួសារកងទ័ព និងប្រជាពលរដ្ឋមួយចំនួនខ្លះហើយ។ ដោយឡែកគ្រួសារកងទ័ព និងប្រជាពលរដ្ឋមួយចំនួន នៅមិនទាន់ដោះស្រាយជូន ដោយសារតែពួកគាត់ខ្លួនឯង ខ្វះកិច្ចសហការចូលរួមជាមួយសមត្ថកិច្ចជំនាញ។

លោកបានថ្លែងថា៖ «យើង ចុះទៅពិនិត្យទីតាំងដើម្បីធ្វើការវាស់វែង ពួកគាត់មួយចំនួនមិននៅផ្ទះទេ មិនដឹងថា ពួកគាត់រវល់ ឬមិនចង់សហការជាមួយសមត្ថកិច្ចជំនាញយើង ហេតុដូច្នេះហើយទើបការដោះស្រាយមានការអូសបន្លាយមកដល់ពេលនេះ។ ម្យ៉ាងទៀត គ្រួសារកងទ័ព និងប្រជាពលរដ្ឋខ្លះក៏ខូចដែរ ពួកគាត់បានលក់ដីឲ្យទៅគេអស់ហើយ បែរជាមកចូលរួមតវ៉ា»៕

Thursday, June 13, 2019

យុវជនកម្ពុជា បង្កើតរ៉ូបូតមានសមត្ថភាពដូចទៅនឹងមនុស្ស

The more you read, the more you know June 13, 2019 News No comments :

Robotcam មានអាយុ ១ ឆ្នាំទម្ងន់ ៤៥គីឡូក្រាម និងចំណាយថវិកាធ្វើជិត ២ ម៉ឺនដុល្លារ។ រូបថត យូសុះ អាប់ឌុលរ៉ាស់ហ៊ីម

ភ្នំពេញៈ វិស័យរ៉ូបូតនៅកម្ពុជាកំពុងតែមានការរីកចម្រើនជឿនលឿនគួរឲ្យកត់សម្គាល់ ទន្ទឹមនឹងនោះក៏មានការបង្កើតនូវការប្រកួតរ៉ូបូតជាច្រើនសម្រាប់សិស្សានុសិស្ស និងនិស្សិតដែលសិក្សាជំនាញរ៉ូបូតផ្ទាល់ ទាំងក្របខ័ណ្ឌជាតិ និងអន្តរជាតិ។

ថ្មីៗនេះយុវជនមួយក្រុមបានបង្កើតរ៉ូបូតថ្មីដំបូងបង្អស់នៅកម្ពុជាឈ្មោះថា រ៉ូបូខេម ព្រះកុសមៈ (Robocam preah Kossomak) ជាប្រភេទរ៉ូបូត Humanoid ដែលរូបរាងដូចមនុស្សមានសមត្ថភាពខ្ពស់ក្នុងការប្រាស្រ័យទាក់ទងជាមួយមនុស្សក្នុងការឆ្លើយឆ្លង និងធ្វើសកម្មភាពផ្សេងៗ។

លោក សុភ័ណ វោហា អ្នកដឹកនាំការផលិតរ៉ូបូត និងជាគ្រូបង្រៀនផ្នែកអគ្គិសនីនៅវិទ្យាស្ថានពហុបច្ចេកទេសកុសមៈបានប្រាប់ឲ្យភ្នំពេញ-ប៉ុស្តិ៍ដឹងថា៖ «Robocam គឺជា humanoid ដែលអាចនិយាយឆ្លើយឆ្លងពេលយើងសួរសំណួរ ហើយវានឹងឆ្លើយមកកាន់យើងវិញនៅក្នុង ២ ភាសាទាំងភាសាខ្មែរ និងអង់គ្លេស ហើយវាអាចចងចាំមុខមនុស្សបាន នៅពេលវាឃើញមុខមនុស្សវាស្គាល់ វាហៅឈ្មោះអ្នកនោះអាចងាកទៅតាមមនុស្សបាន និងអាចដើរបាន»។

លោកបានបន្ថែមថា៖ «មូលហេតុដែលខ្ញុំបង្កើតរ៉ូបូតហ្នឹង ដំបូងខ្ញុំពិភាក្សាជាមួយក្រុម ថាចង់បង្កើតរ៉ូបូត (Robot AI)មួយដោយស្នាដៃពួកខ្ញុំ ព្រោះបរទេសគេធ្វើវារួចហើយ អ៊ីចឹងពួកយើងក៏ចាប់ផ្តើមកាលពីជាង ១ ឆ្នាំមុន ដំណាក់កាលទី ១ ពួកខ្ញុំ Design ត្រឹមតែក្បាលទេ ហើយពេលនេះយើងក៏បានបង្កើត robot ជារូបរាងមនុស្សទាំងស្រុងតែម្តង»។

រ៉ូបូតនេះសម្រេចបានចំនួន ៩០ ភាគរយហើយ។ រូបថត យូសុះ អាប់ឌុលរ៉ាស់ហ៊ីម

Robocam ចែកចេញជា ៣ ផ្នែកដូចជា៖ ក្បាល ខ្លួន និងជើង។ ក្បាលរបស់រ៉ូបូតអាចងាក ឬធ្វើចលនាបត់ឆ្វេង ស្តាំដូចជាមនុស្សទូទៅ ចំណែកភ្នែកអាចបើក និងបិទ និងមានកាមេរ៉ាបង្កប់លើថ្ងាសសម្រាប់មើល រីឯមាត់អាចធ្វើការនិយាយស្របជាមួយភាសាដែលខ្លួននឹងនិយាយ ទន្ទឹមនឹងនេះផ្នែកក្បាលក៏មានសក់ និងស្រោប silicon លើក្បាលមនុស្សយន្តដែលលក្ខណៈដូចជាមុខមាត់មនុស្ស។

ផ្នែកខ្លួននៅត្រង់កណ្តាលទ្រូងមានអេក្រង់ (Screen) សម្រាប់បង្ហាញពីប្រព័ន្ធប្រតិបត្តិការ ឬសម្រាប់ការបន្ថែមកម្មវិធីផ្សេងៗ ចំណែកដៃអាចធ្វើចលនាចាប់កាន់ និងលើកចុះឡើង ប៉ុន្តែមិនទាន់បានល្អដូចជាកាយវិការមនុស្សនៅឡើយទេ ជាមួយគ្នានេះរ៉ូបូតនេះក៏មានអាវសម្រាប់បិទបាំងអេក្រង់ (Screen) និងសម្រាប់បង្កើតនូវសោភណភាពផងដែរ។

រីឯផ្នែកជើងរបស់រ៉ូបូតអាចធ្វើចលនាដើរបានផងដែរ។ រ៉ូបូតនេះក៏មានខោផងដែរ តែមិនមានជាសាច់ក្រណាត់ធម្មតានោះទេគឺជាខោដែលនឹងយកមកបិទលើលោហៈ ដើម្បីបិទបាំងគ្រឿងខាងក្នុងរបស់រ៉ូបូត។

ទាក់ទងនឹងផលលំបាកលោក សុភ័ណ វោហា បញ្ជាក់ថា ក្រុមរបស់លោកសុទ្ធជាវិស្វករអគ្គិសនី និងអេឡិចត្រូនិក ចំណែកផ្នែកមេកានិក សមាជិករបស់លោកទាំងអស់មិនមានជំនាញឡើយ ដូចនេះលោកត្រូវងាកមកសិក្សាជំនាញមេកានិកបន្ថែមរួមទាំងការរចនា (Design) រូបរាង និងគំនិតក្នុងការធ្វើឲ្យចលនារបស់រ៉ូបូតដំណើរការបានល្អ និងចំណាយពេលធ្វើតេស្តជាច្រើនលើក។

ចំណែក Program សម្រាប់រ៉ូបូតនេះចែកចេញជា ២ ផ្នែករួមមាន៖ ផ្នែក program របស់អេឡិចត្រូនិកសម្រាប់ប្រើលើការបញ្ជាផ្នែកក្បាល និងតួខ្លួនទាំងអស់។ ចំណែកមួយទៀតគឺ pragram ខាងផ្នែក IT។

សមាជិកមួយរូបទៀតលោក ជ្រិន ជីវ៉ា គ្រូបង្រៀនផ្នែក Program Electronic បានបង្ហាញពីការលំបាកទាក់ទងនឹង Program ថា៖ «យើងប្រើភាសា Python ធ្វើម៉េចឲ្យរ៉ូបូតចេះគិតពិចារណា និងឆ្លើយឆ្លងជាមួយយើងបាន។ មួយទៀតបញ្ហាខាងភាសាខ្មែរគឺពិបាកក្នុងការកំណត់ឲ្យរ៉ូបូតទទួលបានព័ត៌មានពីមនុស្សដែលនិយាយភាសាខ្មែរបន្តិច ទាំងសំឡេង និងការឆ្លើយឆ្លង តែបើអង់គ្លេសអត់មានបញ្ហាទេ។ យើងយក System របស់ google ដែលជាសំឡេងស្រីមកប្រើ តែយើងបានកែច្នៃឲ្យទៅជាសំឡេងប្រុស ហើយខ្ញុំបង្កើតវាដោយខ្លួនឯង»។

រ៉ូបូតឈ្មោះ Robocam នេះមានអាយុ ១ ឆ្នាំទម្ងន់ ៤៥ គីឡូក្រាមកម្ពស់ ១.៥៨ សង់ទីម៉ែត្រ និងត្រូវបានផលិតឡើងដោយសមាជិកចំនួន ១៤ នាក់ដោយប្រើរយៈពេលប្រមាណជាង ១ ឆ្នាំ និងចំណាយអស់ជិត ២០០០០ ម៉ឺនដុល្លារ។

រ៉ូបូតនេះសម្រេចបានចំនួន ៩០ ភាគរយ និងត្រៀមសម្រេចឲ្យបាន ១០០ ភាគរយ ដើម្បីយកទៅតាំងបង្ហាញថ្ងៃទី ១៥ ខែមិថុនានៅក្នុងកម្មវិធីអភិវឌ្ឍន៍វិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) របស់ក្រសួងការងារ។

ទៅថ្ងៃអនាគតលោក វោហា គ្រោងអភិវឌ្ឍរ៉ូបូតនេះឲ្យកាន់តែល្អបន្ថែមទៀតរួមទាំងលទ្ធភាពក្នុងការប្រាស្រ័យទំនាក់ទំនង ការដើរ និងរូបរាងឲ្យបានស្អាត៕

វីដេអូ៖

Thursday, June 6, 2019

ទឹកក្រឡុកព្រីង ខ្វិត និងសេដា ពីខ្ទីងវល្លិ៍ កាហ្វេ ឆ្ងាញ់ហើយជួយសុខភាព

The more you read, the more you know June 06, 2019 News No comments :

ទឹកខ្វិត និងទឹកព្រីង សុទ្ធតែមានគុណប្រយោជន៍ដល់សុខភាព។

ផ្ទះតូចបំពាក់បរិក្ខារទំនើប គោលដៅផ្ទះលម្ហែជំនាន់ថ្មីសម្រាប់អ្នកដែលស្រឡាញ់ធម្មជាតិ

The more you read, the more you know June 06, 2019 News No comments :

ផ្ទះគំរូ Glamping Pods Cambodia ដែលស្ថិតនៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ភ្នំពេញ: ក្នុងគំនិតអ្នកដើរផ្សងព្រេង ពួកគេអាចត្រូវការត្រឹមតង់ស្នាក់មួយលើជម្រាលភ្នំ ឬក្នុងព្រៃចំពោះគ្រាធ្វើដំណើរឆ្លងយប់អាធ្រាត្ររបស់ពួកគេ។ ប៉ុន្ដែចំពោះមនុស្សជាច្រើន ពួកគេប្រាកដជាប្រាថ្នាការស្នាក់នៅប្រកបដោយផាសុកភាពក្នុងផ្ទះបំពាក់បរិក្ខារសព្វគ្រប់។

ដោយស្គាល់ជាក្រុមហ៊ុនសង់ផ្ទះចល័តទំនើប Glamping Pods Cambodia ត្រូវបានបង្កើតឡើងក្នុងបំណងផ្ដល់សេវាកម្មសង់ផ្ទះតូចសម្រាប់ដំឡើងនៅតាមសណ្ឋាគារ អេកូរីសត និងចម្ការធំៗ។ ផ្ទះតូចក្នុងរូបរាងដំបូលកោងដែលស្រដៀងនឹងផ្ទះជនជាតិដើមភាគតិចមានទាំងបន្ទប់ទឹក កន្លែងចម្អិនអាហារ និងកន្លែងទទួលភ្ញៀវជាមួយបរិក្ខារទំនើបៗ។

គំនិតផ្ដួចផ្ដើមកសាងផ្ទះតូចដែលអាចដំឡើងនៅតាមទីជម្រាលព្រៃភ្នំដោយមិនប៉ះពាល់ដល់ធម្មជាតិបានចាប់បដិសន្ធិឡើងដោយអ្នកជំនួញផ្នែកអចលនទ្រព្យម្នាក់ដែលមានបំណងបង្កើតអេកូរីសតផ្ទាល់ខ្លួន។

ផ្ទះមួយត្រូវចំណាយពេលធ្វើយ៉ាងយូរបំផុត ១ ខែ។

លោក តេង រិទ្ធី ស្ថាបនិក Glamping Pods Cambodia បាននិយាយថា៖ «ខ្ញុំចង់សង់ផ្ទះឲ្យតូច និងរស់នៅស្រួល។ ខ្ញុំមានទីតាំងមួយចំនួនដោយចង់ប្រែក្លាយជាអេកូរីសត។ យើងចាប់ផ្ដើមគិតថា តើយើងគួរធ្វើផ្ទះបែបនេះ ដោយចំណាយប្រាក់តិច និងចំណេញពេលវេលាព្រមទាំងដឹកជញ្ជូនស្រួល។ យើងចង់សង់ឲ្យរួចរាល់ ទើបដឹកយកទៅដល់ទីកន្លែងតែម្ដង»។

លោកបានព្យាយាមសិក្សាស្រាវជ្រាវតាមអ៊ីនធឺណិត ប្រឹក្សាជាមួយមិត្ដភក្ដិជាវិស្វករសំណង់ និងធ្វើដំណើរទៅក្រៅប្រទេសដើម្បីស្វែងរកលទ្ធភាពបង្កើតក្ដីស្រមៃរបស់ខ្លួន។ លទ្ធភាពនៃការទិញផ្ទះចល័តទាំងនោះពីក្រៅប្រទេស វាមិនអាចទៅរួច ដោយសារតែវាធំ និងចំណាយថ្លៃដើមដឹកជញ្ជូនខ្ពស់។

បុរសអាយុ ៣៨ ឆ្នាំរូបនេះបានបន្ដថា៖ «ក៏បង្កើតគំនិតថា យើងអាចផ្គុំដោយយកម៉ូដពីគេ ដូចជា ម៉ូដរំដួល (Pod)។ យើងយកពីគេ តែតាមពិតទៅស្រុកខ្មែរយើងក៏មានដែរកាលពីជំនាន់មុន។ យើងឃើញនៅតំបន់ព្រៃភ្នំខេត្តមណ្ឌលគិរី និងរតនគិរី ជាពិសេសផ្ទះជនជាតិដើមភាគតិច។ យើងច្នៃមកឲ្យចេញជាប្រភេទដូចគ្នាអ៊ីចឹងតែការដេគ័ររបស់យើងឲ្យមានលក្ខណៈទាន់សម័យ រួមទាំងប្រព័ន្ធភ្លើងទឹក និងបរិក្ខារផ្សេងៗឲ្យក្លាយជាផ្ទះស្នាក់លម្ហែប្រកបដោយផាសុកភាព»។

អ្នកជំនួញផ្នែកអចលនទ្រព្យរូបនេះបានទិញដីជាច្រើនរយហិកតាបម្រុងទុកសម្រាប់សង់អេកូរីសតហើយកាលពីប៉ុន្មានខែមុនលោកបានសម្រេចចិត្ដសង់ផ្ទះគំរូមួយ បំណងយកទៅដំឡើងនៅលើដីរបស់ខ្លួន។ ផ្ទះគំរូដំបូងបានទាក់ចិត្ដមហាជនលើបណ្ដាញសង្គមដែលមានការចាប់អារម្មណ៍លើម៉ូដ និងភាពទំនើបរបស់ផ្ទះតូច។

ផ្ទះប្រភេទ A1 ដែលមានរាងជ្រុងប៉ិតមួយចំហៀង។

លោក តេង រិទ្ធី ដែលជាស្ថាបនិកសម្ព័ន្ធ R' Property Group ផងនោះបានឲ្យដឹងថា៖ «មនុស្សទូទៅសុទ្ធតែចាប់អារម្មណ៍ចំពោះផ្ទះស្នាក់តូចៗទាំងនេះ។ ប៉ុន្ដែជាក់ស្ដែងចំពោះអ្នកអាចសម្រេចចិត្ដបាន គឺជាអ្នកវិនិយោគ។ ពួកគេជាអ្នកដែលធ្វើរីសត ធ្វើអូតែល អ្នកមានចម្ការធំៗ។ នៅក្នុងស្រុកខ្មែរតំបន់ដែលពេញនិយមជាងគេគឺនៅខេត្ដកំពត កំពង់សោម មណ្ឌលគិរី និងរតនគិរី។ សៀមរាបក៏ត្រូវការច្រើន តែសៀមរាបពេញនិយមម៉ូដរំដួលច្រើន»។

លោកអះអាងថា៖ «ទើបតែមានរយៈពេល ២ ឬ ៣ ខែនេះពេលយើងធ្វើទៅស្រាប់តែមានការគាំទ្រច្រើន។ មានការកុម្ម៉ង់ច្រើនតាមរយៈការបង្ហោះវីដេអូ 3D តាមបណ្ដាញសង្គម»។

Glamping Pods Cambodia មានផ្ទះ ៤ ប្រភេទគឺ រំដួល និងក្រវាន់ដែលមានដំបូលរាងមូលព្រមទាំង Modern &A1 ដែលមានរូបរាងជ្រុង ២ ម៉ូដគឺប្រភេទផ្ទះស្នាក់ (ទ្វារ ១ ដូចផ្ទះ) និងប្រភេទសណ្ឋាគារ (មានកញ្ចក់ទ្វារមុខក្រោយ) ហើយចំណែកប្រភេទទី ៤ ដែលស្ថិតក្នុងគម្រោងគឺមានបំពាក់កង់ដែលអាចចល័តតាមរថយន្ដ។

លោក រិទ្ធី បានប្រាប់ភ្នំពេញប៉ុស្ដិ៍ថា៖ «គាត់អាចធ្វើជា Office គាត់អាចធ្វើជាផ្ទះចល័តបាន។ គាត់ចង់ទៅទីកន្លែងណា គាត់មានរបស់គាត់មួយកំប្លេ រួមទាំង ចង្ក្រាន បន្ទប់ទឹក គ្រែគេង ម៉ាស៊ីនត្រជាក់ទៅជាមួយគ្នាទាំងអស់»។

លោកអះអាងថា ម៉ូដនិង A1 គឺជាម៉ូដថ្មីសុទ្ធសាធ ដោយមិនចម្លងពីគេនោះទេ។ អត់មាននរណាមានដូចទេ ដោយសារវាមានរូបរាងជ្រុងប៉ិតមួយចំហៀង។ វាពិតជាស័ក្ដិសមពេលផ្គុំផ្ទះ ២ ជាមួយគ្នា។

លោក រិទ្ធី ជាអ្នកគាំទ្រចំពោះការដើរផ្សងព្រេងបោះតង់ម្នាក់ដែរនោះបានឲ្យដឹងថា៖ «ម៉ូដ A1 និង Modern ដែលមានដំបូលជ្រុង កញ្ចក់មុខក្រោយ អំពូល LED ពណ៌ ប្រព័ន្ធសោតទស្សន៍ និងបច្ចេកវិទ្យាតិចណូឡូជីកាន់តែធំ។ វាមានរាងសិចស៊ី ដោយសារពេលយើងបើកវាំងននអស់ទៅពីមុខដល់ក្រោយ យើងមើលឃើញធ្លាយគ្នា។ បើស្ថិតនៅតំបន់ព្រៃភ្នំ ហើយយើងចង់ឃើញទិដ្ឋភាពព្រៃភ្នំសងខាង យើងបើកតែវាំងននទៅ យើងឃើញអស់តែម្ដង»។

លោក តេង រិទ្ធី ជាស្ថាបនិក Glamping Pods Cambodia ក្នុងផ្ទះចល័តទំនើប។

បើទោះបីជាម៉ូដរំដួល ឬក្រវាន់ទទួលបានការចាប់អារម្មណ៍ច្រើន តែចំពោះការកុម្ម៉ង់ជាក់ស្ដែង ម៉ូដ Modern & A1 បែរជាពេញនិយមទៅវិញដោយបច្ចុប្បន្នភ្ញៀវបានបញ្ជាទិញម៉ូដរំដួល ឬក្រវាន់ប្រមាណ ២០ ផ្ទះ និងម៉ូដ Modern & A1 ៣០ ផ្ទះ បូកបន្ថែមផ្ទះតូចៗអត់បន្ទប់ទឹកប្រមាណ ៥០ ផ្ទះទៀត។

ផ្ទះតូចជាងគេទំហំ ២,៥ x ៣ ម៉ែត្រមានឬអត់មានបន្ទប់ទឹកតម្លៃពីជាង ៣០០០ ទៅ ៤៥០០០ ដុល្លារ។ ទំហំទីពីរ ២,៥ x ៦ តម្លៃ ប្រហាក់ប្រហែល ៦០០០ ទៅ ៧០០០ ដុល្លារ ទំហំទីបី ៣ x ៦ ដែលចាត់ទុកថាធំដែលអាចដាក់គ្រែ បន្ទប់ទឹក សាឡុង មានតម្លៃចន្លោះ ៧៥០០ ដុល្លារ ហើយធំមួយទៀត គឺ ៤ x ៦ ខ្នាតធំជាងហើយមានតម្លៃប្រហាក់ប្រហែល ៩០០០ ដុល្លារ។

លោក រិទ្ធី បានពន្យល់ថា៖ «ផ្ទះតូចទាមទារការតុបតែងខ្លាំងជាង។ យើងផ្ដោតលើការឌីគ័រខ្លាំងមិនខុសពីបន្ទប់សណ្ឋាគារលំដាប់ផ្កាយនោះទេ។ បរិក្ខារនៃការរស់នៅប្រកបដោយផាសុកភាព។ យើងអាចចំណាយពេលយ៉ាងយូរបំផុត ១ ខែហើយសព្វថ្ងៃយើងប្រើពេលចន្លោះពី ២ ទៅ ៣ សប្ដាហ៍។ តែ ១ ឬ ៥ ផ្ទះក្នុងពេលតែមួយយើងប្រើពេលប្រហាក់ប្រហែលគ្នា»។

Glamping Pods Cambodia មានទីតាំងនៅផ្ទះលេខ ២២៣ ផ្លូវ ៥៩៨ សង្កាត់ភ្នំពេញថ្មី និងទូរស័ព្ទ ០១៧ ៦១៧ ០០៧៕

ទឹកក្រឡុកព្រីង ខ្វិត និងសេដា ពីខ្ទីងវល្លិ៍ កាហ្វេ ឆ្ងាញ់ហើយជួយសុខភាព

The more you read, the more you know June 06, 2019 News No comments :

ទឹកខ្វិត និងទឹកព្រីង សុទ្ធតែមានគុណប្រយោជន៍ដល់សុខភាព។

កំពង់ចាមៈ ស្ថិតនៅខាងកើតផ្សារស្គន់ ទឹកដីខេត្តកំពង់ចាម ខ្ទីងវល្លិ៍ កាហ្វេ មានបម្រើនូវភេសជ្ជៈប្លែកៗ ហើយអ្វីដែលលេចធ្លោជាងគេគឺហាងនេះបានច្នៃផ្លែឈើខ្មែរធ្វើជាភេសជ្ជៈប្លែកៗមានដូចជា ខ្វិតក្រឡុក (៨០០០៛) ផ្លែសេដា ឬផ្លែតូម៉ាក្រឡុកទឹកដោះគោ (៨០០០៛) ផ្លែសេដា ឬ ផ្លែតូម៉ាក្រឡុកតែទឹកដោះគោ (៩០០០៛) ទឹកព្រីង (Jambolan Juice) ព្រីងសូដា (៧០០០៛) និងព្រីងក្រឡុក (៨០០០៛)។

លោក តាំង អៀកឃុន វ័យ ៣៣ ឆ្នាំជាម្ចាស់ហាង ខ្ទីងវល្លិ៍ កាហ្វេ បានសង្កេតឃើញថា ផ្លែឈើទាំងនេះមិនសូវមាននៅលើទីផ្សារនោះទេ ខណៈទាំងរសជាតិ និងគុណប្រយោជន៍គឺមានដូចគ្នានឹងផ្លែឈើបរទេសដែលមិនគួរមើលរំលង។

នៅថ្ងៃមួយមានបុគ្គលិកយកផ្លែសេដាមកផ្ញើលោក ហើយអ្នកជំនាញចម្អិនម្ហូបនៅសាលាបង្រៀនធ្វើម្ហូប ក្លូប៊ល និងបានទទួលការបណ្តុះបណ្តាលផ្នែកឆុងកាហ្វេពីក្រុមហ៊ុន បុងកាហ្វេ រូបនេះបានរំឭកប្រាប់ភ្នំពេញ ប៉ុស្ដិ៍ ឲ្យដឹងថា៖ «ខ្ញុំក៏ចាប់ផ្តើមធ្វើវា (ទឹកផ្លែសេដា) ពេលដែលក្រឡុកហើយខ្ញុំក៏សាកឲ្យបុគ្គលិកខ្ញុំ និងមិត្តភក្តិរបស់ខ្ញុំ ហើយពួកគាត់ក៏អាចញ៉ាំបាន ទើបខ្ញុំសម្រេចចិត្តដាក់លក់ បន្ទាប់មកខ្ញុំបានកែច្នៃផ្លែខ្វិតជាផ្លែឈើទី ២ ដែលខ្ញុំបានច្នៃ និងទី ៣ គឺផ្លែព្រីងនេះឯង គ្រាន់តែផ្លែព្រីងមិនអាចក្រឡុកជាមួយទឹកដោះគោបានដូចសេដា និងខ្វិតបានទេ អ៊ីចឹងត្រូវប្រើទឹកជំនួស»។

ភេសជ្ជៈរសជាតិព្រីង ទើបតែចាប់ផ្តើមដាក់លក់កាលពីថ្ងៃទី ២១ ខែឧសភាកន្លងទៅនេះ ប៉ុន្តែដោយបើកហាងចាប់ពីម៉ោង ៦ ព្រឹករហូតដល់ ៨ យប់ និងក្នុង ១ ថ្ងៃ ភេសជ្ជៈដែលផលិតពីផ្លែព្រីងនេះលក់បានចាប់ពី ៥ ទៅ ១០ កំប៉ុង។

ខ្ទីងវល្លិ៍ កាហ្វេ មានបម្រើភេសជ្ជៈច្នៃពីផ្លែឈើខ្មែរតាមរដូវកាលមាន ព្រីង ខ្វិត សេដា ជាដើម។

លោក តាំង អៀកឃុន ក៏បានឲ្យដឹងដែរថា ក្រៅពីរសជាតិឆ្ងាញ់ប្លែក ភេសជ្ជៈព្រីង ក៏អាចជួយបញ្ចុះជាតិស្ករក្នុងឈាម បន្ថយក្អក កាត់បន្ថយជំងឺរាក និងជំនួយដល់ស្បែកទៀតផង។ ប៉ុន្តែផលិតផលព្រីងនេះមិនតម្រូវឲ្យស្ត្រី ដែលទើបនឹងសម្រាលកូនកំពុងបំបៅដោះកូន អ្នកមុន និងក្រោយវះកាត់ពិសារនោះទេ។

ចំពោះផ្លែសេដា ឬផ្លែតូម៉ាក្រឡុកមានផ្ទុកនូវអាហារូបត្ថម្ភ វីតាមីន និងសារធាតុរ៉ែមួយចំនួនដែលផ្តល់នូវកាកសរសៃ ដែលអាចកាត់បន្ថយហានិភ័យនៃជំងឺភ្នែកឡើងបាយ ជួយសម្រួលដល់ប្រព័ន្ធរំលាយអាហារ ប៉ូវឆ្អឹង ជំនួយបេះដូង បង្កើនប្រព័ន្ធភាពស៊ាំ និងទប់ស្កាត់ជំងឺមហារីក។

ចំណែកខ្វិតក្រឡុកវិញអាចជួយបញ្ចុះសម្ពាធឈាម ជួយថែរក្សាសុខភាពស្បែក ជួយការពារជំងឺមហារីក បង្កើនប្រព័ន្ធភាពស៊ាំ ជួយប្រព័ន្ធរំលាយអាហារ ជួយតួនាទីថ្លើម និងការពារមិនឲ្យធ្មេញខូច។

លោក តាំង អៀកឃុន ក៏បានបញ្ជាក់ពីរូបមន្តដែលលោកបានច្នៃបន្ថែមទៀតថា៖ «ចំពោះរូបមន្តខ្ញុំបានមកពីស្វែងរកនៅតាមប្រព័ន្ធ Internet ដូចជា Youtube, Facebook និង Google និងខ្ញុំបានកែច្នៃបន្ថែមទៀតតាមចំណេះដែលខ្ញុំធ្លាប់បានរៀនពីមុនមក ប៉ុន្តែចំពោះការកែច្នៃទាំងនេះខ្ញុំមិនបានប្រាកដថាខ្ញុំគឺជាអ្នករកឃើញមុនគេនោះទេ»។

ខ្ទីងវល្លិ៍ កាហ្វេ ស្ថិតនៅភូមិស្គន់ ឃុំសុទិព្វ ស្រុកជើងព្រៃ ខាងកើតផ្សារស្គន់ចម្ងាយ ៥០០ ម៉ែត្រក្នុងទឹកដីខេត្តកំពង់ចាម៕

សម្រស់ជ្រលង Grand Canyon អាមេរិកអាចឆក់ជីវិតភ្ញៀវទេសចរ

The more you read, the more you know June 06, 2019 News No comments :

ទោះអាជ្ញាធរព្រមានពីបញ្ហាសុវត្ថិភាព តែភ្ញៀវនៅតែចចេសប្រថុយថតរូប។

ក្រុងញូវយ៉ក: ប្រុងប្រយ័ត្នទេសចរទៅលេងជ្រលង Grand Canyon មុនពេលប៉ុនប៉ងថតរូបសែលហ្វ៊ីពីគែមជ្រលងជ្រៅ និងជាចំណុចដ៏ចោតខ្ពស់បំផុតនៅលើទឹកដីអាមេរិក។

ឧទ្យានជាតិជុំវិញជ្រលងដ៏ធំធ្លាប់ជួបនូវឧប្បត្ដិហេតុគ្រោះអាក្រក់ដោយបានឆក់យកជីវិតមនុស្សយ៉ាងតិច ៤ នាក់ក្នុងរយៈពេលប៉ុន្មានសប្ដាហ៍នាខែមីនា និងមេសា។

ជាឧទ្យានជាតិទាក់ទាញភ្ញៀវទេសចររាប់លាននាក់ដ៏ច្រើនបំផុតលំដាប់លេខ ២ នៅសហរដ្ឋអាមេរិក ទស្សនីយភាពក្នុងតំបន់វាលខ្សាច់ខ្ពស់រដ្ឋអារីហ្សូណាពិតជាស្រស់ស្អាតអស្ចារ្យ ទាំងសម្រស់ក្រឡាផ្ទៃដីជាមួយសំណឹកថ្មរាប់លានឆ្នាំលើដងទន្លេ ខូឡូរ៉ាដូ ដែលវាបានហូរកាត់បាតជ្រលង។

ប៉ុន្ដែទស្សនីយភាពក៏អាចធ្វើឲ្យភ្ញៀវទេសចរវង្វេងចិត្ដដោយភ្ញៀវខ្លះហ៊ានប្រថុយជីវិត ទោះមានការព្រមានពីឆ្មាំឧទ្យានយ៉ាងណាក៏ដោយ ហើយលទ្ធភាពអាចអាក្រក់ហួសថ្លែង។

ទាំងដំណើរឡើងភ្នំ និងចុះមកក្រោមសុទ្ធតែមិនអាចធ្វេសប្រហែស។

ឧទ្យានបានដំឡើងរបាំងការពារជាច្រើនកន្លែងនៅចំណុចគោលដៅពេញនិយមមួយចំនួន តែស្ដ្រីអ្នកនាំពាក្យឧទ្យាន អ្នកស្រី គ្រីស ហ្វីស្ទើរ បានប្រាប់ទីភ្នាក់ងារ AFP ថា៖ «យើងមិនចង់ដាក់របាំងគ្រប់ទីកន្លែងនោះទេ។ ភាពវិសេសរបស់វាគឺមិនត្រូវបានបិទបាំងឡើយ»។

ក្នុងចំណោមសៀវភៅលក់ក្នុងបន្ទប់អាហារដ្ឋានមានមួយក្បាលរៀបរាប់ពីមរណភាពនៅឧទ្យាននេះឈ្មោះថា «ឈរប្រផិតប្រផើយ៖ មរណភាពក្នុងជ្រលង Grand Canyon»។

ការរអិលធ្លាក់ លង់ទឹក កម្ដៅរាំងស្ងួត ខ្យល់ព្យុះ ពស់ចឹក អត្ដឃាត និងឃាតកម្ម សុទ្ធតែជាកត្តាប្រឈមដែលអាចធ្វើឲ្យមនុស្សស្លាប់ក្នុងជ្រលង Grand Canyon រួមទាំងការប៉ុនប៉ងថតរូបឲ្យស្អាតបំផុតផងដែរ។

លោក ជីម ស្ដេនលី អាយុ ៧១ ឆ្នាំមកពីមីឈីហ្គេន បានអានសៀវភៅស្ដីពីគ្រោះថ្នាក់នៅជ្រលងនេះមុនពេលចេញទៅទស្សនាជាក់ស្ដែងជាទីដែលភ្ញៀវជិត ៧ លាននាក់គ្រងនឹងមកកម្សាន្ដនាឱកាសខួប ១០០ ឆ្នាំ។

លោកបានបន្ថែមថា៖ «មនុស្សជាច្រើននឹងរីករាយនៅជ្រលង Grand Canyon តែចូរចាំថា វាមិនមែនជា Disneyland ឡើយហើយកុំសប្បាយភ្លេចខ្លួន»៕ HR

Mitsubishi Estate នៅតែមានទំនុកចិត្តចំពោះប្រទេស ថៃ

The more you read, the more you know June 06, 2019 News No comments :

ទិដ្ឋភាពអគារខ្ពស់ៗក្នុងទីក្រុងបាងកក ប្រទេស ថៃ។

ក្រុងបាងកកៈ ក្រុមហ៊ុន Mitsubishi Estate Group ដែលជាក្រុមហ៊ុនអចលនទ្រព្យឈានមុខគេមួយរបស់ប្រទេស ជប៉ុន នៅតែមានសុទិដ្ឋិនិយមចំពោះប្រទេស ថៃ ដោយសម្លឹងមើលវិស័យឡូជីស្ទិកនៅតំបន់ខាងក្រៅទីក្រុងបាងកកធ្វើជាការវិនិយោគបន្ទាប់មួយ បន្ទាប់ពីការវិនិយោគរួមគ្នាជាមួយក្រុមហ៊ុនអភិវឌ្ឍន៍ Raimon Land (RML) របស់ថៃ ដើម្បីសាងសង់អគារពាណិជ្ជកម្មខ្ពស់ៗដែលមានតម្លៃខ្ពស់នៅឆ្នាំនេះ។

លោក Shigehiro Ono នាយកប្រតិបត្តិក្រុមហ៊ុន Mitsubishi Estate Asia ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Mitsubishi Estate Group បានប្រាប់កាសែតបាងកកប៉ុស្តិ៍ថា ក្រុមហ៊ុនរបស់លោកមានទំនុកចិត្តក្នុងរយៈពេលមធ្យម និងរយៈពេលវែងចំពោះប្រទេស ថៃ ទោះបីជាក្រុមហ៊ុនមានការបារម្ភតិចតួចក្នុងរយៈពេលខ្លីក៏ដោយ។

លោកថ្លែងថា៖ «ប្រទេស ថៃ គឺជាទីតាំងយុទ្ធសាស្ដ្រមួយនៅអាស៊ី»។ លោកបន្តថា៖ «វិស័យដែលទាក់ទាញបំផុតផ្នែកអចលនទ្រព្យ (ដើម្បីវិនិយោគ) គឺការិយាល័យកម្រិត A ក្នុងទីក្រុងបាងកក បន្ទាប់មកវិស័យឡូជីស្ទិកនៅតំបន់ខាងក្រៅទីក្រុងនេះ»។

លោក Ono បញ្ជាក់ថា ភាពតានតឹងផ្នែកពាណិជ្ជកម្មរវាងអាមេរិក និងប្រទេស ចិន ដែលកើនឡើងកាន់តែខ្លាំង អាចផ្លាស់ប្តូរមូលដ្ឋានផលិតពីប្រទេស ចិន ទៅប្រទេស ថៃ ជាពិសេសច្រករបៀងសេដ្ឋកិច្ចភាគខាងកើត (EEC) ប៉ុន្តែក្រុមហ៊ុន Mitsubishi នឹងនៅតែផ្ដោតការយកចិត្តទុកដាក់លើទីក្រុងបាងកកដដែល។

លោកថ្លែងថា៖ « នៅពេលបច្ចុប្បន្ន យើងមិនមានផែនការវិនិយោគក្នុងរយៈពេលពីរ បី ឆ្នាំបន្ទាប់នេះទេ ដោយសារតែយើងចង់ផ្ដោតការយកចិត្តទុកដាក់លើអគារការិយាល័យខ្ពស់ៗ ដែលយើងបានវិនិយោគរួមជាមួយក្រុមហ៊ុន Raimon Land »។ លោកបន្តថា៖ «បើ EEC ទាក់ទាញការវិនិយោគថ្មីៗ ទីក្រុងបាងកកគួរតែទទួលបានអត្ថប្រយោជន៍ផងដែរ»។

យោងតាមកាសែតបាងកកប៉ុស្តិ៍ ក្រុមហ៊ុន Mitsubishi Estate បានចូលទីផ្សារអចលនទ្រព្យរបស់ប្រទេស ថៃ កាលពីឆ្នាំ ២០១៣ តាមរយៈការវិនិយោគរួមជាមួយក្រុមហ៊ុនអភិវឌ្ឍន៍ AP Thailand Plc របស់ថៃ សម្រាប់ការអភិវឌ្ឍខុនដូនៅទីក្រុងបាងកក។ ក្រុមហ៊ុនទាំង ២ បានអភិវឌ្ឍគម្រោងចំនួន ១៧ ដោយមានចំនួនសរុប ១៦ ០០០ យូនីត។

កាលពី ពីរ បី ឆ្នាំមុន ក្រុមហ៊ុន Mitsubishi បានស្វែងរកការវិនិយោគរួមមួយ ដើម្បីអភិវឌ្ឍអគារការិយាល័យកម្រិត A ក្នុងតំបន់ខាងក្នុងទីក្រុងបាងកក ដោយសារតែវិស័យនេះមានភាពរឹងមាំ ជាមួយនឹងតម្រូវការរឹងមាំ និងផ្ទៃក្រឡាទំនេរទាប។ ប៉ុន្តែក្រុមហ៊ុន AP មិនមានចំណាប់អារម្មណ៍លើការអភិវឌ្ឍមិនមែនលំនៅឋាននោះទេ ដូច្នេះក្រុមហ៊ុន Mitsubishi បានចូលរួមជាមួយក្រុមហ៊ុន Raimon Land សម្រាប់ការសាងសង់អគារការិយាល័យខ្ពស់ៗលើផ្លូវ Ploenchit Road។

លោក Ono ថ្លែងថា៖ «ការិយាល័យនេះ នឹងត្រូវបានផ្ដល់ហិរញ្ញប្បទានជាមួយនឹងមូលនិធិថ្មីៗ បានពីប្រទេស ជប៉ុន តិចជាង ១,៧ ពាន់លានបាត (ប្រហែល ៥៤ លានដុល្លារ)»។

ដីឡូត៍នេះមានទំហំ ៦ រ៉ៃ ហើយក្រុមហ៊ុន Raimon Land បានចុះកិច្ចព្រមព្រៀងជួលកាលពីចុងឆ្នាំ ២០១៦។ ជាមួយនឹងការវិនិយោគសរុប ៨,៨ ពាន់លានបាត ក្រុមហ៊ុន Raimon Land និងក្រុមហ៊ុន Mitsubishi គ្រោងអភិវឌ្ឍអគារខ្ពស់កម្ពស់ ៦១ ជាន់ ដែលអាចមានផ្ទៃក្រឡាជួលទំហំ ៦១ ០០០ ម៉ែត្រក្រឡា។

លោក Lionel Lee ប្រធានប្រតិបត្តិក្រុមហ៊ុន Raimon Land បានឲ្យដឹងថា ការសាងសង់អគារមជ្ឈមណ្ឌល One City Centre នេះគ្រោងនឹងបញ្ចប់នៅចុងឆ្នាំ ២០២២៕ LA

អាជ្ញាធរចិន ពិន័យក្រុមហ៊ុន Ford ជាង ២០ លានដុល្លារ

The more you read, the more you know June 06, 2019 News No comments :

ការបណ្តាក់ទុនរួមគ្នារវាងក្រុមហ៊ុន Ford ផលិតរថយន្តអាមេរិក និងក្រុមហ៊ុន Changan Automobile Group ដែលជារដ្ឋរបស់ចិន ត្រូវបានចោទពីបទ «ការកំណត់តម្លៃ»។

ក្រុងប៉េកាំងៈ ប្រទេស ចិន កាលពីថ្ងៃអង្គារបានពិន័យ ២៣,៦ លានដុល្លារ ចំពោះក្រុមហ៊ុន Changan Ford Automobile ដែលជាក្រុមហ៊ុនបណ្តាក់ទុករួមគ្នារវាងក្រុមហ៊ុន Ford របស់អាមេរិក និងក្រុមហ៊ុន Changan Automobile របស់ចិនពីបទ «ការកំណត់តម្លៃ» ក្នុងព្រឹត្តិការណ៍ចុងក្រោយបំផុតរបស់ទីក្រុងប៉េកាំងដែលកំណត់ទិសដៅលើក្រុមហ៊ុនអាមេរិកក្នុងគ្រាកើតមានសង្គ្រាមពាណិជ្ជកម្ម។

ការផាកពិន័យ ដែលស្មើនឹង ៤ ភាគរយ នៃការលក់របស់ក្រុមហ៊ុន Changan Ford Automobile នៅទីក្រុង Chongqing ភាគនិរតីប្រទេស ចិន នេះ ត្រូវបានធ្វើឡើងដោយសារការរំលោភច្បាប់ប្រឆាំងភាពផ្ដាច់មុខរបស់ប្រទេស ចិន។

រដ្ឋបាលរដ្ឋចិនទទួលបន្ទុកគ្រប់គ្រងទីផ្សារបានឲ្យដឹងក្នុងសេចក្ដីថ្លែងការណ៍មួយថា ក្រុមហ៊ុន Changan Ford «បានកំណត់តម្លៃលក់បន្តអប្បបរមា» ចាប់តាំងពីឆ្នាំ ២០១៣ មកសម្រាប់រថយន្ត ដែលលក់នៅទីក្រុង Chongqing ដែលទង្វើនេះ «បានដកហូតសិទ្ធិស្វ័យសម្រេចក្នុងការកំណត់តម្លៃពីក្រុមហ៊ុនចែកចាយ និងបានធ្វើឲ្យខូចការប្រកួតប្រជែងដោយស្មើភាព និងផលប្រយោជន៍ស្របច្បាប់របស់អតិថិជន»។

នៅចុងសប្ដាហ៍មុន អាជ្ញាធរចិនក៏បានកំណត់ទិសដៅលើក្រុមហ៊ុនដឹកជញ្ជូន FedEx របស់អាមេរិកផងដែរ ដោយទីភ្នាក់ងារព័ត៌មានរដ្ឋចិនរាយការណ៍ពីការប្រកាសបើកស៊ើបអង្កេតមួយទៅលើក្រុមហ៊ុននេះដោយសារតែកញ្ចប់ទំនិញរបស់ក្រុមហ៊ុន Huawei ត្រូវបានបញ្ជូនខុសទិសដៅ។

ក្រុមហ៊ុន FedEx កន្លងមកបានសុំទោសចំពោះបញ្ហានៃការបញ្ជូនទំនិញខុសទិសដៅនេះ។ កាលពីខែមុន ក្រុមហ៊ុន Huawei ត្រូវបានដាក់បញ្ចូលក្នុងបញ្ជីខ្មៅរបស់អាមេរិកដោយកាត់ផ្ដាច់ក្រុមហ៊ុននេះពីការទទួលបានការផ្គត់ផ្គង់គ្រឿងបង្គុំដែលផលិតនៅអាមេរិក៕ AFP/LA

វិស័យសូត្រកម្ពុជា កំពុងឃើញឱកាសងើបឡើងវិញ

The more you read, the more you know June 06, 2019 News No comments :

សូត្រដែលគេដាក់តាំងក្នុងពិធីសម្ពោធដាក់ឲ្យប្រើប្រាស់ជាផ្លូវការនូវមជ្ឈមណ្ឌលសូត្រខ្មែ រនៅសាកលវិទ្យាល័យភូមិន្ទភ្នំពេញ ម្សិលមិញ។

ភ្នំពេញៈ លោក ម៉ី កល្យាណ ប្រធានក្រុមប្រឹក្សាភិបាលនៃសាកលវិទ្យាល័យភូមិន្ទភ្នំពេញបានឲ្យដឹងថា កម្ពុជានឹងទទួលបានឱកាសនៃការវិនិយោគលើវិស័យផលិតសូត្រ ខណៈចិនដែលជាប្រទេសផ្គត់ផ្គង់សូត្រដ៏សំខាន់មួយ កំពុងធ្លាក់ចុះ។

ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការនូវមជ្ឈមណ្ឌលសូត្រខ្មែរ នៅសាកលវិទ្យាល័យភូមិន្ទភ្នំពេញ កាលពីម្សិលមិញ លោក ម៉ី កល្យាណ បានឲ្យដឹងថា ទោះបីកម្ពុជាជាប្រទេសមានប្រវត្តិផលិត និងប្រើប្រាស់ផលិតផលពីសរសៃសូត្រជាយូរយារណាស់មកហើយក្ដី ក៏វិស័យនេះហាក់មិនបានរីកនោះទេ។

លោកថ្លែងថា៖ «ប្រទេស ចិន ត្រូវគេដឹងថា ជាអ្នកផ្គត់ផ្គង់ផលិតផលពីសូត្រ ប្រមាណជិត ៨០ ភាគរយ នៃផលិតកម្មសកលលោក។ [ពេលនេះ] ការផលិតនៅប្រទេស ចិន កំពុងមាននិន្នាការថយចុះជាបន្តបន្ទាប់ ហើយដោយសារការចិញ្ចឹម និងផលិតសរសៃសូត្រអាចធ្វើនៅកម្ពុជាបាន ដូច្នេះនេះជាឱកាសមួយសម្រាប់កម្ពុជា»។

យោងតាមរបាយការណ៍យុទ្ធសាស្រ្តសូត្រជាតិ ឆ្នាំ ២០១៦-២០២០ ការផលិតសរសៃសូត្រនៅកម្ពុជាមានបរិមាណត្រឹមតែ ១ ភាគរយប៉ុណ្ណោះ នៃតម្រូវការប្រើប្រាស់សរុបក្នុងស្រុក ខណៈការនាំចូលមានបរិមាណរហូតដល់ ៩៩ ភាគរយដែលស្មើនឹងជាង ៤០០ តោន ក្នុង ១ ឆ្នាំ។

លោក កល្យាណ បានពន្យល់ថា ដើម្បីអាចប្រមូលផលសូត្របានចំនួន ៤០០ តោន គេត្រូវការដាំដុះដើមមនឲ្យបាន ៤ ម៉ឺនហិកតា ខណៈបច្ចុប្បន្នផ្ទៃដីដាំដុះដើមមននៅកម្ពុជានាពេលនេះមានប្រហែលជិត ១០០ ហិកតាប៉ុណ្ណោះ។ លោក បានអះអាងថា៖ «យើងរំពឹងថាផ្ទៃដីដាំដុះដើមមននៅដំណាច់ឆ្នាំ ២០១៩ នេះនឹងកើនឡើង ២០០ ហិកតា ហើយនឹងកើនឡើងជាបន្តបន្ទាប់ទៅទៀត»។ បើតាមលោក កល្យាណ ការវិនិយោគលើសរសៃសូត្រ នឹងមិនមានបញ្ហាប្រឈមនឹងរឿងពន្ធ ឬទីផ្សារដូចអង្ករទេ។

លោកស្រី ស្រី ច័ន្ទសោភា តំណាងក្រុមសូត្រនៃសាកលវិទ្យាល័យភូមិន្ទភ្នំពេញបាននិយាយថា ជាមួយនឹងការរៀបចំឲ្យមានមជ្ឈមណ្ឌលស្រាវជ្រាវនេះ គេសង្ឃឹមថានឹងមានប្រជាកសិករជាច្រើនងាកមកវិនិយោគលើការដាំដុះ និងផលិតសរសៃសូត្រ។ លោកស្រីថ្លែងថា៖ «ខ្ញុំសង្ឃឹមថា ផលិតផលធ្វើពីសរសៃសូត្រក្នុងស្រុក នឹងកាន់តែរីកចម្រើន និងមានទីផ្សារល្អ»។

បើតាមលោកស្រី ច័ន្ទសោភា បច្ចុប្បន្នសូត្រមាសមានតម្លៃចន្លោះពី ៧០-៨០ ដុល្លារ ក្នុង ១ គីឡូក្រាម ចំណែកសូត្រលេខ ២ អាចមានតម្លៃពី ៣០-៤០ ដុល្លារ។

លោកស្រី ចេន សុភាព ស្ថាបនិក និងជាប្រធានសមាគមកីតម្បាញខ្មែរ ធ្លាប់បានប្រាប់ភ្នំពេញប៉ុស្តិ៍ កាលពីពេលថ្មីៗនេះថា ខណៈដែលផលិតផលពីសរសៃសូត្រខ្មែរស្ទើរតែត្រូវគេបំភ្លេចចោល បច្ចុប្បន្ននេះតម្រូវការប្រើប្រាស់ផលិតផលពីសូត្រខ្មែរហាក់កំពុងកើនឡើងវិញ៕ LA

IMF ទម្លាក់ការព្យាករកំណើនសេដ្ឋកិច្ចរបស់ប្រទេស ចិន

The more you read, the more you know June 06, 2019 News No comments :

កម្មការនី កំពុងធ្វើការក្នុងរោងចក្រសម្លៀកបំពាក់មួយកន្លែងនៅប្រទេស ចិន។

ក្រុងប៉េកាំងៈ មូលនិធិរូបិយវត្ថុអន្តរជាតិ (IMF) កាលពីថ្ងៃពុធបានឲ្យដឹងថា ខ្លួនកំពុងបន្ទាបការព្យាករកំណើនសេដ្ឋកិច្ចរបស់ប្រទេស ចិន សម្រាប់ឆ្នាំ ២០១៩ និងឆ្នាំ ២០២០ ដោយលើកឡើងពី «ភាពមិនច្បាស់លាស់» ដោយសារតែសង្គ្រាមពាណិជ្ជកម្មរវាងក្រុងប៉េកាំង និងក្រុងវ៉ាស៊ីនតោន។

IMF បានឲ្យដឹងថា ប្រទេសដែលមានសេដ្ឋកិច្ចឈានមុខគេទី២ របស់ពិភពលោកមួយនេះ ត្រូវបានរំពឹងថា នឹងមានកំណើន ៦,២ ភាគរយនៅឆ្នាំនេះ និង ៦ ភាគរយ នៅឆ្នាំបន្ទាប់ ដោយធ្លាក់ចុះពីការព្យាករលើកមុនដែលមាន ៦,៣ ភាគរយ និង ៦,១ ភាគរយ។

លោក Kenneth Kang អនុប្រធាននាយកដ្ឋានទទួលបន្ទុកអាស៊ី និងប៉ាស៊ីហ្វិករបស់ IMF បានឲ្យដឹងនៅក្នុងសន្និសីទព័ត៌មានមួយនៅទីក្រុងប៉េកាំង ដើម្បីបង្ហាញពីលទ្ធភាពនៃដំណើរទស្សនកិច្ចទៅកាន់ប្រទេស ចិន ថា៖ «គ្រប់គ្នាខាតបង់ដោយសារតែសង្គ្រាមពាណិជ្ជកម្ម។ ប្រសិនបើពាណិជ្ជកម្មត្រូវបានគំរាមកំហែង ឬខូចខាតកំណើនសេដ្ឋកិច្ចនឹងទទួលរងផលប៉ះពាល់»។

ការចរចាដើម្បីដោះស្រាយសង្គ្រាមពាណិជ្ជកម្មរវាងប្រទេសមានសេដ្ឋកិច្ចធំជាងគេទាំង ២ របស់ពិភពលោក បានជាប់គាំង ដែលបណ្ដាលឲ្យពន្ធនាំចូលផ្នែកពាណិជ្ជកម្មទ្វេភាគី មានតម្លៃ ៣៦០ ពាន់លានដុល្លារ។

IMF បានឲ្យដឹងក្នុងសេចក្ដីប្រកាសព័ត៌មានថា៖ «ភាពមិនច្បាស់លាស់ជុំវិញភាពតានតឹងផ្នែកពាណិជ្ជកម្មនៅតែខ្ពស់ ជាមួយនឹងហានិភ័យដែលបណ្ដាលឲ្យសេដ្ឋកិច្ចធ្លាក់ចុះ»។

ការទម្លាក់ការព្យាករនេះ ត្រូវបានធ្វើឡើងខណៈរដ្ឋាភិបាលរបស់ប្រទេស ចិន ដំណើរការវិធានការមួយចំនួនដើម្បីបញ្ចៀសនិន្នាការធ្លាក់ចុះនេះ ជាមួយក្រុមអ្នកបង្កើតគោលនយោបាយងាកទៅរកការគាំទ្រឥណទាន និងការផ្ដល់ការកាត់បន្ថយពន្ធ។

ការព្យាកររបស់ IMF នៅតែស្ថិតនៅក្នុងការកំណត់ទិសដៅកំណើនជាផ្លូវការរបស់រដ្ឋាភិបាលក្នុងចន្លោះពី ៦ ទៅ ៦,៥ ភាគរយ នៅឆ្នាំនេះ ដោយបានធ្លាក់ចុះពី ៦,៦ ភាគរយ កាលពីឆ្នាំ ២០១៨៕ AFP/LA

Wednesday, June 5, 2019

វៀតណាមចំណេញច្រើនជាងគេ ពីជម្លោះពាណិជ្ជកម្ម

The more you read, the more you know June 05, 2019 News No comments :

កម្មករវៀតណាមកំពុងធ្វើការក្នុងរោងចក្រផលិតរថយន្ត Ford នៅខេត្តហៃដួង វៀតណាម។

ក្រុងសិង្ហបុរីៈ វៀតណាម គឺជាអ្នកឈ្នះធំជាងគេបំផុតពីសង្គ្រាមពាណិជ្ជកម្មរវាងអាមេរិក និងចិន រហូតមកដល់ពេលនេះ ដោយសារតែក្រុមហ៊ុននាំចូលស្វែងរកការបង្វែរទិសដៅបញ្ជាទិញរបស់ពួកគេដើម្បីចៀសផុតពីពន្ធនាំចូលកាន់តែខ្ពស់។ នេះបើយោងតាមទីភ្នាក់ងារព័ត៌មាន Bloomberg។

វៀតណាមដែលមានព្រំដែនជាប់ជាមួយប្រទេស ចិនទទួលបានកំណើនបញ្ជាទិញពីការបង្វែរទិសដៅពាណិជ្ជកម្មលើទំនិញជាប់ពន្ធនាំចូលនេះស្មើនឹង ៧,៩ ភាគរយ នៃផលិតផលក្នុងស្រុកសរុប (ផ.ស.ស) ក្នុងឆ្នាំគិតត្រឹមត្រីមាសដំបូងឆ្នាំ ២០១៩។ នេះបើយោងតាមការសិក្សាដោយក្រុម សេដ្ឋវិទូនៅក្រុមហ៊ុន Nomura Holdings រួមមានទាំងលោក Rob Subbaraman លោកស្រី Sonal Var-ma និងលោក Michael Loo។

Bloomberg បានរាយការណ៍ថា កោះតៃវ៉ាន់គឺជាអ្នកឈ្នះទី២ ក្នុងចំណោមអ្នកឈ្នះជាច្រើន ដោយកំណើនបញ្ជាទិញនេះមានចំណែកស្មើនឹង ២,១ ភាគរយ នៃ ផ.ស.ស។ ប្រទេសទាំងពីរទទួលបានការបង្វែរការបញ្ជាទិញពីការដកហូតពន្ធនាំចូលរបស់អាមេរិកលើទំនិញចិនច្រើនជាងពីការដកហូតពន្ធរបស់ប្រទេស ចិន លើទំនិញអាមេរិក។

ក្រុមអ្នកវិភាគបង្ហាញថា ការបញ្ជាទិញរបស់អាមេរិក និងចិនច្រើនជាងពាក់កណ្ដាលនៃទំនិញជាប់ពន្ធនាំចូលចំនួន ១ ៩៨១ មុខក្នុងជម្លោះពាណិជ្ជកម្មរវាងអាមេរិក និងចិន រហូតមកដល់ពេលនេះត្រូវបានបង្វែរទិសដៅដែលជំរុញឲ្យមានក្រុមអ្នកឈ្នះ និងក្រុមអ្នកចាញ់ក្នុងចង្វាក់ផ្គត់ផ្គង់ពិភពលោក។

ក្រុមហ៊ុន Nomura បានចាប់ផ្ដើមជាមួយបញ្ជីលេខកូដផលិតផលជាប់ពន្ធផ្លូវការ និងបានប្រៀបធៀបផលិតផលទាំងនោះជាមួយទិន្នន័យពាណិជ្ជកម្មប្រចាំខែនៃទំនិញដូចគ្នា ដោយរួមបញ្ចូលពន្ធលើទំនិញរបស់ប្រទេស ចិន តម្លៃ ២៥០ ពាន់លានដុល្លារ និងទំនិញអាមេរិកតម្លៃ ១១០ ពាន់លានដុល្លារ។ ក្រុមអ្នកវិភាគបានប៉ាន់ប្រមាណពីកំណើនការបញ្ជាទិញសម្រាប់ប្រទេសដែលមានសេដ្ឋកិច្ចធំបំផុតចំនួន ៥០ ក្នុងពិភពលោកក្នុងអំឡុងពេល ១២ ខែ។

ពន្ធរបស់អាមេរិកលើទំនិញចិនបានជំរុញឲ្យមានការនាំចូលជំនួសនូវផលិតផលអគ្គិសនី ទំនិញគ្រឿងសង្ហារិម និងទំនិញធ្វើដំណើរ។ សម្រាប់ពន្ធរបស់ចិនលើទំនិញអាមេរិក ការបញ្ជាទិញសណ្ដែកសៀង យន្តហោះ គ្រាប់ធញ្ញជាតិ និងកប្បាស ភាគច្រើនទំនងជាត្រូវបានបង្វែរទិសដៅចេញពីអាមេរិកទៅប្រទេសទី៣ ដូចជា ឈីលី និងអាហ្សង់ទីន៕ LA

រដ្ឋាភិបាលផ្ដល់សិទ្ធិឲ្យម្ចាស់យានយន្ត រក្សាស្លាកលេខចាស់បាន

The more you read, the more you know June 05, 2019 News No comments :

យានយន្តដែលធ្វើចរាចរណ៍នៅរាជធានីភ្នំពេញបច្ចុប្បន្ន។

ភ្នំពេញ: រាជរដ្ឋាភិបាលបានសម្រចចេញអនុក្រឹត្យមួយ ស្ដីពី «ការចុះបញ្ជីផ្ដល់បណ្ណសម្គាល់យានជំនិះ និងបំពាក់ស្លាកលេខសម្គាល់យានជំនិះ» ដែលមានចំនួន ៨ ជំពូកនិង ៣៦ មាត្រាទៅតាមការស្នើរបស់ក្រសួងសាធារណការ និងដឹកជញ្ជូនខណៈក្នុងមាត្រា ២២ បានផ្ដល់សិទ្ធិដល់អ្នកដែលចង់ប្ដូរយានយន្ដថ្មីអាចសុំរក្សាស្លាកលេខចាស់របស់ខ្លួនបាន។

តាមអនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន នៅថ្ងៃទី ៣ ខែមិថុនា ត្រង់មាត្រា ២២ នៃជំពូកទី៣ បានចែងថា «ម្ចាស់កម្មសិទ្ធិយានជំនិះ មានសិទ្ធិស្នើសុំរក្សាលេខចុះបញ្ជីយានជំនិះ ដែលកំពុងប្រើប្រាស់សម្រាប់ចុះបញ្ជីលើយានជំនិះថ្មីរបស់ខ្លួនបានស្របតាមបែបបទ និងនីតិវិធីនៃការចុះបញ្ជីយានជំនិះ ការផ្តល់ស្លាកលេខសម្គាល់ យានជំនិះ និងការលុបចេញពីបញ្ជីយានជំនិះ និងត្រូវបង់កម្រៃសេវាសាធារណៈ ដែលកំណត់ដោយប្រកាសអន្តរក្រសួង រវាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងសាធារណការ និងដឹកជញ្ជូន»។

នៅក្នុងអនុក្រឹត្យថ្មីនេះ ក៏បានបញ្ជាក់ពីការអនុញ្ញាតឲ្យម្ចាស់យានជំនិះអាចធ្វើស្លាកលេខពិសេសទៅតាមការចង់បាន របស់ខ្លួន។ ស្លាកលេខពិសេសនេះគឺម្ចាស់យានយន្តអាចកំណត់អក្សរឬលេខទៅតាមអ្វីដែលខ្លួនចង់បាន ហើយក៏អាចយកស្លាកលេខនេះ ទុកប្រើប្រាស់ពេញមួយជីវិតបានដែរ។

អនុក្រឹត្យបានបញ្ជាក់ថា៖ «ស្លាកលេខយានយន្តពិសេសនេះត្រូវសរសេរអក្សរខ្មែរបញ្ជាក់ថា «កម្ពុជា» ពីខាងលើ ហើយផ្នែកកណ្តាលជាលេខចុះបញ្ជីមានលេខឬ/និងអក្សរឡាតាំងមិនលើសពី ៨ ខ្ទង់ និងផ្នែកខាងក្រោមសរសេរអក្សរឡាតាំង «CAMBODIA» នៅពីក្រោមបន្ទាត់ផ្តេក»។

លោក ហ៊ាង សុទ្ធាយុត្តិ អ្នកនាំពាក្យ និងជាប្រធាននាយកដ្ឋានព័ត៌មាន និងទំនាក់ទំនងសារធារណៈ នៃក្រសួងសាធារណការ និងដឹកជញ្ជូន កាលពីម្សិលមិញបានថ្លែងថា អនុក្រឹត្យនេះ វាមានវិសាលភាពគ្រប់គ្រងអត្ដសញ្ញាណយានយន្តរួមមាន ផ្លាកលេខ និងបណ្ណសម្គាល់ ហើយផ្លាកលេខ និងបណ្ណសម្គាល់ វាក៏ត្រូវបានភ្ជាប់ជាមួយលេខតួរយានយន្តដែរ ដើម្បីងាយស្រួលដល់ស្វែករកប្រភពយានយន្ត។ អនុក្រឹត្យនេះ បានផ្ដល់ឱកាសឲ្យម្ចាស់យានយន្តអាចជ្រើសរើសលេខ ឬអក្សរ ដោយដាក់ឈ្មោះខ្លួនឯងផ្ទាល់។

លោកបន្តថា៖ «លេខពិសេសផ្ទាល់ខ្លួនបានផ្ដល់លទ្ធភាពឲ្យម្ចាស់យានយន្តដែលគាត់ទិញផ្លាកលេខហ្នឹងទៅហើយ អាចរក្សាលេខនោះទុក ដើម្បីនៅថ្ងៃក្រោយ បើគាត់ចង់បំពាក់ទៅលើយានយន្តថ្មីទៀត ប៉ុន្ដែលោកសួរខ្ញុំថា អាហ្នឹងគ្រប់គ្រងមិចបាន? ចំណុចនេះ យើងកំពុងរៀបចំប្រកាសនីតិវិធីដែលធានាឲ្យបាននូវការគ្រប់គ្រង់បាន ជាមួយប្រព័ន្ធបច្ចេកវិទ្យាទំនើប និងការផ្ទៀតផ្ទាត់ទិន្ន័យគល់បញ្ជីយានយន្តជាសាធារណៈ មានបំពាក់ QR Code លើផ្លាកលេខ និងកាតគ្រី។ តែការបង្ហាញព័ត៌មាននេះ គឺបានរក្សាជាសម្ងាត់នូវព័ត៌មានឯកជនភាពរបស់ម្ចាស់រថយន្តហើយ។ នីតិវិធីថ្មីនេះក៏នឹងពង្រឹងការប្រមូលចំណូលជូនរដ្ឋអោយបានទ្វេដង និងផ្តល់ជម្រើស រហូតដល់ ៦,៧ ទ្រីលាន (លាន លាន) ឯណោះ ក្នុងការជ្រើសរើសផ្លាកលេខរថយន្ត ដែលខ្លួនស្រឡាញ់។

លោកបន្ថែមថា ក្រោមការដឹកនាំ របស់ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ផ្លាកលេខពិសេសដែលកម្មង់ទិញពីរដ្ឋនេះ បើម្ចាស់ចង់លក់ទាំងផ្លាកលេខ ទៅជាមួយរថយន្ត គឺដូចតាមធម្មតាអ៊ីចឹង។ ម្ចាស់ផ្លាកលេខក៏អាចស្នើរក្សាលេខរថយន្តនេះទុកបានដែរ ពេលលក់រថយន្តទៅអោយបុគ្គលផ្សេងមួយទៀត។ លេខដែលរក្សាទុកនោះ គឺទុកនៅមន្ទីរសាធារណការ និងដឹកជញ្ជូន អីចឹងពេលម្ចាស់លេខនោះ ទិញរថយន្តថ្មីមួយទៀត អាចស្នើបំពាក់លើរថយន្តដែលទើបទិញនោះបានតាមនីតិវិធីដែលកំណត់ដោយប្រកាសក្រសួង។ ប៉ុន្ដែលេខរថយន្តហ្នឹងមិនអាចលក់ទៅឲ្យ ជនណាផ្សេងបានទេ មានន័យថាកាល់លេខ ទៅឲ្យជនដទៃ គឺវាអាចក្លាយជាអាជីវកម្មខុសច្បាប់»។

លោកបន្តថា អ្វីដែលលោក “ក” អាចលក់រថយន្តដែលមានភ្ជាប់ផ្លាកលេខនេះទៅតែម្តង ឬលក់តែរថយន្តទៅឲ្យ លោក “ខ”។ ហេតុនេះ បើលោក “ក” លក់តែរថយន្ត ដោយរក្សាទុកលេខសម្រាប់ រថយន្ត លោក “ក” បន្ទាប់ នោះលោក “ខ” ដែលទិញរថយន្តដែលមិនមានផ្លាកលេខ ត្រូវទិញផ្លាកលេខថ្មីបំពាក់លើរថយន្តនោះជាកំហិត ដើម្បីចុះបញ្ជី ឲ្យស្របច្បាប់ ដើម្បីធ្វើចរាចរណ៍លើផ្លូវបាន។ មានន័យថារថយន្តដែលធ្លាប់មានផ្លាកលេខហើយ គឺមិនអាចគ្មានផ្លាកលេខវិញបាននោះទេ។ សរុបមក ទាំងលោក “ក” និង លោក “ខ” គ្មានសិទ្ធិលក់លេខរថយន្តទេ ប៉ុន្ដែគាត់មានសិទ្ធិទិញលេខរថយន្តពីរដ្ឋ «ឧទាហរណ៍ថា ខ្ញុំមានរថយន្តមួយដែលមានអក្ស ៤ តួរថា “YUTH” ស្រាប់តែខ្ញុំលក់ឡានទៅឲ្យបុគ្គលមួយទៀត គឺខ្ញុំមានសិទ្ធិលក់ទាំងផ្លាកលេខភ្ជាប់ជាមួយឡាន ឬលក់តែឡាន រក្សាទុកផ្លាកលេខក៏បានដែរ។ បើខ្ញុំទិញថ្មីមួយទៀត ខ្ញុំនឹងទៅធ្វើនីតិវិធីជាមួយរដ្ឋ បំពាក់ផ្លាកលេខចាស់ហ្នឹងទៅលើឡានថ្មីនេះតែម្ដង ដោយទទួលស្គាល់ដោយច្បាប់ និងសមត្ថកិច្ច។ ករណីពិសេសមួយទៀត គឺម្ចាស់ឡានអាចប្ដូរឈ្មោះពីមួយទៅមួយទៀតបាន បើសិនចង់ប្ដូរ ដែលត្រូវធ្វើតាមអនុលោមភាពនៃច្បាប់ អនុក្រឹត្យ និងប្រកាសដែលបាន និងកំពុងរៀបចំជាបន្តបន្ទាប់»។

លោកបញ្ជាក់ថា ការលក់ទៅឲ្យបុគ្គលណាមួយ គឺត្រូវផ្ទេរកម្មសិទ្ធិ ហើយការផ្ទេរនេះ នឹងត្រូវធ្វើការជាមួយសារធារណការ និងដឹកជញ្ជូន ព្រមជាមួយការបង់ពន្ធជូនរដ្ឋ ជាមួយនីតិវិធីដែល និងត្រូវធ្វើនៅមួយកន្លែង និងមិនពិបាកស្មុគស្មាញទៀតឡើយ។

លោក គង់ រតនៈ នាយកស្ដីទីវិទ្យាស្ថានសុវត្ថិភាពចរាចរណ៍ផ្លូវគោកបានថ្លែងកាលពីម្សិលមិញថា វាជាការបោះជំហានទៅមុខល្អមួយ ដែលលោកគាំទ្រចំណុចនេះ ដើម្បីជួយសម្រួលឲ្យពលរដ្ឋដែលចង់បានស្លាកលេខយានយន្តតាមការពេញចិត្តរបស់ខ្លួន ឬរក្សាទុកជាអត្តសញ្ញាណរបស់បុគ្គលខ្លួនគាត់ផ្ទាល់។

លោកបញ្ជាក់ថា៖ «អ្វីដែលយើងព្រួយបារម្ភនោះ គឺស្លាកលេខនៅស្រុកខ្មែរយើងវាមានច្រើនប្រភេទពេកដូចជា ស្លាកតាមក្រសួង មន្ទីរ រដ្ឋាភិបាលផ្សេងៗ គឺច្រើនពេក អ៊ីចឹងយើងឃើញថា ការគ្រប់គ្រងនេះ វាមិនទាន់បានល្អពេញលេញនៅឡើយដែរ។ ខ្ញុំគាំទ្រឲ្យមានឯកសណ្ឋានដូចជាអ្នកខាងមន្ត្រីរាជការធ្វើមួយប្រភេទ ពលរដ្ឋស៊ីវិលមួយប្រភេទ គឺវាងាយស្រួលគ្រប់គ្រង ដើម្បីចៀសវាងជនខិលខូចក្លែងបន្លំផងដែរ»៕

Subscribe to: Posts ( Atom )

News

Translate

Archive

ទីក្រុងបាសេឡូណា បានរៀបចំបង្កើតមន្ទីរពេទ្យនៅតាមទីវាល អំឡុងការផ្ទុះឡើងនៃវីរុសកូវីដ-១៩

Popular

Thursday, June 27, 2019

អ្នកជំនាញ៖ កម្ពុជាអាចរួចផុតពីការចោទប្រកាន់ពីក្រុមលោកខាងលិចថា លម្អៀងទៅចិន

៦ ខែ គ្រុនឈាមកើតជាង ១ ម៉ឺនករណី ខណៈក្រសួងត្រៀមទប់ទល់

ACU បំភ្លឺករណីបណ្ដឹងចោទនាយករង ប.ជ.ស

រាជរដ្ឋាភិបាល ចាត់វិធានការលើបារីខុសច្បាប់

គ្រឿងញៀន និងសារធាតុញៀនជាង ២ តោន ត្រូវបានដុតបំផ្លាញ

ក្រសួងឲ្យប្រើពេល ៧ ថ្ងៃ ដើម្បីពិនិត្យគុណភាពសំណង់នៅខេត្តព្រះសីហនុ

អ្នកភូមិព្រៃទា ១៤០ គ្រួសារ តវ៉ារកដំណោះស្រាយទំនាស់ដីធ្លី

Thursday, June 13, 2019

យុវជនកម្ពុជា បង្កើតរ៉ូបូតមានសមត្ថភាពដូចទៅនឹងមនុស្ស

Thursday, June 6, 2019

ទឹកក្រឡុកព្រីង ខ្វិត និងសេដា ពីខ្ទីងវល្លិ៍ កាហ្វេ ឆ្ងាញ់ហើយជួយសុខភាព

ផ្ទះតូចបំពាក់បរិក្ខារទំនើប គោលដៅផ្ទះលម្ហែជំនាន់ថ្មីសម្រាប់អ្នកដែលស្រឡាញ់ធម្មជាតិ

ទឹកក្រឡុកព្រីង ខ្វិត និងសេដា ពីខ្ទីងវល្លិ៍ កាហ្វេ ឆ្ងាញ់ហើយជួយសុខភាព

សម្រស់ជ្រលង Grand Canyon អាមេរិកអាចឆក់ជីវិតភ្ញៀវទេសចរ

Mitsubishi Estate នៅតែមានទំនុកចិត្តចំពោះប្រទេស ថៃ

អាជ្ញាធរចិន ពិន័យក្រុមហ៊ុន Ford ជាង ២០ លានដុល្លារ

វិស័យសូត្រកម្ពុជា កំពុងឃើញឱកាសងើបឡើងវិញ

IMF ទម្លាក់ការព្យាករកំណើនសេដ្ឋកិច្ចរបស់ប្រទេស ចិន

Wednesday, June 5, 2019

វៀតណាមចំណេញច្រើនជាងគេ ពីជម្លោះពាណិជ្ជកម្ម

រដ្ឋាភិបាលផ្ដល់សិទ្ធិឲ្យម្ចាស់យានយន្ត រក្សាស្លាកលេខចាស់បាន